Imfunguzo ebyiri z’urushako rutajegajega

Imiryango hafi ya yose ikora ubukwe yishimye ndetse yuzuye ibyiringiro n’inzozi z’ubuzima bwiza bw’ejo hazaza. Ariko inzira y’urushako rushimishishe ntiyoroshye. Ukurikije ibigaragazwa n’ibarurishamibare rigaragaza ko abenshi batarangiza urugendo rwabo kuko ubutane bukomeza kwiyongera umunsi ku wundi.

Ingo nyinshi zirasenyuka aho usanga umwe adaha mugenzi we bashakanye umwanya uhagije ngo babane hamwe bityo ugasanga intego bihaye yo kubana akaramata itagezweho.

Hari ibitabo byinshi, inkuru nyinshi n’imbwirwaruhame zitandukanye zigisha abantu kunoza umubano wabo. Ariko mu by’ukuri guhana umwanya, kubabarira no kunoza ibiganiro nibyo byubaka urushako runejeje. Ibi bintu iyo bibuze haba ibibazo bikomeye mu rushako ku buryo nta kindi kintu gishobora guturuka hanze ngo kibikemure.

Twifashishije ibyanditswe byera, aho umuntu umwe w’impuguke mu mategeko yagerageje Yesu amubaza ati: “mwigisha ni irihe tegeko risumba ayandi?”

Yesu yaramusubije ati: ukunde Imana yawe n’umutima wawe wose, n’ubwenge bwawe bwose” iri niryo tegekorya mbere rikomeye gusumba ayandi. Irya kabiri ni iri: “ ukunde mugenzi wawe nk’uko wikunda.” (Matayo: 22:35-40)

Ikigara ni uko ibibazo bibangamira urushako bituruka mu kutubahiriza aya mategeko yombi.iyo twibanze ku gushaka kwacu tukirengagiza ugushaka kw’Imana no gushaka k’uwo twashakanye byanga bikunze bitera ibibazo bikomeye.

Turebye ibibazo byo kutanoza ibiganiro mu rushako, umuntu yakwibaza ibi bibazo bikurikira: ese ni kangahe ntega amatwi nkumva icyo umufasha wanjye cyangwa (Imana) ambwira? Ese ni kangahe mushyira imbere y’Imana nkamusengera ndetse ngashima Imana ku bw’imibanire yacu? Ni gute nasengana n’umufasha wanjye tukabaza Imana uko tugomba gukoresha igihe cyacu?

Uko utangira kwibaza ibi bibazo byose bituma ubishakira ibisubizo bityo abashakanye bafata umwanzuro uhamye wo kubaka neza kandi bihuye no gushaka kw’Imana. Niho usanga ibiganiro bitangiye kugenda neza, umubabaro ugatangira guhunga, ugasanga abashakanye bakeneye kumara igihe kinini bari kumwe n’ibindi.

Ibi byose ntimwabyuka ngo musange byikoze ijoro rimwe ahubwo kubaka ni uguhozaho. Urushako rwanyu ntiruzabura guhura n’ibisitaza byinshi harimo ibibazo by’ubukungu, ibibaazo by’abana n’ibindi byatuma abantu bata umutwe. ariko ikintu cy’ingenzi ni ugushyira urushako rwanyu mu maboko y’Imana kandi ukubahiriza amategeko abiri twabonye haruguru.

Muri macye urushako ruranezeza ndetse urugo rwiza ni ijuru rito, niyo mpamvu abashakanye bakwiye kwita ku kintu cyabahuje aho kwita ku gishobora kubatandukanya. Nibigenda bityo, gatanya zizashira maze abantu bimike urukundo mu ngo zabo ndetse n’ababakomokaho bazakurane ingeso nziza bityo bubake imiryango yabo, itorero ndetse n’igihugu muri rusange.

Vestine agakiza.org