Icyo ubiba nicyo uzasarura! Sobanukirwa ihame(...)

Kwamamaza

agakiza

Icyo ubiba nicyo uzasarura! Sobanukirwa ihame ry’ibiba n’isarura


Yanditswe na: Ubwanditsi     2021-05-10 08:12:33


Icyo ubiba nicyo uzasarura! Sobanukirwa ihame ry’ibiba n’isarura

Ntimuyobe: Imana ntinegurizwa izuru, kuko ibyo umuntu abiba ari byo azasarura. Ubibira umubiri we muri uwo mubiri azasaruramo kubora, ariko ubibira Umwuka muri uwo Mwuka azasaruramo ubugingo buhoraho. Abagalatiya 6:7

Isi, iyobowe n’amahame. Muri Bibiliya amahame ni menshi ariko uyu munsi tugiye kugaruka ku ihame ryo kubiba no gusarura. Ikintu kitwa ihame nta muntu n’umwe ku isi wagihindura, niba Imana yarashyizeho ko bwira bukongera bugacya, nta muntu wavuga ngo kubera nkomeye, kubera amafaranga ntunze, kubera intwaro mbitse, ndategetse ntabwo buri bwire, ntabwo bibaho. Nta n’uwavuga ngo birakomeza kuba nijoro ntiburi buke, ntabwo bibaho ni ihame Imana yashyizeho.

Niba Imana yarashyizeho ihame ryo gutwita ukabyara, ni ihame utahindura. Ku ihame ryo kubiba no gusarura, icyambere usarura ibisa n’ibyo wabibye, ntabwo umuntu yasarura ibitoki ku mapera cyangwa se ngo asarure ipapayi kuri avoka, nubwo bijya gusa ntabwo ari bimwe. Umuntu asarura ibisa n’ibyo yabibye: Iyo wabibye ibigori, uzasarura ibigori, iyo wabibye ibishyimbo uzasarura ibishyimbo, umuntu asarura ibisa n’ibyo yabibye.

Icyakabiri, ni uko usarura ibiruta ibyo wabibye. Murabizi ko umuntu atera akabuto kamwe k’ikigori, kikazaheka bitatu kandi wabara ibigori biriho ukabona ni byinshi kuruta kimwe yabibye. Ubuzima bwose Imana yabugize imbuto, iyo ukoze icyaha uba ubibye imbuto kandi uzasarura isa n’ibyo wabibye kandi yikubye inshuro nyinshi y’ibyo wabibye.

Hari abantu babaho mu buzima bwo kubiba bakumva ari ntacyo bitwaye, Bibiliya igaragaza ko ubibira mu mubiri azasarura kubora. Hari ubwo abantu babho(kandi bakijijwe), akabaho abibira mu mubiri gusa: Akabyuka akajya mu kazi, agahembwa, wikendi akajya muri siporo, hanyuma gusenga ntabigirire umwanya cyane.

Agasenga amasaha abiri ku cyumweru gusa nabwo agasenga arwana na Watsapu n’izinda social media, yataha akaryama cyangwa se akajya gutembera hamwe n’abandi, agakora ibintu bigaruka ku mubiri gusa bidafite aho bihuriye n’Ubwami bw’Imana. Akajya akubwira ko afite akazi kenshi yabuze umwanya wo gusoma Bibiliya, yabuze akanya ko gusenga, arahuze ariko ibyo akora ni ibigaruka ku mubiri gusa.

Ubibira mu mubiri azasarura kubora! Hari abandi bahitamo agafata ubuzima bwe akabujyana mu nzoga, mu busambayi, ubuzima bw’ikinyoma: Kubeshya, kwambura, kuriganya( hari abanyabyaha babigize umwuga ukabona ari ko kazi akaora, abibira mu mubiri gusa). Nagira ngo nkwibutse ko nta muntu numwe uzava mu isi adasaruye ibyo yabibye, igisigaye ni ukwibaza ngo nusarura ibiruta ibyo wabibye, uzishima? Iyo ubiba uba wumva ari ibisanzwe, ariko ibizava mu kubiba kwawe ntuba ubizineza.

Abantu benshi bagiye babiba imbuto zitari nziza, akinezeza akumva ntacyo bimubwiye urugero: Hari ubwo umupapa agirana amakimbirane n’umugore we, rimwe akamukubita cyangwa se ukabona afitanye amakimbirane n’abagize umuryango. Nagira ngo nkubwire ko wubatse igisekuru cyubakiye ku bikomere bizaba uruhererekane. Ntawe utanga icyo atahawe: Umwana wawe nawe azagirana amakimbirane n’abagize umuryango, abo azabyara nabo bazagirana amakimbirane n’abo azabyara, imiryango myinshi ifitanye amakimbirane ni uko byatangiye.

Hari imbuto bababibyemo itari nziza, ntibamenya ko barimo kuzana ibyuho mu mitima yabo babyaye. Uzarebe nk’imiryango ikunda kwiyahura, biba ari uruhererekane aho usanga muri bene uwo muryango biborohera kwiyahura. Cyangwa se umuryango w’abantu basambana, bikaba bizwi ko muri uwo muryango abakobwa babyarira iwabo, bizwi ko abahungu babo kugira ngo ashake bizwi ko aba yarabyariye umwana hanze.

Bikaba bizwi ko uwo muryango ukunda amafaranga, bikaba bizwi ko uwo muryango ari abibone. Mutekereza ko biba byaratangiye bite? Ni imbuto iba yaragiye ibibwa, hanyuma ikazakomeza kugwira, bikazagera igihe mu muryango bikaba ari uko bimeze. Imana ntinegurizwa izuru, icyo umuntu abiba nicyo azasarura. Ibintu byose ubiba ntubyite ibyoroheje, yego uyu munsi uri muto ushobora kuba uvuga uti ‘ Ntakundi umubiri urandya, reka nezeze irari rya kamere yego birumvikana ariko umunsi wasaruye nibwo uzatangira kubabara.

