Imbaraga zizazamura itorero-Pst Desire(...)

Kwamamaza

agakiza

Imbaraga zizazamura itorero-Pst Desire Habyarimana


Yanditswe na: Ubwanditsi     2021-10-06 07:29:51


Imbaraga zizazamura itorero-Pst Desire Habyarimana

"Erega ubutumwa bwiza ntibunkoza isoni: kuko ari imbaraga y’Imana ihesha uwizera wese gukizwa, uhereye ku Muyuda ukageza ku Mugiriki" Abaroma 1:16

Imbaraga umuntu yakira iyo amaze kwakira ubutumwa bwiza, bwa mbere ni imbaraga zihesha uwizera wese gukizwa, imbaraga za kabiri ni imbaraga zihesha uwizera wese kwezwa. Imbaraga za gatatu ni izaha abantu gukorera Imana, imbaraga z’uburyo bwa kane tugiye kuvugaho ni izizamura itorero.

Iyo tuvuze itorero, ntuhite wumva aho uteranire. Iriya ni imiryango ya gikristo turererwamo ariko itorero rya Kristo rizwi n’Imana. Ntabwo rigaragara n’amaso, rimwe na rimwe hari igihe abashumba bakabya bakavuga ngo iri ni ryo torero, utarisengeramo ntabwo azajya mu i Juru. Ariko ni ukwishuka gukomeye, itorero rya Kristo riri mu ibanga, icyakora hari abanyamatorero cyangwa abanyamadini bari mu itorero ry’Imana ariko ushobora kuba mu idini ariko utari mu itorero rya Kristo Yesu.

Yesu azaza gutwara itorero, aha nagira ngo mbibutse ko nta kintu kizabuza Yesu kugaruka. Imishinga yawe ntizabuza Yesu kugaruka, nubwo waba usigaje icyumweru kimwe ngo urongore/urongorwe, ntibizabuza Yesu kugaruka, umushahara wawe wageze kuri konte ntibizabuza Yesu kugaruka.

Nk’uko byari bimeze mu minsi ya Nowa ninako bizagenda mu kugaruka k’Umwana w’umuntu: Bararongoraga, bararongorwaga. Bubakaga amazu bakora ibintu byose, umwuzure urabatungura! No kuza kwa Yesu ni ko bizamera yarabivuze.

Bazaba bazamura amayetaje, amato azaba ari mu nyanja, imodoka zizaba zigenda mu muhanda, hamwe hazaba ari kumanywa ahandi ari nijoro. Ubuzima buzaba bukomeje ku isi bamwe bazaba bacuruza, abandi bazaba bajya kurangura, hari n’abazaba barimo gukora ibyaha uwo mwanya, gahunda zikomeje hose ku isi, impanda ivuge abera bazamuke. Izo mbaraga zizamura itorero ni imbaraga zidasanzwe, ni imbaraga zahinduye umuntu akaba afite ubusabane na Kristo Yesu hanyuma zizamure itorero.

Nagira ngo mbibutse ko hari imbaraga z’isi zigerageza gutsikamira abantu b’Imana, na Danyeri yarabivuze ngo’ Mu gihe cy’imperuka imbaraga z’abera zizamenagurwa’. Tugeze mu gihe imbaraga z’abera zirimo ziramenagurwa ku buryo ushobora gushaka umukiranutsi bukarinda bwira utaramubona! Kugira ngo ubone umuntu wera imbuto z’umwuka, kugira ngo umubone bigeze igihe bikomeye bitewe n’uko abantu benshi ari abaherekeza b’umugeni batari abageni.

Murabizi ko ubukwe butahwa n’abantu 2000 umugeni ari umwe, iyo bageze mu rugo Pale na Malene bose barataha hagasigara umukwe n’umugeni gusa. Abantu benshi ni abaherekeza b’abandi: None se niba korari irimo abantu 100 abageni ari batanu mu tekereza ko bazivugiriza gitari bakanaririmba? Ntabwo bishoboka!

Abantu benshi ni abaherekeza b’abandi, bararimba umugeni akezwa ariko umugeni ari mu ibanga mu buryo butagaragara. Icyakora ni uburenganzira bwawe kuva mu baherekeza ukajya mu bageni, amahitamo Imana yagusigiye uyakoresheje neza wava mu baherekeza ukajya mu bageni ubiheshejwe n’imbaraga z’Imana.

Pasiteri Desire Habyarimana mu kiganiro ’Ubutumwa bukiza’ kuri Agakiza Tv, reba hano iyi nyigisho yose: Imbaraga z’uburyo 4 zizanwa n’ubutumwa bwiza iyo bugeze mu muntu // Pastor Desire H.

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?