Kuki hari ishimwe rishobora gukomeretsa(...)

Kwamamaza

agakiza

Kuki hari ishimwe rishobora gukomeretsa abandi?, Gushima gukwiriye ni ukuhe?


Yanditswe na: Ubwanditsi     2021-01-14 05:45:11


Kuki hari ishimwe rishobora gukomeretsa abandi?, Gushima gukwiriye ni ukuhe?

Ubundi si ihame ko ushima Imana buri gihe uri imbere y’abantu, Imana yo yumvira hose. Icyakora iyo ari umuhigo wahize ko uzabikorera imbere y’iteraniro, urabikora. Iyo rero utitondeye imvugo ukoresha mu ishimwe ryawe, ntiwite no kubo urimo kurisangiza byanze bikunze urabakomeretsa. Ni ibiki ukwiye kwirinda mu ishimwe ryawe igihe uri mu iteraniro?, ese ubundi ni ngombwa gushima buri cyumweru?, bishoboka se ko washima nta turo ufite?.

Byinshi wibaza kuri iyi ngingo, dore ibisubizo.

Pasiteri Habyarima Desire aherutse gutambutsa ikiganiro kuri Agakiza Tv kibanze kuri iyi ngingo.

“Nimushime Uwiteka kuko ari mwiza, kuko imbabazi ze zihoraho iteka ryose”. Zaburi 136

Ikintu cya mbere cyo gushima kandi rwo rufatiro rw’andi mashimwe yose ku Mana, ni imbabazi twagiriwe( Agakiza). Mu gakiza, mu mbabazi wagiriwe harimo ubukure bwo mu gakiza, umubano ugirana n’Imana, harimo guhinduka mu myumvire, muri rusange ni ukwakira ukaba mu buzima bwose bwo mu bukristo.

NYuma nibwo haza ibindi bitangaza Imana yakoze, hagashimwa Imana kuko yaguhaye icy’ingenzi.

“Nararongoye, nararongowe, narabyaye, nazamutse mu ntera, singihahira ku kiro mpahira ukwezi…”, ni zimwe mu ngero z’amashimwe abakristo bashima muri iki gihe. Ayo mashimwe yose ni meza ariko ntabwo yuzuye.

Desire ati” Kera njyewe nkizwa mu 1986-1987, amashimwe yari ahari : Umuntu yaravugaga ati ‘ Ndashima Imana nari mfite umuntu nanga, Imana yarambatuye!, nagiraga irari ry’ubusambanyi Yesu ararinkiza, nari umwibone Yesu arambohora,’.

Ukumva ibyo ashima ni intambwe yateye mugukra no guhinduka, no gusa na Yesu. Ibyo rero ni ibikwereka umubano uwo muntu agirana n’Imana ko bizamwinjiza mu bwami bw’ijuru. Ariko hari ibindi bigaruka ku isi, bituma umubano wacu tugirana n’Imana, imbabazi itugirira bigenda bitakara”.

Haba uri wenyine, imbere y’iteraniro ushobora gushima Imana

Byose bishingiye ku muhigo umuntu aba yarahize, Imana yo ntibisaba ko ujya kuyishima ari uko uri imbere y’abantu ahubwo ushobora kuyishima wenyine kandi ikamenya ko wayishimye. Ariko iyo wabihize warabwiye Imana ko uzayishima imbere y’amateraniro, ni byiza kubikorera imbere y’amateraniro nkuko wabihize.

Ibyo ukwiye kwirinda igihe ushima Imana imbere y’iteraniro

Bibiliya ivuga ko dukwiye gushima bituma abanyamibabaro bishima. Hari igihe umuntu atangira ashima Imana bikarangira ari we wishimye cyangwa bikazamura ubwibone buri muri we, bikaba byasigira ibikomere abo yasangije ibyo yise ishimwe rye ku Mana. Mbere yo gutegura ishimwe ryawe, banza urebe nimba iryo shimwe ryawe rifitanye isano n’Imana.

