Irinde umwuka wa Yezebeli uri gukorera mu(...)

Kwamamaza

agakiza

Irinde umwuka wa Yezebeli uri gukorera mu matorero


Yanditswe na: Ubwanditsi     2021-05-04 10:23:24


Irinde umwuka wa Yezebeli uri gukorera mu matorero

Bibibiliya yerekana ko Yezebeli yari umugore wa Ahabu umwami wa Israel akaba yaramushatse bitari mu mugambi w’Imana kuko byari ikizira ko umwisirayeli arongora umunyamahanga, ari na byo byakururiye akaga gakomeye ubu bwoko kuko yazanye ibigirwamana ndetse n’umwuka w’ubusambanyi.

“Wandikire marayika w’Itorero ry’i Tuwatira uti “Umwana w’Imana, ufite amaso asa n’ibirimi by’umuriro n’ibirenge bye bigasa n’umuringa w’umuteke aravuga aya magambo ati 19‘Nzi imirimo yawe n’urukundo rwawe no kwizera kwawe, no kugabura kwawe no kwihangana kwawe, n’uburyo imirimo yawe ya nyuma iruta iya mbere kuba myinshi. 20Nyamara mfite icyo nkugaya, kuko ukundira urya mugore Yezebeli wiyita umuhanuzikazi akigisha imbata zanjye, akaziyobya kugira ngo zisambane kandi zirye intonōrano. 21Icyakora namuhaye uburyo bwo kwihana, ariko ntiyashaka kwihana ubusambanyi bwe’’ Ibyahishuwe 2:18-21

Ibintu 11 biranga umwuka wa Yezebeli uri gukorera mu matorero

1. umwuka wa Yezebeli utera urujijo (confusion)

Yezebeli amaze kuzana imana ze habayeho propaganda mu bisirayeli ivuga ko Imana zo kwa Yezebeli zitanga imvura, umwero, iyo uyirakaje umuriro uva mu kanwa kayo ukakwica, iyo ivuze bimera nko guhinda kw’inkuba. Mubyukuri ni umwuka w’urujijo kuko abatambyi na bo bageze aho bavangirwa umunsi umwe bakaba bagiye mu rusengero kuramya Imana ikindi gihe bakajya gutambirira imana zo kwa Yezebeli.

Muri iki gihe kuvuga ko usenga bisa nk’aho ari ibisanzwe kuko bazi ko hari abantu bitwa ko basenga bitwara nabi, nyamara urufatiro rw’Imana ruracyahari rwanditseho ngo Uwiteka azi abe kandi uvuga izina ry’Uwiteka ave mu bidatunganye.

2.Gucikamo ibice

Igihe Yezebeli yatangiraga kwimika izi mana abisirayeli bacitsemo ibice abahanuzi bamwe bihisha mu buvumo. Muri iki gihe ukijijwe asa n’aho abikora ku giti cye bigaragaza ko abantu bagenda bacikamo ibice.

3. Ukwiheba, ubwoba cyangwa gucika intege

Muribuka ko Eliya nyuma yo kwica abahanuzi ba baari n’aba ashela 850, Yezebeli amubwiye ko amwica, Eliya yahunze akisabira gupfa? Hari igihe kibaho abantu bakayoborwa n’umwuka w’ubwihebe mu buzima. Tugeze mu gihe abantu benshi biyahahura kubera ibyo banyuzemo bikomeye ariko ntiwigirire nabi Imana iracyagukunda kandi izagufasha.

4. umwuka wo kwikunda

Mwibuke ko Ahabu na Yezebeli bariganije Naboti uruzabibu rwe. Hari igihe umuntu yikunda akumva ibintu byose ari we byajyaho, ukabona umuntu yarunze ubutunzi abandi baburara, badafite icyo bambara we yambara ibirenze ibikenewe. Ikibabaje ni uko no mu itorero birimo.

