Mureke ibisindisha ahubwo mwuzure Umwuka(...)

Kwamamaza

agakiza

Mureke ibisindisha ahubwo mwuzure Umwuka Wera


Yanditswe na: Ubwanditsi     2021-05-23 16:25:49


Mureke ibisindisha ahubwo mwuzure Umwuka Wera

Nuko ntimukabe abapfu, ahubwo mumenye icyo Umwami wacu ashaka. Kandi ntimugasinde inzoga zirimo ubukubaganyi, ahubwo mwuzure Umwuka. Mubwirane zaburi n’indirimbo n’ibihimbano by’Umwuka, muririmba mucurangira Umwami wacu mu mitima yanyu. Abefeso 5:17-19

Pawulo yandikira Abefeso, mwibuke ko bari abantu bakijijwe, ryari itorero rishimwa. Bari abantu bubatse neza pe! Ariko Pawulo abandikira hano, arabahugura ababwira ikirusha ikindi kuba kiza ko ari ukuzura Umwuka Wera. Muri iki gihe abantu benshi basenga kugira ngo babone amafaranga, batere imbere, babone imigisha itandukanye. Ni byiza kubigira ariko ikirusha ibindi byose kuba ingenzi, ni ukuzura Umwuka Wera. Mu byukuri ubutunzi ni byiza kubugira, gutera imbere ni byiza, kubona imigisha ni byiza ariko ikintu gituma ubukristo buryoha ni Umwuka Wera.

Ubukristo butagira Umwua Wera ntibushoboka, uru rugendo rujya mu i Juru ntirushoboka iyo udafite Umwuka Wera. Ntabwo wanezeza Imana udafite Umwuka Wera kuko Yesu yaravuze ngo icyagira umumaro, ni uko ngenda nintagenda Umwuka Wera ntazaza, icyagira umumaro ni uko ngenda. Hanyuma Umwuka Wera azatsinda abemeze ibyaha, abemeze iby’amateka no gukiranuka.

Iyo urebye itorero( Umubiri wa Kristo muri iki gihe), ukareba ukuntu tubaho iby’Umwuka Wera tubisigaranye mu mateka: Uzi ko tugeze igihe umuntu avuga mu ndimi bakamureba nk’aho ari igitangaza! Yewe no kubona uzivuga nabyo ni igitangaza kuko basigaye banazihimba. Bakavuga ibijya nko gusa nazo, hari n’amatorero yigisha kuvuga mu ndimi ariko mu by’ukuri Umwuka Wera si uko bawuzura.

Petero na bagenzi be basanze ikirema kirabasaba, bati ifeza n’izahabu ntazo dufite ariko hari ikindi dufite mu zina rya Yesu Kristo haguruka utambuke! Mwari muzi ko ubu byahindutse, ifeza n’izahabu zaraje. Twubaka insengero nziza, tugenda mu madoka ahenda, dufite ibyuma bihenda by’amakorari, uje mu rusengero wabona turi abakire.

Ariko ijambo rivuga ngo ‘Haguruka utambuke, za mbaraga z’Umwuka Wera, bya bimenyetso bizagumana n’abizera( Bazirukana abadayimoni, bazavuga mu ndimi, bazanywa ikintu kica ntikizagira icyo kibatwara, bazarambika ibiganza ku barwayi bakire), ibyo byarabuze. Irivuga ngo ’Haguruka utambuke’ ryarabuze kandi ifeza n’izahabu byaraje. Ntimukabe abapfu, ahubwo mumenye ibyo Umwami wacu ashaka.

Icyo Umwami wacu ashaka, ni ukureka ubusinzi ukuzura Umwuka Wera. Icyo Umwami wacu ashaka ni ukumenya iby’ingenzi mu buzima bwawe. Sinabona umwanya ngo ndondore ibisindisha, ntabwo abakristo bose banywa inzoga ariko bafite ibisindisha: Wari uzi ko urugo rubi rwagusindisha, ukagenda wumva umeze nk’umusinzi? Ukananirwa kuzura Umwuka Wera kubera ubusinzi bw’urugo rwa kunaniye, wari uzi ko ubukene bushobora kugusindisha ukajya wicuza icyo wabereyeho, ukajya wumva kubaho ntacyo bimaze ubuzima bukabura ikerekezo?

