Itoze kwiga Ijambo ry’Imana

Kwamamaza

agakiza

Itoze kwiga Ijambo ry’Imana


Yanditswe na: Ubwanditsi     2021-08-01 04:05:01


Itoze kwiga Ijambo ry’Imana

Ujye ugira umwete wo kwishyira Imana nk’ushimwa, umukozi udakwiriye kugira ipfunwe, ukwiriranya neza Ijambo ry’ukuri (2Timoteyo 2:15).

Kimwe n’uko umunyeshuri aba ategerejweho kwitabira ishuri ntasibe kugira ngo azabone amanota meza, Imana igutegerejeho kwitabira Ijambo Ryayo go ubashe gutunganirwa mu buzima.

Gutunganirwa mu buzima ntabwo bituruka ku mubare w’impamyabuhobozi wakusanyije, ahubwo bituruka ku ngano y’Ijambo ry’Imana uzi kandi ushyira mu bikorwa! Nta mudayimoni uzakumvira kubera ko ufite impamyabumenyi y’ikirenga, kimwe n’indwara, ubumuga cyangwa ubukene na byo nta kindi bizunamira uretse Ijambo ry’Imana.

Kimwe n’uko ari icyifuzo cy’umubyeyi wese kubona umwana we atera imbere mu ishuri, akava mu mashuri abanza akajya muri kaminuza, ni icyifuzo cya So wo mu ijuru ko ukura mu mwuka. Birababaje kubona abakristo bamwe bakiri muri bimwe bya “Matayo, Mariko, Luka na Yohana, muhe umugisha uburiri ndyamyeho…” N’ukuntu hari byinshi mu Ijambo ry’Imana byo kwigwa. Ntibabasha gufungura igitabo na kimwe cyo muri Bibiliya batabanje gushakira mu ishakiro. Yego, ndabizi ko ugomba kugira aho utangirira, ariko ntukwiye kuhahera!

Ubuzima ni umwuka kandi n’Ijambo ry’Imana ni umwuka (Yohana 6:63). Nzi ko abantu bamwe bakunda gusoma, birashoboka rero ko umuntu yasoma Bibiliya agahera ku itangiriro kugeza ku Byahishuwe ariko ntagire icyo akuramo na gito. Ntabwo wasoma Bibiliya nk’uko usoma ikinyamakuru cyangwa igitabo cy’amateka. Umwuka Wera agomba kuba muri uko kwiga kwawe niba ushaka ko bigira icyo bikora ku buzima bwawe gifatika. Bibiliya irenze kuba igitabo cyakusanyirijwemo inkuru, Bibiliya ni ihishurirwa!

Nkunda kwiga Bibiliya yanjye! Uko ndushaho kwiga, ni ko ndushaho kubona ko ibyo nzi ari bicye cyane maze bikantera kurushaho gushaka kumenya. Yesu yaravuze ati “Murondora mu Byanditswe…” (Yohana 5:39) Kandi Pawulo yavuze ko tugomba kwiga Ijambo. Iga kumenya Imana uyu munsi binyuze mu Ijambo Ryayo.

Isengesho

Data mwiza uri mu ijuru, mfunguriye umutima wanjye umurimo w’Ijambo ryawe uyu munsi, uzuza umutima wanjye umwuka w’ubwenge no guhishurirwa mu kukumenya, uko mpoza intumbero yanjye mu maso hawe heza, reka iteka mbone ibikorwa by’urukundo rwawe bihebuje kubw’Umwuka Wawe. Mu izina rya Yesu! Amen!

Source: “Urusobe rw’Ibiriho” Igitabo cyanditswe na pastor Chris na Anitha

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?