Kubamba ingeso mbi za kamere ku musaraba

“Ijambo ry’umusaraba ku barimbuka ni ubupfu, ariko kuri twebwe abakizwa ni imbaraga z’Imana” 1Abakolinto 1;18. Kera umusaraba wakoreshwaga nk’Igiti, igihe mose yari mu butayu Imana yamubwiye gucura inzoka mu muringa maze akayimanika ku giti. Kubara 21: 7-9. Byasobanuraga ko Yesu azabambwa ku musaraba, kugira ngo acungure abantu.

Muri iyi nyigisho, turavuga umusaraba nk’ahantu ho kubamba ingeso zacu za kamere. Mu kiganiro ‘Ubutumwa bukiza’ gitambuka kuri Agakiza Tv, Pasiteri Desire Habyarimana, yigishije kuri iyi ngingo igendanye no kubamba ingeso za kamere ku musaraba. Ese Kubamba ingeso za kamere ku musaraba bisobanuye iki?

Pasiteri Desire Habyarimana mu kiganiro ’Ubutumwa bukiza’

Umuntu agizwe n’ibice 3: Umwuka, ubugingo n’umubiri. Iyo ukijijwe mu gice cy’Umwuka, ni ubuntu Imana ikugirira, agakiza Imana igatangira ku buntu, ariko mu gice cy’ubugingo twezwa ku ngeso cyangwa se kubamba ingeso za kamere ku musaraba.

Pawulo yandikira Abagaratiya 5:19, yavuze ku ngeso za kamere. Twibuke ko abagaratiya bari abantu bakijijwe, Nubwo twakijijwe tukakira kamere y’ubumana, turacyambaye umubiri. Hari ubwo icyaha kigaragariza mu mubiri, umuntu akisanga avuga nabi, ukisanga ugira umujinya ukaba ufite ingeso utarabasha guhindukaho.

Abagalatiya 5:24, havuga ko “ Abakirisito Yesu babambanye kamere, n’iruba n’irari byayo. Niba tubeshwaho n’Umwuka tujye tuyoborwa n’Umwuka. Twe kwifata uko tutari , twenderanya , kandi tugirirana amahari.”

Hano Bibiliya idukangurira kubamba ingeso za kamere ku musaraba. Ni ukuvuga ko ukwiye gufata ingeso ikugora ukayibamba ku musaraba.

Kubamba ingeso mbi za kamere ku musaraba bisobanuye iki?

Kubamba ingeso ku musaraba, bisa nk’aho abantu batabisobanukiwe, ariko mu kumva neza iyi ngingo reka twifashishe imbuto z’umwuka. Abagalatiya 5: 22-26. Kugira ngo umuntu agire urukundo, ni uko akunda abamwanga. Kwishima, umuntu ashobora kwishima ntakimushimishije, kubabarira utagusbye imbabazi. Muri make imbuto z’umwuka ni ikinyuranyo cy’uko kamere yacu imeze.

Bibiliya nkuko ibivuga, ijambo ry’umusaraba ku barimbuka ni ubupfu, ariko abantu batarakizwa bo si uko babyumva: Ni urushyi ku rundi, ni iryinyo rihorerwa irindi, niba umubwiye nabi nawe arakubwira nabi, niba agize irari aragenda agasambana. Ariko umurokore we ibyo ntabwo abikora, arihangana akirinda gukora ibyangwa n’amaso y’Uwiteka.

Abantu benshi baramukurikira , barimo n’abagore bikubita mu bituza bamuborogera. Yesu arabakebuka arababwira ati” Bakobwa b’I Yerusalemu, ntimundirire, ahubwo mwiririre n’abana banyu. Luka 23: 27-28.

Aha ni igihe Yesu yari agiye kubambwa, ahura n’abantu baramuririra, bavuga ibitangaza yabakoreye, bavuga imirimo myiza yabakoreye , bamufitiye impuwe babajwe n’uko agiye kubambwa. Yesu yabasubije ko bakwiye kubababazwa n’ubugingo bwabo, bakita ku iherezo ryabo kuko we yari arangije urugendo rwe. Yabasobanuriraga ko we agiye kubambwa bikarangira ariko ko bo bakwiye kubamba ingeso zabo za kamere ku musaraba buri munsi.

Matayo 16: 24-25, hagira hati” Maze Yesu abwira abigishwa be ati” Umuntu nashaka kunkurikira yiyange , yikorere umusaraba we ankurikire, kuko ushaka kurengera ubugingo bwe azabubura, ariko utita ku bugingo ku bwanjye , azabubona.”

Pawulo yandikira Abaroma 12:1-2, yaravuze ngo “Nuko bene Data, ndabinginga kubw’imbabazi z’Imana ngo mutange imibiri yanyu, ibe ibitambo bizima byera bishimwa n’Imana, ariko kuyikorera kwanyu gukwiriye. Kandi ntimwishushanye n’abiki gihe, ahubwo muhinduke rwose mugize imitima mishya, kugira ngo mumenye neza ibyo Imana ishaka, aribyo byiza bishimwa kandi bitunganye rwose”

Aha Bibiliya iratubwira ko dukwiye kwiga kubamba ingeso za kamere ku musaraba. Dukwiye kwemera kwinjira imbere muri twe, tukamenya ibikitugora kugira ngo tutagira urubanza. Urubanza ruzanwa n’uko abantu birarira, ntibemere ko kamere yabo ukwiye kubambwa ku musaraba. Umurimo w’umusaraba utangirira imbere muri twe, ugakomeza no mu bugingo bwacu. Uwo musaraba ugakomeza kugeza igihe tuzahinduka urusengero rw’Imana.

Icyatumye abakristo benshi bataba abakristo beza, ni uko banze inzira yo kwezwa, ni uko banze inzira yo guhinduka ku ngeso, ahubwo bagahitamo kuba abanyamatorero gusa. Ibyo bituma batera imbuto aho baba, aho bakorera mu buzima bwa buri munsi. Ariko nitwemera kubamba ingeso zacu ku musaraba ubuzima bwacu buzahinduka.

Imana yifuza ko duhinduka tukabamba ingeso zacu ku musarba, Umusaraba ukwiye guhora wigaragaza mu buzima bwacu.

Reba inyigisho yose ’Kubamba ingeso mbi za kamere ku musaraba’

[email protected]