Mu isi ntabwo turi ba mukerarugendo, twaje(...)

Kwamamaza

agakiza

Mu isi ntabwo turi ba mukerarugendo, twaje kuri mission


Yanditswe na: Ubwanditsi     2021-05-07 05:23:30


Mu isi ntabwo turi ba mukerarugendo, twaje kuri mission

"Kuko turi abo yaremye ituremeye imirimo myiza muri Kristo Yesu, iyo Imana yiteguriye kera kugira ngo tuyigenderemo. Abefeso 2:10"

Mwari muzi ko abantu benshi bazarinda bapfa batazi icyo baremewe! mu isi ntabwo turi ba mukerarugendo, twaje kuri mission. Imana ifite ikintu yakohereje gukora mu isi, icyo yakuremeye gukora uzanakibazwa nuhagarara imbere y’Imana.

Ukwiye kujya ubaza Imana uti ‘Wandemeye iki, ni iki nkwiye gukora mu Bwami bwawe?’ nuhagarara imbere y’Imana, nta zina ry’itorero bazahamagara, ntuzajyana n’umuryango wawe wose. Uko wavutse mu nda ya mama uri wenyine, niko uzahagarara imbere y’Imana uri wenyine. Ikibabaje, ni ukuzava mu isi utazi icyo waje kuhakora!

Turi abo Imana yaremye ituremeye imirimo myiza yose muri Kristo Yesu

Nujya ubyuka mu gitondo, ujye ubwira Imana uti’ Mana urakoze ko wampaye gukanguka, umpindure indogobe yawe ugenderaho, nshobore gusohoza ubushake bw’Imana mu isi’. Mu isengesho rya Data wa twese, haravuga ngo’ Data wa twese izina ryawe ryubahwe, Ubwami bwawe buze, ibyo ushaka bibe mu isi’. Ni ukuvuga ngo Imana imaze kukubyara ukavuka ukaba umwana w’Imana, ukwiye kubaho ubuzima buyubaha, hanyuma ukamamaza Ubwami bwayo, ubushake bw’Imana bukaza mu isi.

Twese turamutse tumenye icyo Imana yaturemeye, tukagerageza gukora imirimo myiza aho dutuye, Ubwami bw’Imana bwaza mu isi. Ubwami bw’Imana bwaza muri serivise aho ukora, Ubwami bw’Imana bwaza aho washatse cyangwa aho washatswe, Ubwami bw’Imana bwaza. Ujye ukora ku buryo uhagararira Imana neza mu isi, kuko umunsi umwe uzasoza imirimo yawe. Ibi mvuze nta mahitamo arimo, ubishaka cyangwa utabishaka tuzajyenda! Aha turi hari abandi barahava natwe turaza, natwe tuzahava haze abandi.

Ikibazo rero, uzasiga inkuru ki imusozi, ni iki uzasiga ukoze mu isi? Turi abo Imana yaremye ituremeye imirimo myiza yose muri Kristo Yesu

Hari abakristo bajya guterana bagataha, ariko adafite umurimo n’umwe akora mu Bwami bw’Imana. Mbibutse ko Tabita(Dorukasi), ntabwo yazuwe n’amarira y’abapfakazi, yazuwe n’imirimo myiza yakoze. Koloneriyo, Imana yaravuze ngo ‘Gusenga bigeretseho kugira ubuntu, byazamukiye kuba urwibutso imbere y’Imana’.

Erega Yesu yasize adukopeje urubanza tuzabazwa: Yaravuze ngo ‘Nari nshonje murangaburira, nari nambaye ubusa muranyambika, nari mfunzwe muza kunsura, nari umushyitsi muranshumbikira, nari nyotewe mumpa amazi yo kunywa.

Ibyo se hari umuntu byananira? Biroroshye ahubwo ni uko tutazi imirimo myiza dukwiye gukora muri Kristo Yesu. Ni gute ugira imyenda 10 mu kabati, hari umuntu uzi udafite umwenda n’umwe wo kwambara kandi ubizi? Bibiliya iravuga ngo ‘ Gutanga Bizana umugisha kuruta guhabwa’. Iyo uhawe ntutange, uba upfumbase ntabwo ibindi bibona aho bijya, ariko iyo urambuye ugatanga ibindi biraza. Ntabwo gukorera umugisha bigoye!

“Nakijijwe muri 1986, 1987 , twari abaturage bahinga. Iyo nakubwirizaga nkabona utinze kubyumva, nahitaga nza kuguha umubyizi nkaguhingira, kugira ngo nkurarike uzaze ku rusengero. Ndashimira Imana abantu bose nahingiye barakijijwe! Nicyo nari mfite cyo gutanga” Pasiter Desire Habyarimana

Wowe ushobora kuba ufite ibirenze ibyo, nta muntu n’umwe udafite icyo gutanga. Byibuze watanga umwanya wawe ukava mu rugo, ukajya kuganiriza umuntu ubona ukeneye kwakira Yesu, hanyuma wenda kuko utari umubwiriza cyane, wamurarika akaza ku rusengero agahura n’ijambo ry’Imana. Abantu ufite muri terefone washyiramo amayinite(Airtime) ugahamagara umuntu umwe byibuze ukamubwira ko Yesu amukunda! Nta muntu n’umwe udafite icyo gutanga, ahubwo ni uko tutamenye icyo twaremewe.

Iyi nyigisho yateguwe, ikanatambutswa na Pasiteri Desire Habyarimana, yose wayireba hano

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?