Ibintu 12 bikwiye kuranga uri mu ishuri ry’Imana, n’uko yabyitwaramo

“Nzi gucishwa bugufi nzi no kugira ibisaga, n’aho naba ndi hose n’uko naba ndi kose, nigishijwe uburyo bwo kwihanganira byose, ari uguhaga, ari ugusonza, ari ukugira ibisaga cyangwa gukena” Abafilipi 4:12

Bisa nkaho buri muntu wese ari mu ishuri ry’Imana, yaba umukire, umukene, uwize, utarize, ukomeye, uworoheje bose baca mu ishuri ry’Imana. Buri wese aca murye shuri ntabwo bose bigira hamwe, kandi ikibazo si ishuri ahubwo ikibazo ni uburyo umuntu y’itwara mu ishuri ry’Imana. Nta gihe runaka kizwi ishuri rizarangiriraho. Zimwe mu ngero nkeya z’amashuri abantu bacomo,: Hari uwigishwa n’urushako, n’umwana we, mu kazi, mu bukene, mu bukire, mu bupfakazi,… Nta ruhare umuntu agira ngo ahitemo ishuri, ahubwo ni Imana ihitamo ko umuntu yigishwa.

Mu butumwa bwiza bwa Yesu uko bwanditswe na Matayo 28:19-20, havuga misiyo Yesu yahaye intumwa “ Mugende muhindure abantu bo mu mahanga yose abigishwa” “ mubigisha kwitondera ibyo nababwiye byose”. Uko byagenda kose abantu bose bariga, nk’uko umwana avukira mu isi akajya mu isuri risanzwe, niko n’iyo umukristo akijijwe aba yemeye kuba umunyeshuri. Hanyuma se ni iyihe myitwarire ikwiye kuranga uri mu ishuri? kandi ni ibiki agomba kwitondera?

Ubwo yatambutsaga inyigisho ye kuri Agakiza Tv, Pasiteri Desire Habyarimana niwe wasobanuye ibi bintu 12 biranga ishuri ry’Imana.

Habaho kwiyandikisha mu ishuri

Igihe umuntu avutse, burya aba yiyandikishije mu ishuri ry’ibigeragezo, ishuri ry’ibibazo. Ukundi kwiyandikisha ni igihe umuntu aba yemeye kwakira Yesu nk’Umwami n’Umukiza w’ubugingo bwe. Aha umuntu aba yinjiye mu shuri ry’Imana nk’uko twabivuze haruguru muri Matayo 28 :19-20.

Kugira inyota yo kwiga ku bushake

Bijya bibaho ko umubyeyi ahatira umwana kujya kwiga ariko umwana atabishaka, cyangwa se atazi inyungu yo kwiga akaba yabikora atarumva neza impamvu yo kwiga. Kugira ngo umuntu yige mu buryo bwiza bisaba ko abanza guhinduka mu myumvire. Rero bikomerera cyane umuntu gutsinda ishuri ry’Imana iyo ataramenya Impamvu yo kwiga, no kuba yakwemera kwiga kubushake.

Gushaka ibikoresho by’ishuri

Bibiliya niyo twavuga kuko yanditswemo byose bishobora kwigisha uwo ariwe wese kandi mu rwego arimo, kuko nta kintu na kimwe Imana itavuze mu ijmbo ryayo. Ikibabaje rero ni uko usanga benshi bazi Bibiliya mu mutwe, aho kuyisanisha n’ubuzima babamo bwa buri munsi. Mu itorero rya mbere bo ngo bashishikariraga ibyo intumwa zigishaga, bagashyira umwete ku ijambo ry’Imana. Mu rwandiko intumwa Pawulo yandikiye Abakolosayi 3:16, haravuga ngo “Ijambo rya Kristo ribe muri mwe rigwiriye rifite ubwenge bwose…”. Dukwiye kwemera ko ijambo ry’Imana ari umucyo utumurikira mu nzira yacu ijya mu ijuru. Niyo mpamvu ari ingenzi gukora ibyo ridusaba, kandi tukarikunda kurushaho.

Gukurikiza amabwiriza y’Ishuri (Discipline)

Niba umuntu yemeye kuba umwigishwa wa Yesu , yari akwiye no kubaho mu myitwarire Yesu amwifuzaho. Umuntu aho arimo kwigishirizwa , mu rushako, mu kazi n’ahandi akwiye gukurikiza amabwiriza y’ishuri arimo kandi neza.

Kwiga amasomo yose uko akurikirana

Amasomo yose ntibishoboka ko umuntu ayigira rimwe. Turebye ku magambo y’intumwa pawulo, yavuze ko yigishijwe guhaga, amenya no gusonza, aza kumenya kuba muri byinshi, amenya kuba muribike byose ntabwo yabimenye mu gihe kimwe, ahubwo ni mu gihe runaka. Ntabwo rero Imana yahereza icyarimwe umuntu amasomo ngo ayige kuko izi ko atabishobora. Hari ubwo abakristo benshi bibeshya ko iyo umuntu akijijwe biba birangiye cyangwa bihagije nta kindi kiba gikenewe ariko siko biri. Burya kandi no gukizwa nta ruhare umuntu abigiramo ahubwo ni ugutsindishirizwa na Kristo, ni ubuntu umuntu aba yagiriwe.

