Iyo ataba Uwiteka, tuba turi amateka!

Kwamamaza

agakiza

Iyo ataba Uwiteka, tuba turi amateka!


Yanditswe na: Ubwanditsi     2021-04-12 06:48:17


Iyo ataba Uwiteka, tuba turi amateka!

Ni ishimwe rikubiye mu ndirimbo y’itsinda Beauty For Ashers yiswe” Turashima”. Indirimbo ifatwa nk’ishimwe ry’ibihe byose ku banyarwanda kubw’ibyo Imana yakoze, ibyo igihugu cyagezeho nyuma ya Jenocide yakorewe Abatutsi 1994.

Ubwo u Rwanda n’isi yose bibukaga ku nshuro ya 21, nibwo iri tsinda ryashyize ahagaragara iyi ndirimbo mu kwifatanya n’abanyarwanda n’inshuti z’u Rwanda gushima kubw’ibyo Imana yakoze, n’intambwe ikomeye yateje u Rwanda.

Icyakora iri shimwe rirushaho kubyibuha buri munsi ku banyarwanda n’abakurikiranira iby’urwanda hafi, yewe no kuri iyi nshuro ya 27 twibuka abacu bazize Jenoside yakorewe abatutsi. Ibi biterwa nuko abayirokotse bakomeje kurushaho kwiyubaka, haba mu buryo bwo gukira ibikomere, kubabarira ababiciye, kugira umusanzu ukomeye mu bumwe n’ubw’iyunge ndetse no mu buryo bw’iterambere rifatika.

Amagambo agize indirimbo “Turashima” y’itsinda Beauty for Ashes”

“Turashima kuko ataba Uwiteka tuba turi amateka. Reba aho twavuye, reba aho tugeze byose ni Yesu, byose ni Yesu. Reba iki gihugu, reba aya mahoro byose ni Yesu , byose ni Yesu.

Reba abo twabuze, reba abo twabyaye, byose ni Yesu, byose ni Yesu. Reba ibi byishimo, reba umunezero byose ni Yesu, byose ni Yesu”.

Reba hano iyi ndirimbo

Buri uko umwaka utashye, mu gihe cyo kwibuka abazize Jenoside yakorewe Abatutsi mu 1994, Korari Jehovah Jireh nayo itegura indirimbo irimo amagambo ahumuriza, asubizamo ibyiringiro kandi anashimira Imana yakomeje kubaba hafi mu rugendo rwo kwiyubaka nyuma y’icuraburindi u Rwanda rwanyuzemo.

Kuri iyi nshuro indirimbo nshya ya Jehovah Jireh Choir yayise “Wagaruye Umucyo’’, irimo ubutumwa bwo gushimira Imana yongeye gutuma umucyo witamurura mu Rwanda ubu rukaba rusendereye amahoro.

Indirimbo igira iti” Hari mu mwijima, hari mu rusaku rw’umubabaro. Amajwi menshi y’abakuru batakaga cyane, amajwi y’abana bato batabazaga. Mbe maso yanjye! ko wabonye ibikomeye, mbe mutima wanjye! Ko wakiriye ibiremereye.

Jambo w’Imana! Yewe Yesu Kristo yewe Rukundo wagaruye umucyo mu gihe cy’umubabaro, watwomoye inguma wabaye muganga w’imitima. Uriya mwana yari mutoya kandi yari afite ababyeyi, bagiye abareba bagenda atabasezeye, byari umubababaro. Ijoro ryamwiriyeho abura umufasha, yahamagara akabura umwitaba.

Ya Mana niyo yamwitabye, imuha urumuri rw’icyizere. Imuha ikiganza iti ndagufite ( Ndi kumwe nawe) nzabana nawe ndi Imana. Ku munsi w’amakuba waranyitabye, ku munsi w’ibyago waranyumvise. Nanjye mfite intego nzagumana nawe, nzakomeza ntwaze ngere kure. Nzagera ku mwuzuro w’icyo ushaka Mwami uzangenera, ndakwizeye.”

Umuyobozi w’Indirimbo muri Jehovah Jireh, Bikorimana Aloys, aherutse kubwira itangazamakuru ko benshi mu bo baririmbana Jenoside yabaye ari abana ariko yamara kurangira, bamwe bakitakariza icyizere cy’ubuzima.

Ati “Benshi muri twe Jenoside yabaye tukiri abana, nyuma y’uko Inkotanyi ziyihagaritse, nta cyizere cyo kongera kubaho cyagaragaraga ariko Imana yagize neza. Imfubyi zarakuze, aha rero iyo turebye imirimo Imana yakoreye Abanyarwanda muri rusange n’abagize Jehovah Jireh by’umwihariko bidutera kwibuka ko iyo Mana yera, aho ababyeyi batari ikahaba ku bw’umugambi wayo mwiza kuri twe.”

Indirimbo nshya ya Jehovah Jireh Choir yayise “Wagaruye Umucyo’’, irimo ubutumwa bwo gushimira Imana yongeye gutuma umucyo witamurura mu Rwanda ubu rukaba rusendereye amahoro.

Ati “Twabwiraga Imana tuyishimira ko yagaruye umucyo mu Rwanda nyuma y’uko twaciye mu mwijima w’icuraburindi, umuntu ataka adafite uwo atakira, abana barira badafite ubahoza kuko abagakoze ibyo Jenoside yakorewe Abatutsi yarabajyanye. Dufite ishimwe ko Imana yatubereye umuhoza, tuzakomeza dutwaze kugeza ku ndunduro.”

Reba hano: “Wagaruye Umucyo’’ ya Jehovah Jireh Choir

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?