Mbere y’uko akizwa yasengaga Buddah: Menya(...)

Kwamamaza

agakiza

Mbere y’uko akizwa yasengaga Buddah: Menya ubuzima n’amateka byaranze Yonggi Cho uherutse kwitaba Imana


Yanditswe na: Ubwanditsi     2021-09-16 05:46:34


Mbere y’uko akizwa yasengaga Buddah: Menya ubuzima n’amateka byaranze Yonggi Cho uherutse kwitaba Imana

Hashize imyaka 17 Gitwaza abonanye na Yonggi Cho , yabonanye nawe kuwa 14 Gashyantare 2004. Cho Yavutse ku itariki 14 Gashyantare, mu mwaka 1936 mu mujyi wa Ulsan ho muri Korea y’Amajyepfo, none kandi anapfuye ku 14 Nzeri 2021.

Uko Intumwa Dr Paul Gitwaza avuga amateka ya Dr Yonggi Cho

Uyu mugabo yakoreye Imana mu buryo yitanze wese, ubuzima bwe yabuhaye Imana, yakoreye Imana mu buryo butangaje! Yakijijwe akiri umwana muto afite imyaka 17. Yari avuye mu idini ry’Ababudisite ariko aza kumenya Yesu arakizwa nyuma y’imyaka 17. Hari umwana w’umukobwa wamusuye amubwira ibya Yesu, biramutangaza cyane. Cho icyo gihe yari arwaye igituntu, amenya ko Yesu ashobora kumukiza arizera, cya gituntu kirakira! Ibyo biramutangaza cyane ati’ Ko uyu Yesu akiza, uyu Yesu ari mwiza, uwamubwira n’abandi!’, ni uko yatangiye kugira inyota yo kuvuga ubutumwa.

Muri icyo gihe muri za 1940-1950, iwabo muri Korea hari abasirikare b’Abanyamerika bari mu ntambara yo gucamo Korea kabiri (Iy’amajyaruguru, n’iy’amajyepfo). Yonggi Cho rero yaje kugirana ubusabane n’umusirikare w’umunyamerika, ni we wamwigishje icyongereza arakimenya. Yaje kongera kandi guhura n’umuvugabutumwa w’umunyamerika witwaga Ken Tize, yari akeneye umusemuzi, hanyuma Cho atangira kumusemurira. Kuva icyo gihe aba iruhande rw’umukozi w’Imana Ken, aho ni ho yaje kwinjira mu muhamagaro.

Mu 1956, Yonggi Cho yabonye buruse yo kujya kwiga ishuri rya Tewologiya. Yari yarize amashuri ya segonderi, ariko ntiyashobora gukomeza kubera ubwo burwayi yari afite ndetse n’ubutunzi bwa se bwari bumaze kuzahara, yari amaze guhomba. Cho rero yaje kujya kwiga ishuri rya Bibiliya muri Full Gospel Bible College, muri Seoul mu murwa mu kuru wa Korea y’amajyepfo.

Aho kuri iryo shuri, Cho yaje kuhahurira na Choi Ja-shil, waje kumubera nyirabukwe, niwe baje gufatanya nawe gutangira umurimo w’Imana kandi uyu mubyeyi yaramufashije cyane! Young Cho rero nibwo yaje gutangira itorero rikomeye muri Korea, rizwiho kuba ari ryo rifite abakristo benshi ku isi. Itorero ryitwa Yoido Full Gospel Church (Assemblies of God), ryari rifite abakristo hafi miliyoni. Ni we watangije ibyo gusengera mu rugo mu matsinda mato mato (cellule de prière ) nk’abantu 7, kuri buri tsinda.

Yonggi Cho rero Imana yaramufashije cyane, atangira kujya yigisha mu gikoreya ndetse no mu cyongereza, icyo gihe yaje no kuba umukuru w’ishuri ryari aho. Itorero rye ryarakuze cyane nyuma yo gukira igituntu, icyo gihe Korea yari ikennye cyane!

