Kuramya kunezeza Imana

Kwamamaza

agakiza

Kuramya kunezeza Imana


Yanditswe na: Ubwanditsi     2021-08-08 02:56:25


Kuramya kunezeza Imana

Ukundishe Uwiteka Imana yawe umutima wawe wose, n’ubugingo bwawe bwose n’ubwenge bwawe bwose n’imbaraga zawe zose. Mariko 12:30

Imana iragushaka wese

Ntabwo Imana ishaka igice kimwe cy’ubuzima bwawe. Igusaba umutima wawe wose, ubugingo bwawe bwose, imbaraga zawe zose. Ntabwo Imana ijya ishishikazwa n’ubwitange bw’igice, kumvira kutuzuye, cyangwa guhabwa ibisigarira by’igihe cyawe n’amafaranga yawe, Imana ishaka ko uyiha urukundo rwawe rwose, atari uduce duto duto tw’ubuzima bwawe.

Umusamariyakazi yigeze kugerageza kujya impaka na Yesu kuby’igihe, ahantu n’uburyo bwiza bwo kuramya Imana. Yesu amusubiza ko ibyo bigaragara inyuma ari iby’agaciro gacye cyane. Aho usengera ntihafite agaciro kangana n’igituma usenga cyangwa urugero wiha Imana iyo uyiramya. Hari uburyo buri bwo n’uburyo butari bwo bwo kuramya Imana. Bibiliya iravuga ngo tugomba gukomeza Ubuntu bw’Imana kugira ngo tubone uko dukorera Imana nk’uko ishaka.

Hari ibintu 4 biranga uko kuramya Imana ishaka:

Imana ishima iyo tuyiramya uburyo buhuje n’uko iteye:

Abantu benshi uzumva bavuga ngo “Jye nibwira ko Imana iteye itya…” bagatangira kukubwira Imana bakwifuza gusenga uko yaba iteye. Ariko ntidushobora kwicara ngo twiremere ishusho y’Imana itaturushya cyangwa ihuye n’uko tugenda ngo abe ari yo turamya. Ibyo ni ugusenga ibigirwamana.

Kuramya Imana bigomba gushingira ku Ijambo ry’Imana, aho kwishingikiriza ku buryo dutekereza Imana. Yesu yabwiye wa mugore w’umusamariyakazi ati “Abasenga by’ukuri basengera Data mu kuri no mu Mwuka no mu kuri, kuko Data ashaka ko bene abo ari bo bamusenga” Gusengera mu kuri bivuga gusenga Imana nk’uko yatwihishuriye muri Bibiliya.

Imana irishima iyo kuramya kwacu bivuye ku mutima:

Ubwo Yesu yavugaga “Gusenga mu Mwuka” ntabwo yavugaga Umwuka Wera, ahubwo yavugaga umwuka wawe. Kuko waremwe mu ishusho y’Imana, uri umwuka utuye mu mubiri, kandi Imana yaremye umwuka wawe mu buryo ushobora gusabana na Yo. Kuramya ni igihe umwuka wawe ushyikirana n’Umwuka w’Imana.

Iyo turamya Imana, yo ireba hirya y’amagambo tuvuga ikitegereza icyerekezo cy’imitima. Bibiliya iravuga ngo “Abantu bareba ubwiza bugaragara, ariko Uwiteka areba ku mutima”.

Imana iranezerwa iyo tuyiramya tubitekereje:

Itegeko Yesu yatanze ryo “Gukunda Imana n’ubwenge bwose” rigaruka inshuro enye zose mu isezerano rishya. Ntabwo Imana ijya yishimira indirimbo abantu baririmba badatekereza ibyo bavuga, amasengesho basubiramo barangaye by’akamenyero, cyangwa se za Haleluya, Imana ishimwe abantu bavuga kuko babuze icyo bavuga, iyo uramya Imana udatekereje, nta cyo uba urimo kuyibwira. Ugomba gukoresha ubwenge bwawe.

Bene uko gusenga kudakereza, Yesu yakwise “Gusubira mu magambo y’ubusa”
N’amagambo yo muri Bibiliya ashobora guhinduka akamenyero iyo akoreshejwe kenshi akamenyerwa abantu ntibabe bagitekereza ku byo bavuga. Biroroha cyane gusenga Imana ukoresheje bene ayo magambo amenyerewe aho kwivuna ushaka uburyo bushya n’amagambo mashya byo kubahisha Imana.

Ni yo mpamvu nkugira Inama yo kujya usoma Bibiliya mu buryo butandukanye yahinduwemo. Bizagufasha kwagura amagambo ukoresha mu kuramya Imana.

Imana iranezerwa iyo kuramya kwacu kugaragarira mu bikorwa:

Bibiliya iravuga ngo “Mutange imibiri yanyu ibe ibitambo bizima bishimwa n’Imana, ni ko kuyikorera bikwiriye”. Kuki hano Imana isaba umubiri? Kuki itavuga ngo mutange umwuka? Kuko udafite umubiri ntacyo ushobora gukora hano ku isi. Nugera mu bugingo buhoraho uzahabwa undi mubiri mwiza kuruta uyu, kandi wo mu rundi rwego.

Mu kuramya Imana dusabwa “gutanga imibiri yacu nk’ibitambo” Ubundi wumva igitambo nk’ikintu cyapfuye, ariko Imana yo ishaka ko uba igitambo kizima. Imana ishaka ko ubaho kubwayo! Ikibazo cy’igitambo kizima ni uko kenshi ni uko gikururuka kikava ku gicaniro, kandi natwe kenshi ibyo turabikora. Ku cyumweru tukaririmba ngo “Nimuze ngabo za Yesu, tujye mu ntambara” hanyuma kuva kuwa mbere tukigendera uko isi igenda.

Iyo uhimbaje Imana n’iyo wumvaga bitakurimo, iyo uvuye mu gitanda ukaramya n’ubwo wari unaniwe, cyangwa iyo witangiye gufasha abandi n’ubwo wumvaga urushye, uba urimo guha Imana igitambo cyo kuyiramya. Ibyo binezeza Imana.

By Rick Warren

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?