Intambwe 10 mu gutera imbere mu Mana, mu(...)

Kwamamaza

agakiza

Intambwe 10 mu gutera imbere mu Mana, mu buzima busanzwe no mu kwiyubaka


Yanditswe na: Ubwanditsi     2021-01-15 08:26:21


Intambwe 10 mu gutera imbere mu Mana, mu buzima busanzwe no mu kwiyubaka

Imyitwarire y’umuntu n’imigenzereze ye ni kimwe mu bimufasha kugena ahazaza he. Uko umuntu yitwara nabi ni nako aba ashyira mu kaga ubuzima bwe, mu gihe nyamara imyitwarire myiza y’umuntu imusunikira ku mahirwe, imigisha no kugera ku byiza mu buzima bwe.

Kwiyubakamo ubumuntu no kwiyumvamo ubushobozi ni intambwe nziza ifasha umuntu kugera ku ntego ze mu buzima.

Dore inama 10 zagufasha kwiyubakamo ubumuntu no gutera imbere vuba.

1. Igihe urakaye ntukihutire gufata icyemezo kuko uyobowe n’uburakari, kwiyobora aheza biramugora.

2. Igihe ujijinganya utabona neza icyo gukora aho guhuzagurika shaka akanya ko gutuza no kwitaza abandi, utekereze neza ubone igisubizo.

3. Igihe ubukene buguteye umuntu runaka akakuguriza amafaranga, jya uzirikana kumwishyura kandi umwishyurire igihe kuko ari ejo ari ejobundi uzongera umukenere. Zirikana ko burya ibibazo ni ibihoraho wihemurwa n’ikibazo kizagaruka.

4. Nutera umukobwa inda, ntuziyumvishe ko umuteye inda gusa ahubwo uzumve ko wowe nawe mwatangiye urugendo rwo kuzana umuntu mushya kuri iyi si. Aho guhunga no kwihakana uwo wabeshyaga urukundo, shikama nk’umugabo kandi wikureho umugayo wo kuzagira umwana ukugaya.

Iyo wirengagije ibyo uba ugeretse icyaha ku kindi ariko nubikora bizagusunikira ku ntambwe ya kabiri yo gusaba Imana imbabazi no kwihana ubuzima bukomeze.

Kimwe nawe mukobwa watwaye iyo nda, nyuma yo kubyara ubuzima buzakomeza.

Yego waguye mu cyaha cy’ubusambanyi ariko ntukwiye kugerekaho ikindi cyo kwica uwo muziranenge, cyangwa ngo umujugunye. Birahagije ibyo wakoze ariko Uwiteka yiteguye kukugirira imbabazi numucira bugufi.

5. Abakunegura bose si ko baba bakubeshyera, burya umuntu uzavuga intege nkeya zawe, aho gushwana nawe uzagerageze kuba mwiza kurushaho. Hanyuma nurangiza mu ibanga rikomeye umusabe ko ikibi akubonyeho ajya akikubwira mu ibanga ugikosore ataguteje rubanda.

6. Burya twese tuzapfa kandi tubitinya kimwe. Ubabaye wese ubishoboye uzamufashe kandi intwari mu gukunda mugenzi wayo isumba intwari ijana mu kurasana.

7. Icyo ushoboye uzagikore kandi ugikunze cyane cyane impano yawe uzirikane kuyikoresha uko bikwiriye.

8. Ntabwo amafaranga akemura ibibazo byose mu buzima, bityo rero uzirinde guhemuka kubera yo.

9. Kuba wowe ni wowe wa mbere bifitiye akamaro. Igihe ushaka kwisuzugura nta muntu uzakubaha kandi nutagaragaza akamaro kawe kuri iyi si, abandi bazaheraho bakuzimanganya.

10. Ufite impano n’ubwenge bihagije kugira ngo ntiwicwe n’inzara kuri iyi si.
Igihe utabona aho kwerekeza, pfukama hasi usenge Imana niyo rumuri rumurikira abatazigera bayoba.

Wareba n’iyi nyigisho: Ibintu 9 wakora kugira ngo ugire ububyutse || Ikiganiro hamwe na Pastor Desire H.

Source: urugero.rw

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?