Nagiye mbona abamama (yewe na babandi bicuruza), umwana yabyaye iyo atangiye gukina imikino igana ku mibonanompuzabitsina, biramubabaza bikamushengura umutima kuko imbuto yabibye atangiye kuyisarura. Ariko mubyukuri uwo mwana ntafite amahitamo, ni umusaruro w’imbuto yabibwe.

Dawidi yasambanyije umugore w’umwe mu basirikare bamubaga hafi, hashize iminsi umuhugnu we (Amunoni) afata kungufu mushiki we( Tamali). Mutekereze abana wabyaye mu nda umwe afashe ku ngufu mugenzi we! Dawidi Imana yamubwiye ko akoze icyaha gikomeye kandi ko inkota itazava mu rugo rwe, nyuma y’ibihano yatangiye gusarura aho yabibye. Mwibuke ko Salomo yarongoye abagore igihumbi n’umwe kubera umuvumo wa Se.

Murumva ko kurongora abagore 1001, wari umusaruro uhagije kuruta ibyo Dawidi yabibye. Mwibuke ko hari igihe umuhungu we (Abusalomo) yamwigometseho, baramubwira ngo kugira ngo wemeze so umwereke ko ntaho mugihuriye, ugende uryamana n’abagore ba so ku gasozi. Iyo umuntu abiba aba azi ko ari ibisanzwe, ariko umusaruro uba ubababje

Amaraso ahamagara andi maraso, uburiganya buhamagara ubundi buriganya, ubwambuzi buhamagara ubundi bwambuzi, ibyo wabonye ubyibye bazabigutwara babyibye kandi wowe bazabikuba inshuro nyinshi. Ibyo wabonye uriganyije nabyo bizakugiraho ingaruka, ibyo wagezeho umennye amaraso, ayawe nayo azameneka( kuko Yesu yabwiye Petero ngo rekeraho kuko uwicisha inkota, nawe azicishwa inkota).

Hari igihe umuntu akora ibyaha akajya yumva ari ibintu bisanzwe, ariko umusaruro bizaba ari ibintu bibabaje cyane kuko usarura ibiruta ibyo wabibye kandi bisa n’ibyo wabibye. Niba utanga amafaranga nawe uzayahabwa, niba ugira ubuntu Imana izakugirira ubuntu, niba wihangana nawe bazakwihanganira, niba usengera abandi nawe bazagusengera. Imbuto yose ubiba niyo uzasarura, icyo umuntu abiba nicyo azasarura. Niyo mpamvu ihame ryo kubabarira ari ngombwa, iyo bakugiriye nabi ni byiza kwiga kubabarira.

Hari abantu babibira mu Bwami bw’Imana

Akavuga ati: “Reka ndenge ibyifuzwa na Kamere n’ibyo kamere irarikira, nige kubibira mu Bwami bw’Imana”. Yesu yagiye atugaragariza uburyo bwiza bwo kubibira mu Bwami bw’Imana, icyambere ni ukwitanga wowe ubwawe ugahinduka imbuto nziza. Bibiliya iravuga ngo "Nuko bene Data, ndabinginga ku bw’imbabazi z’Imana ngo mutange imibiri yanyu, ibe ibitambo bizima byera bishimwa n’Imana, ari ko kuyikorera kwanyu gukwiriye. Abaroma 12:1

Indirimbo turirimba n’ibyo twigisha sibyo bihindura abantu, ni Umwuka ubiherekeje. Uwo uriwe inyuma niba waremeye kuba imbuto nziza ukajya mu butaka bwiza mu Bwami bw’Imana, iyo mbuto izasarurwa ari nziza. Kandi nimba utari imbuto nziza, disikuru( Discour) nziza abapasiteri bavuga n’indirimbo nziza abaririmbyi baririmba ntacyo byazakumarira.

Hari abantu bazi kuvuga discour nziza, ariko idashobora kuzana impinduka mubo bayibwira kuko we ubwe ntarahinduka imbuto nziza. Ntashobora kubiba imbuto nziza mu bandi ngo bazayisarure. Hakenewe kubanza kwibaza ngo, mbere yo kubiba mu butaka bwiza( mu Bwami bw’Imana), njyewe ndi imbuto imeze ite?

“Imana ntinegurizwa izuru, icyo umuntu abiba nicyo umuntu azasarura”

Dufatanye gutekereza, uramutse usaruye ibingana n’ibyo ubiba waba wishimye? Gusarura byo nta mahitamo kuko uzasarura, ahubwo ikbazo, uramutse usarura ibisa n’ibyo wabibye kandi ukabisarura bikubye inshuro nyinshi wakwishima? Niba utakwishima rero hagarikira aho kubiba imbuto mbi kuko niba uriganya abandi bazakuriganya, niba ubeshya abandi bazakubeshya, ibyo wagezeho uhemutse nawe ni uko bizagenda.

Ibyo aribyo byose inzu ubamo uzi imiryango aho yavuye, uzi igisenge aho cyavuye, uzi amakaro aho yavuye, imodoka ugendamo, buri kimwe cyose. Niba uzi ko ubiba imbuto mbi hagarikira aho, kandi niba warakijijwe ukaba ubibira mu mubiri hagarikira aho, utangire kwiga kubibira mu Bwami bw’Imana.

Iyi nyigisho yateguwe, ikanatambutswa na Pasiteri Desire Habyarimana kuri Agakiza Tv wayireba hano

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?