Itoze gukora ngo utange

Kwamamaza

agakiza

Itoze gukora ngo utange


Yanditswe na: Ubwanditsi     2021-08-02 03:14:57


Itoze gukora ngo utange

Uwibaga ntakongere kwiba, ahubwo akore imirimo akoresheje amaboko ibyiza, kugira ngo abone ibyo gufasha umukene (Abefeso 4:28).

Ugomba gushyira mu bikorwa ushyizeho umutima ihame ry’Imana ku birebana n’akazi. Abantu benshi babona akazi kabo nk’isoko yo gutera imbere kwabo. Ibi bihabanye rwose n’igitekerezo cy’Imana. Mu Befeso 4:28, Intumwa Pawulo yatweretse impamvu yo gukora: ni ukugira ngo tubone ibyo gutanga. Ni uko uyu mwaka wibwire uti “Sinzabeshwaho n’umushahara wanjye”. Impinduka zitangirana n’iyi nteruro uvuga.

Intumwa Pawulo avuga ati “Nababereye icyitegererezo muri byose, yuko ari ko namwe mukwiriye gukora imirimo ngo mubone uko mufasha abadakomeye, no kwibuka amagambo Umwami Yesu yavuze ati ‘Gutanga guhesha umugisha kuruta guhabwa”. (Ibyakozwe 20:35). Nanone aratwereka imitekerereze tugomba kugira nk’abana b’Imana.

Ako kazi ufite ni amahirwe yo kugira ngo ugire amafaranga yo gutanga. Hariho uwaba ari kubaza ati “Pasiteri Chris, umushahara wanjye nta nubwo umpagije jye jyenyine, ubwo se nabaho nte ngize icyo ntangaho?”. Ahubwo rero iyo ni yo mpamvu ugomba kuwubiba kugira ngo ubone umusaruro.

Bibiliya iravuga iti ntukarushywe no gushaka ubutunzi, ihebere bwa bwenge bwawe (Imigani 23:4). Umwami aratubwira ko ubwenge bwe wahawe ari bwo buzagukiza! Kurushywa no gushaka ubutunzi ngo umuntu abe umukire ni ubwenge bwa muntu, kandi buratsindwa.

Uyu mwaka, itoze gukora ngo utange. Ufite amahirwe menshi imbere yawe cyangwa se mu buryo bwagutse kurushaho yo gufasha abandi mu murimo wacu. Nubona inyungu yawe, jya uhita utekereza imiyoboro watangamo.

Iyi ni yo mitekerereze y’iterambere Imana ishaka kugushyiramo kandi nta kabuza hari umugisha ku muntu utanga. Iyo ukoze utyo, uba ubwira Imana uti “Uri isoko yanjye” kandi ubwenge bwayo, ari bwo Jambo ryayo, buzafungura amaso yawe abone ubutunzi butabarika n’umurage wawe muri Kristo.

Ijambo ryo kwatura

Ntabwo ndushywa no gushaka ubutunzi ngo nkire, ahubwo nkorera ku ihame ry’Imana ryo gukora. Uko nkoze ibyo, ndaguka mu gutanga kwanjye kandi mbasha gukora ibirenzeho ngo mfashe abandi. Mabaho mu iterambere, kure birenze umushahara mpembwa, mu izina rya Yesu. Amen!

Source: “Urusobe rw’Ibiriho” Igitabo cyanditswe na pastor Chris na Anitha

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?