Imana ihamagarira Cho kuzana abakoreya kuri Yesu, abahoze ari ababudisite kandi koko baraje. Ikindi, Imana yamusabye gusengera abarwayi ndetse n’ibibazo by’abantu, izo mpano nazo yarazikoresheje. Yonggi Cho yaje gusoma ijambo rivuga ngo” Mukundwa ndagusabira ngo ubugingo bwawe bugubwe neza muri byose, nk’uko ubugingo bwawe buguwe neza”. Iryo jambo riramutangaza, ati ese koko burya ’Imana irifuza ko tubaho neza?’ Aho ni ho yatangiye gusengera abantu ngo Imana ibahe uburere, Imana irabikora!

Yonggi Cho yari azi ko mu by’ukuri gukura kw’itorero bigomba guca mu miryango, kandi icyo kintu yaragikoze. Mu mwaka w’1976, yaje gushyiraho minisiteri yitwa Church Growth International (Gukura kw’amatorero mpuzamahanga). Wabaye umurimo ukomeye cyane, kuko yafashije abashumba benshi bagiye batangira amatorero menshi! Aho yabigishaga amahame y’ivugabutumwa, ndetse n’ukuntu abashumba bakorera itorero rikaguka.

Mu 1986, nanone Cho yakoze irindi shami ry’iteramber rishamikiye kuri Church Growth International, ryitwa “Elim Welfare Town”( Umurwa wa Elimu, uteza abantu imbere). Aho yafashije abasaza, babubakira aho baba, n’abandi bose batagira aho baba barubakiwe, yafashije kandi urubyiruko, afasha abatagira akazi buri wese ahugurwa mu byo yize n’ibyo ashobora gukora, Korea iza kuzamuka. Cho ari mu ba ntu bafashije Korea gutera imbere, kandi yasengeye igihugu cyabo kiva mu bukene.

Yonggi Cho yashyizeho umusozi w’amasengesho, aho abantu birirwa/ bakarara basenga[ …Nageze kuri uwo musozi, habamo amazu abantu baza gusenga baturutse isi yose, basenga amanywa na nijoro kugira ngo Korea itere imbere ive mu mivumo] Paul Gitwaza.

Mu 1988 Yonggi Cho, yashinze ikinyamakuru gikomeye mu gihugu kuko nicyo cyazaga ku mwanya wa kabiri, kitwa “Kukmin Ilbo”. Gitwaza ati” Icyo kinyamakuru ndakiza kuko igihe nageze yo nakiriwe n’abanyamakuru bacyo, umunsi nasohotse nasanze amafoto yanjye ari ku ma Billboard ndatangara!, nti ese aba bantu ni uku bakomeye gutya! N’inzu y’icyo kinyamakuru yari inzu ihambaye cyane mu mazu maremare akomeye hano muri America”

Kuva mu 1992-2000, Yonggi Cho ni we wari uyoboye World Assemblies of God Fellowship , ku isi yose. Kuva mu mu 1998, yagiye ahagararira imiryango myinshi yaba iya gikrsto, cyangwa n’indi itandukanye. Mu mwaka w’2008, yeguye ku buyobozi bw’itorero hasigara hayobora uwo yabyaye mu mwuka witwa, Young Hoon Lee .

Dr David Yonggi Cho yamaze gusanga Yesu (Kwita Imana) ku imyaka 85 (1936-2021), yazize indwara ya Stroke ikunze kwibasira ubwonko. Ni mu gihe kandi umugore we Sung-Hye Kim, nawe yari aherutse kwitaba Imana mu kwezi kwa Gashyantare 2021.

Yonggi Cho azibukwa nk’uwagize uruhare mu gushyiraho amahame atuma amatorero yaguka, azibukwa nk’uwakoreshejwe n’Imana ibitangaza hirya no hino ku isi, yasengeye abantu benshi bakira indwara. Azibukirwa kandi nk’uwagize uruhare rukomeye mu gukura abantu mu bukene, bakava aho bari, bakagira n’aho bagera.

Reba hano uko Dr Paul Gitwaza asobanura amateka ya Yonggi Cho

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?