Ibintu 7 biteza Umwuka Wera agahinda-Pst(...)

Kwamamaza

agakiza

Ibintu 7 biteza Umwuka Wera agahinda-Pst Desire Habyarimana


Yanditswe na: Ubwanditsi     2021-11-03 08:38:38


Ibintu 7 biteza Umwuka Wera agahinda-Pst Desire Habyarimana

"Kandi ntimuteze agahinda Umwuka Wera w’Imana wabashyiriweho kuba ikimenyetso, kugeza ku munsi wo gucungurwa." Abefeso 4:30

BeneData bakundwa, twifuje kubamenyesha ibintu 7 muri byinshi biteza agahinda Umwuka Wera, bityo niba hari kimwe muri byo wibonaho ugire ugarukire Imana bikitwa none kuko ejo si ahacu. Ibintu biteza Umwuka Wera agahinda:

Kwanga imbabazi biteza Umwuka Wera agahinda

Umwuka Wera twamuhawe kugira ngo atweze, iyo wanze imbabazi uba uhisemo nabi. Amahitamo ni umutungo ntavogerwa, Satani ntiyinjiramo n’Imana ntiyinjiramo! Iyo uhisemo nabi bizakugiraho ingaruka, wahitamo byiza ni umugisha kuri wowe. Iyo wanze imbabazi, Umwuka Wera arababara akagira agahinda. Kandi hari abantu benshi bahisemo nabi, bahitamo kutakira imbabazi. Ese mwari muzi ko burya Dawidi yari umunyamakosa kurusha Sawuli? Ariko aho batandukaniraga, ni uko Sawuli we yari afite umutima utakira imbabazi, utanazishaka (Ni umutima ukomeye nk’ibuye), naho Dawidi we yari afite umutima wihana kandi ukunze imbabazi z’Imana.

Kwanga kwezwa biteza Umwuka Wera agahinda

Kwezwa ni umurimo ukorerwa mbere mu mutima, kadi niwo ubyara imbuto. Uyu murimo rero hari abantu bawukwepa! Ariko hari ubwo bigera igihe Umwuka Wera agakoresha ingufu, Bibiliya iravuga ngo ’Umuntu niyiyeza azaba abaye igikoresho cy’icyubahiro kigirira nyiracyo umumaro’. Kwezwa wabihisemo, hari igihe umuntu abyanga Imana ikazakoresha ingufu. Niwanga kwezwa ku neza, kuko Imana ikunda ubugingo bwawe kandi igushaka, izakweza ikoresheje umuriro (Ibigeragezo). Iyo umuntu yanze kwezwa Umwuka Wera agira agahinda.

Igihe harimo kwinjira umwuka w’ikinyoma biteza Umwuka Wera agahinda

Ndatanga urugero kuri Ananiya na Safira: Aba, baragiye barabyumvikana baragurisha bazana amaturo yabo bayahagejeje barapfa! Ese ko bari bagurishje kandi barahisemo kuza kubana n’abandi, buriya bishwe n’iki? Ni uko hari hinjiye umwuka w’ikinyoma! Iyo Petero yibeshya akakira ariya maturo akayavanga n’ayandi, minisiteri yari guhita irangirira aho, ntabwo byari kuzatugeraho.

Satani ntabwo azana ikinyoma ijana ku ijana, azana 95% bw’ukuri, akazana 5% by’ikinyoma kikazakuzengereza! Uzumve abantu bigisha ubuntu butangaje, barabuvuga bagera mo imbere bagahita babukatisha mu irari rya kamere: Bati ‘Ibyaha twakoze kera, ibyo dukora ubu, n’ibyo tuzakora byose byarababariwe!’ Ariko Bibiliya iravuga ngo ’Ubuntu bw’Imana butwgisha kureka gukora ibyaha n’irari ry’ibyisi, ahubwo tugasa na Kristo Yesu.’

Igihe abantu badakorera Imana biteza Umwuka Wera agahinda

Iyo abantu bananiwe gukorera Imana biteza Umwuka Wera agahinda, kimwe mu byo Imana yaturemeye harimo kuyikorera. None niba utabereyeho gukorera Imana ikindi ubereye ho ni iki? Bibiliya iravuga ngo” Hahirwa abapfa bapfiriye mu Mwami, imirimo igenda ibaherekeje”. Igihe cyose ibyo ibyawe ubirunda inaha [Ibyo wita ibyawe] biteza Umwuka Wera agahinda. Kandi inaha tuhamara imyaka ingahe se? Imyinshi ni ijana-mirongo inani! Aho tuzatura ni aho iteka ryose, none umara umwaka utazanye umuntu kuri Yesu Kristo, umara umwaka nta murimo ufite mu rusengero!