Nyamara iyo wuzuye Umwuka Wera ushobora kuririmba ngo ubwo umwami Yesu ankunda ndi amahoro, no mu byago nzaririmba ndi amahoro. Wari uzi ko Umwuka Wera ari nk’ikinya? Unyura mu mibabaro ntikubabaze ukajya unyura mu si nkuwakuye ibirenge ku butaka, ukaba mu isi nk’utayibamo ukayireba ibambye nayo ikakubona ubambye kuko wuzuye Umwuka Wera. Nyamara imibabaro y’isi izakubabaza niba utuzuye Umwuka Wera, ubukene bwatuma uba kure y’Imana bukagutandukanya n’Imana niba utuzuye Umwuka Wera.

Hanyuma se ubukire? Uziko umuntu akira akumva arihagije, uzarebe iyo ufite ibiryo muri stoke, kuri konte hariho amafaranga, ufite imyenda mu kabati, nta burwayi umeze neza uhita wumva ufite amahoro, ukumva gusenga ntibiri ngombwa. Iyo umuntu yatangiye gukira ahita yumva akwiye kwicarana n’abandi bagabo mu kabari banywa akantu, ahita yumva umugore we ashaje akwiye gushakana n’abandi bakibyiruka, ahita atangira kuba ahuze. Abantu buzuye ubusinzi niyo mpamvu batacyuzura Umwuka Wera.

Bibiliya yavuze ngo ntimugasinde inzoga zirimo ubukubaganyi: Hanyuma se Social media yo ntisindisha? Uziko umuntu ayimaraho amasaha akibagirwa n’urugo, akibagirwa ibyo yakoraga ari kuri chat gusa? Ntimugasinde ikoranabuhanga, ntirikakwibagize ubusabane bwawe n’Imana. Hanyuma se ubusambanyi? Abantu benshi bari mu busambanyi kandi ubusambanyi bwirukana Umwuka Wera. Hanyuma se gukunda isi? Umuntu yiruka inyuma y’isi amasaaha 24/24 mu minsi7, umuntu akiruka inyuma y’isi akaburira Imana umwanya!

Ibyo nabyo bikamera nk’ubusinzi, umuntu akajya agenda yarabuze akanya ko kuruhuka, gusinzira, gusoma Bibiliya, gusabana n’inshuti, nta gusura umuntu, ukabona isi irimo kugenda idusindisha. Kandi wibuke ko isi ntizigera iduha akanya habe nagato, ntabwo izigera ikubwira ngo jya gusenga, ngo egera Imana. Isi izahora ikurura inyota itari iy’Imana kandi wibuke ko iby’isi ubyiruka inyuma bikarangira upfuye.

Yesu yagiye yihanangiriza abantu ngo mwirinde umusemburo w’abafarisayo. Inyigisho, ukwiye kumenya kujonjora inzima n’izitari nzima. Ukwiye kumenya ngo ibyo ndimo ndigishwa bimfasha kuzura Umwuka Wera, bimfasha gutera intabwe? Amagambo nigishawa ni mazima? Uzi ko mu byakozwe n’Intumwa havuga ko mu itorero rya mbere ngo abantu bigishwaga n’Intumwa, bataha bagasubira mu byanditswe ngo barebe ko ibyo bigishijwe ari bizima, ariko muri iki gihe abantu bamira bunguri!

Ntimugasinde inzoga zirimo ubukubaganyi, ahubwo mwuzure Umwuka Wera. Iyo bavuze ngo twirinde ubusinzi, ni ukumenya icy’ingenzi ni ukumenya igikwiriye.

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?