Ibintu ukora bikimura Imana mu muryango(...)

Kwamamaza

agakiza

Ibintu ukora bikimura Imana mu muryango wawe


Yanditswe na: Ubwanditsi     2021-05-24 06:53:09


Ibintu ukora bikimura Imana mu muryango wawe

Umurayango ni ingenzi kuko wabayeho biturutse ku bushake bw’Imana, ikindi kandi ni ho umwana abonera indangagaciro zose:Urukundo, gushira ubwoba bw’ejo hazaza, kumenya gufata ibyemezo ndetse ni ho yigira ururimi n’ibindi. Ni ukuvuga ngo ibintu byiza byose Imana yabishyize mu muryango ni ho Ikorera, ariko na Satani ashobora kuhakorera iyo ahawe urwaho.

Ni muri urwo rwego tugiye kurebera hamwe ibintu ushobora gukora bikaba intandaro yo kwimura Imana mu muryango.

1. Ubusambanyi

Iyo abantu basambana baba bumva ari ibintu bisanzwe binezeza, ariko baba binjije umuvumo uzafata ibisekuru byinshi. Mwibuke ko Dawidi yasambanye Imana ikamubwira ko ibintu akoze ari bibi bizamugiraho ingaruka zikomeye, ari bwo umuhungu we Amunoni yahise akinda Tamari mushiki we, nyuma yaho Abusalomo umuhungu we amwigomekaho arongora abagore ba se. Muribuka ko Salomo yashatse abagore 1001kubera gukurikiranwa n’uwo muvumo.

Aburahamu yashatse inshoreke none Israheli na Palestina n’Abarabu bicanye imyaka ibihumbi 4 kandi barapfa ko umwe ari uw’isezerano undi na we ari uw’inshoreke. Mubyukuri ubusambanyi ni icyaha kimura Imana mu muryango.

2. Kuraguza

Iyo abantu bagiye mu kuraguza bimura Imana kuko Imana iri hejuru nta yindi mana imeze nka Yo. Ni Imana dukwiriye kuramya yonyine, kandi Bibiliya iravuga ngo “Ntukagire izindi Mana mu maso yanjye”. Abantu benshi bagenda bimura Imana bakimika ibigirwamana kuko ikintu cyose umuntu akunda kurusha Imana cyangwa ikintu cyose wumva ko utabaho kidahari ni ikigirwamana. Imana ikwiye kuba iya mbere mu miryango yacu aho kwimika ibigirwamana.

3.Ubwibone

Ubwibone ni icyaha kibi cyakozwe mu ijuru nta kindi cyaha kirakorwa. Iki cyaha cyakozwe na Satani ari mu ijuru ariko Imana ntibyishimira, mwibuke ko Imana yatanze ibintu byose ariko icyubahiro cyayo irakigumana. Bibiliya iravuga ngo “Mwese mukenyere kwicisha bugufi kuko Imana irwanya abibone kandi abicisha bugufi Imana ikabaha ubuntu”.

Iyo umuntu agize ubwibone aba yimuye Imana cyangwa ashaka kwigereranya na Yo kuko ni Yo yubashywe mu isi no mu ijuru. Imana ishimwe kubw’imigisha yaguhaye ariko ibyo ntibigutere ubwibone kugeza ubwo wakwimura Imana ukimika ubwenge cyangwa icyubahiro ufite. Iyo twimuye Imana birayibabaza kuko yifuza kubahwa, kuba iya mbere kandi yifuza ko tuyiramya yo yonyine tudashyizeho izindi mana izo ari zo zose.

Bibiliy iravuga ngo “Dukwiye kuyiramya tudafite ubwibone dushimishijwe n’ibyo Imana yakoze”. Ibyiza ni ukureka Imana ikaba iya mbere mu buzima bwacu.

4. Kubeshya

Kubeshya ni icyaha abantu bakinisha bumva ko ari ibisanzwe bakumva babikoze ari ukwirengera cyangwa se ari ukwikinira, ariko bigira ingaruka zikomeye. Muribuka ko abantu bose bagiye babigerageza byabagizeho ingaruka zikomeye kandi bigafata ibisekuru byinshi, Aburahamu yabeshye ko Sara ari mushiki we hanyuma Isaka na we aza kubeshya ko Rebeka ari mushiki we. Ba Lewi bari bafashe mushiki we Dina ku ngufu barangije babeshya abantu ngo kugira ngo mwemere ko dushyingiranwa mureke babakebe nibarangiza bizaba byemewe ko dushyingiranwa, naho barashaka kubica bababeshya ikinyoma gikomeye babatera bakirwaye bameze nabi bica abantu benshi cyane.

Mwibuke ko Yakobo yabeshye akiba umugisha wa Esawu, si ibyo gusa ahubwo abahungu ba Yakobo na bo babeshye se ko inyamaswa y’inkazi yariye Yozefu umuhungu we kandi bamugurishije. Ni ukuvuga ngo umuvumo wo kubeshya wafashe ibisekuru bigera kuri 7.

Mubyukuri Yesu ni we nzira yo gukiranuka n’ubugingo, ikintu cyose kitari ukuri ntashobora kugishyigikira.

Umuntu wese mu bagize umuryango akwiriye gusaba Imana kumufasha kandi akemera kuyoborwa na Yo kugira ngo abashe kuzuza inshingano ze. Kugira ngo umuryango ubeho utekanye dukwiye kwamaganira kure ibyaha tumaze kurebera hamwe bityo ni bwo Uwiteka azatura muri twe.

Source:Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?