Nubona ubyutse mu gitondo ukabona urakangutse, uzamenye ko Imana ikongereye amahirwe yo gukorera Imana, kandi ejo Imana yahagize ibanga ntabwo twamenya ibizakurikiraho. Ibyo Imana yaguhaye irabishakamo inyungu binyuze m kuyikorera.

Kwanga ko ubushake bw’Imana buza mu buzima bwawe, biteza Umwuka Wera agahinda

Igihe utakira ubushake bw’Imana, ni igihe udashaka kubaho nk’uko Imana ishaka ugashaka kubaho wigenga, ntumenye impano y’ubuntu wahawe. Yesu bamweretse urusengero rwa Yerusalemu aho kugira ngo yishime ararira! Arangije avuga amagambo akomeye, Arababwira ati “Ntimureba ibi byose? Ndababwira ukuri yuko aha hatazasigara ibuye rigeretse ku rindi ritajugunywe hasi.”

“Ayii! Yerusalemu, Yerusalemu we, wica abahanuzi ugatera amabuye abagutumweho! Ni kangahe nashatse kubundikira abana bawe, nk’uko inkoko ibundikira imishwi yayo mu mababa yayo ntimunkundire?

Ntimwumva ko mbivuze mu magambo yoroheje? Ibyo, byatumye bamara imyaka 1800 baravuye ku ikarita y’isi!

Igihe utamenye igihe cyo kugendererwa, igihe utamenye ubuntu Imana iguhaye ngo ubwakire, ubugenderemo, ubukoreshe neza, ngo umenye ubushake bw’Imana kuri wowe, Satani aragusenya. Niba bavuze guterana, gerageze usenge igihe kiza kigihari, koresha igihe cyawe neza wakire imbaraga Imana itanga muri iki gihe, wemere imikorere y’Umwuka Wera mu buzima bwawe, bizagufasha none no mu gihe kizaza.

Igihe duhagaritse Ubwami bw’Imana gukora biteza Umwuka Wera agahinda

Mu isengesho rya Data wa twese, haravuga ngo Data wa twese uri mu I Juru, izina ryawe ryubahwe, Ubwami bwawe buze. Tubereyeho kwamamaza Ubwami bw’Imana, nicyo twaremewe. Iyo Imana imaze kukubyara ikakubera so, ukabaho ubuzima buyubaha, hakurikiraho kwamamaza Ubwami bwayo. Uzi inyota Imana ifite? Ni ukubona abasirikare buzuye Umwuka Wera bahagarariye Imana mu gisirikare!

Ni ukubona abacuruzi buzuye imbaraga z’Imana bari mu bucuruzi, ni ukubona abantu bari mu nzego zisanzwe zifata ibyemezo buzuye imbaraga z’Umwuka Wera. Ni ukuba umuhinzi, aho uhinga ukaba wuzuye imbaraga z’Umwuka Wera, ni uguturana n’abandi neza. Iyo ugeze ahantu, ntumenye icyo waremewe ngo uhagararire Ubwami bw’Imana neza, Umwuka Wera arababara kuko si cyo Imana yari igutegerejeho!

Umwuka wa Yezebeli uriho none, birateza Umwuka Wera agahinda

Ahabu, yakoze ikosa arongora umunyamahanga kazi. Yezebeli azana imana ze muri Isiraheli bahita bavangirwa. Iyo bashakaga kugusha imvura no guhinga bakeza, bajyaga gushaka imana zo kwa Yezebeli, bakwiza ibihuha ngo imana yo kwa Yezebeli iyo uyirakaje mu kanwa kayo havamo umurimo ukakwica, ngo iyo ivuze guhinda kwayo kuba nk’uko inkuba!’ Bikwira mu baturajye bose ba Isiraheli, biba nk’ukuri. Yezebeli yari mubi, kukigero yicisha Naboti barangije amasengesho y’iminsi itatu, umwuka usenga ukanica!

Mu itorero harimo kwinjira umwuka utari uw’Imana. Niba wizera Yesu kugira ngo ubone viza, ubone ibiryo, ibyo biraciriritse kuko Yesu yapfuye ngo dukire icyaha cyo kwa Adamu, ibindi ni inyongera. Ntabwo twubahira Imana ngo tubone amazu n’amamodoka, yaturemye kugira ngo dukore ubushake bw’Imana ni cyo yaturemeye, ibindi byose izabitwongerera.

Reba hano iyi nyigisho yose

Source: OMEGA CHURCH / Rwanda

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?