Ikindi ni ngombwa kubanza gutegura ishimwe ryawe ukarisengera mu buryo bwo gutegura imitima yabazaryumva. Satani azabura aho anyura akomeretsa abazaryumva. Ukwiye kandi kwita ku gutegura ishimwe ryawe mu magambo make y’impine kandi yumvikana, ukabijyanisha n’igihe kuko bitandukanye n’ubuhamya.

Igihe ushima si ngombwa kuzanamo ibikomere bishingiye ku birarane wagiye ugira mu buzima bwawe. Iyo bigenze gutyo bibyara gusa naho wishongora, wihenura ku bandi bikaba byabakomeretsa. Nubwo urimo gushima, tekereza ko imbere y’abo urimo kubwira hari abagifite ibibazo. Yego warabyaye ariko muri iryo teraniro hari abantu bamaze imyaka myinshi batarabona urubyaro, warariye ariko hari abantu bashonje muri iryo teraniro.

Ntukodesha ni byiza, ariko muri iryo teraniro harimo abantu bakodesha, abo bose kandi ni abantu bakijijwe kandi bakunda Imana bagitegereje guhabwa uwo mugisha. Ni byiza rero gushima Imana ariko utaribusigire abandi ibikomere.

Imana ni urukundo kuba umuntu yaba adafite ituro, ntibyamubuza gushima Imana kuko icyo Yesu yakoze ku musaraba ni cyo cyari gikomeye kuruta ibindi byose. Ikosa ribaho igihe umuntu ashobora kujya gushima nta turo ajyanye kandi arifite.

Kuzamura amaboko ngo abantu bahe Imana icyubahiro bikorwa n’umaze gushima Imana hari ikibazo bitera nkuko abantu bamwe babyibaza?. Ntacyo bitwara Imana, ahubwo Imana yo ihita yibaza ngo ateye kuri nde, umutima we umeze ute?, kuko hari igihe uyazamura usambana, ukayazamura ubeshya, ukayazamura akubita umugore.

Ntabwo Imana yita ku maboko yazamutse ahubwo yita ku mutima w’uwayazamuye.

Nta tegeko rihari ko umuntu ashima buri cyumweru, ahubwo ikiza ni uko umuntu yabitekerezaho akurikije ibyo Imana yamukoreye, agategura ituro rizakora ku mutima w’Imana. Washima rimwe mu mwaka, rimwe mu kwezi, rimwe mu cyumweru, buri munsi wabikora ariko ugakora ibintu wumva bikoze ku mutima w’Imana.

Urubanza rukomeye ku bakoresha amaturo nabi ( Abayakira)

Pasiteri Desire ati” Nagira ngo mbwire abashumba cyane, mbabwire akantu gakomeye. Ituro ry’ishimwe ni iki?, ni umuruho umuntu aruha akabwira Imana ngo nunkiza uyu muruho nzakuzanira ituro ngushimire. Hanyuma wowe ukegeranya imiruho yabo bantu ukayirya ukumva uri umuntu w’umugabo!, nagira ngo mbwire abashumba bakoresha amaturo nabi ko bishyiraho urubanza rukomeye!.

Ibintu byavuye mu muruho w’umuntu , mu busabane umuntu yagiranye n’Imana nabyo bikwiye kwitonderwa, bigakoreshwa mu buryo bwejejwe.

Abashinzwe umukumbi muri iki gihe bamwe na bamwe ntibabasha kubwiriza bikora ku mutima abakristo byatuma batanga amaturo, bahitamo gukinisha amarangamutima yabo. Iyo umuntu yahaye Imana umutima, ntabwo yakwima Imana amafaranga.

Iyo washoboye gushumba umuntu ukamumenyera ubuzima bw’ubukristo ukamwitaho, ntabwo yananirwa gukorera Imana, ntiyananirwa gutura.

Reba hano iyi nyigisho yose

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?