5. umwuka utegeka

Yezebeli ashaka kugenzura no kuyobora ikintu cyose, afite umwuka utsikamira abantu. Mwibuke ko yajyaga mu bahanuzi biyiriza ubusa akabikora, mbese ibintu byose yabaga abirimo. Umwuka wa Yezebeli ni umwuka mubi ukorera mu bantu batamenye Imana cyangwa se bayimenye bifuza kuyobora ibintu mu buryo butari ubw’ubumana.

6.umwuka w’ubusambanyi

Aha turavuga ubusambanyi hagati y’umugabo n’umugore, ubutinganyi, ubuyobe ikindi tuba tuvuze gusenga ibigirwamana, ibi byose Bibiliya ibyita ubusambanyi. Muri iki gihe gusambana bizafatwa nk’ikintu gisanzwe kuko ubusambanyi burenze uko umuntu wese yabutekereza bwahindutse ishoramari rikomeye. Ikibabaje ni uko muri iki gihe amatorero acecetse adashaka kugira icyo abivugaho.

7. Ahantu hari umwuka wa Yezeberi ubumwe ntibushoka: Yezebeli ntatuma abantu baba umwe yaje gucamo Isirayeli ibice.

8. Kuramya izindi mana

Mwibuke ko Yezebeli ataza wenyine ahubwo azana n’izindi mana. Hari igihe abantu babifata nk’ibisanzwe ariko Imana yanga ko uramya izindi mana. Mu mategeko 10Yaravuze ngo ntimukagire izindi mana mu maso yanjye. Muri iki gihe hari ibindi abantu baramya bitari Imana aho umuntu abona akazi agasambaniye, aho umuntu aba azi ko yubatse inzu ariko mu buriganya n’ibindi. Ukundishe Uwiteka umutima wose,ubwenge bwose n’imbaraga zose.

9. Ni umwuka wica

Uyu mwuka wa Yezebeli wishe Naboti umaraho abantu b’Imana. Iyo hari uyu mwuka habaho impfu mu buryo budasanzwe haba impanuka n’ibyago bitandukanye.

10. Makiyaje (maquillage)

Nimureba kuri google muzabona ko makiyaje yazanywe na Yezebeli. Iyo tuvuze makiyaje harimo gutakaza uwo uri we (identity) ujye wibaza uti naremewe iki? Ni iki Imana ishaka ko nkora? Ni izihe mpano zanjye? Ni uwuhe muhamagaro wanjye. Uyu mwuka wa Yezebeli ni umwuka wo gutakaza ubumuntu aho abantu badashaka kuba abo ari bo.

11. Umwuka wa sedisiyo (sedition)

Itorero aho kugira ngo ribwize abantu ukuri ko guhinduka no gukizwa no kuba umwana w’Imana ahubwo ugasanga babwirwa ibyiza gusa kugira ngo bature hagamijwe amfaranga kuruta kuzana imitima kuri Kristo.Uyu mwuka wa sedition ni umwuka mubi umeze nk’uw’uburaya aho abantu bagerageza gukora ibintu bisa nk’aho ari ukureshya abantu gusa ariko badashaka kubageza kuri Kristo. Yesu icyamuzanye ni ukumaraho imirimo y’umwijima no kugira ngo abantu bababarirwe ibyaha. Mubyukuri yazanywe no gushaka no gukiza icyazimiye no kuduha ubugingo buhoraho.

Muri macye birakwiye kwisuzuma ukareba neza niba utarigeze ufatwa n’umwuka wa Yezebeli uri gukorera mu matorero. Uramutse warateshutse ukayoba, ntiwicireho iteka kuko Imana yiteguye kukubabarira wowe tera intambwe yo kwihana wiyunge n’Imana. Mu gice gikurikira tuzareba ibintu biranga umuntu utsikamiwe n’umwuka wa Yezebeli.

Video y’iyi nyigisho wayisanga hano:

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?