Ikiba gikurikiyeho ni amasomo yo kwezwa, guhinduka mu ngeso kwa buri munsi,hari ugupfana na Yesu no kuzukana nawe, hari no kwiga kubaho ubuzima bwa gikristo mu mibereho ya buri munsi.

Kwiga ku giti cyawe

Reka guhindura abantu bose abanyeshuri kuko isomo ari iryawe wenyine. Hari ubwo Imana ishyira umuntu mu ishur ry’ikigeragezo runaka maze agahora ahanganye n’abantu. Dufate urugero nk’iyo ari ishuri ry’ikigeragezo cy’uburwayi, hari ubwo umuntu aba aho hakabura n’abamugeraho maze nawe akumva ko bwari uburenganzira bwe gusurwa, akabivovotera akabacira imanza ndetse akaba y’anabagaya bikamuviramo ibicumuro. Ariko menya ko ari umutwaro wawe, ni ishuri ryawe uwarigushyizemo nashima kurigukuramo azabikora niba koko wararyize neza.

Gukoresha neza igihe cy’ikiruhuko (Vacance)

Mu mashuri asanzwe habamo igihe cyo kuruhuka. Ntabwo Imana yishimira ko abantu bahora biga. Mwibuke ko mu butayu Imana yanyuzagamo ikabaha manu ubundi ikabaha amazi. Abantu rero ni byiza ko biga gukoresha neza igihe cyo kuruhuka, birashoboka ko waba ukennye Imana ikagucira inzira ugatera imbere, ako ni akaruhuko Imana iba iguhaye. Dukwiye kwiga gukoresha neza akaruhuko, uyu munsi ushobora kuba uri mu buzima bwiza ariko ejo hari ishuri rigutegereje. Ushobora kuba utarwaye, koresha uwo mwanya iby’igiciro cyawo.

Ni amakosa kuba waba umeze neza maze ukirata ku bandi , ubutunzi n’amafaranga waba ufite bizagera ubwo birangira ukaba wakenera uwo wiraseho. Mu gihe cy’akaruhuko ukwiye kwiga kubana n’abantu bose amahoro. Ikindi kintu k’ingenzi twamenya ni uko dukwiye kuzirikana ko ikiruhuko kidahoraho ahubwo kirarangira umuntu agakomeza andi masomo.

Kudakopera mu ishuri

Hari ubwo umunyeshuri aba umunebwe wo kwiga, akifuza guhora akopera ibyo abandi bakoze. Si byiza kubaho w’isanisha n’abandi nk’aho bigaragara rimwe na rimwe mu rusengero abantu bashima ko Imana yabagejeje ku bintu runaka, undi akaba yumva yahita asaba Imana nk’ibyo ariko muby’ukuri wenda atariho Imana yamwifuzaga , ahubwo ari ukubera yarebeye ku bandi. Kubera ko umuntu abonye uwahawe umugisha n’Imana akaba yamureberaho akabyifuza kandi ataramenya n’Imana itanga iyo migisha. Banza ushake Imana humura iyo migisha izaza umunsi wasoje amasomo yawe.

Kutagira amashyushyu yo kurangiza kwiga vuba igihe kitaragera

Mu kigeragezo umuntu wese aba yifuza ko cyarangira. Ariko nanone tuzirikane ko Imana iba yarateguriye ishuri buri muntu izi n’inyungu zizavamo. Burya kandi twibuke ko iyo umuntu asohotse atarize neza biteza ingorane zikomeye ku bantu benshi,. Reka dufate urugero rwo mu buzima busanzwe: Tekereza umuganga aramutse agiye kuvura atarize, abantu yahemukira uko bangana. Mwibaze umuntu agiye atwara imodoka atarize amategeko y’umuhanda neza impanuka yateza. N’ubwo umuntu aba yumva ishuri ry’Imana riruhije, ni ngombwa kubyemera kuko nibyo bizagira inyungu n’umusaruro mwiza mu gihe azaba ashoje.

Kutagirana ibibazo n’abarimu

Imana yahisemo ko twigishwa n’abarimu batandukanye. Umugore/umugabo mwashakanye yakubera umwarimu, umwana wanyu yakubera mwarimu, umuyobozi wawe mu itorero yakubera mwarimu, inshuti, umuvandimwe nawe yakubera mwarimu. Ubuzima bwawe, ibyo wari wiringiye nabyo byakwigisha. Uwiga rero agomba kwirinda kugirana ibibazo n’abarimu ngo yivovote abibashyiraho yumva ko aribo babiteye. Dukwiye gushaka amasomo muri ibyo byose kandi tukirinda kubicumuriramo. Umuntu akwiye kwishyira mu mwanya wa Kristo akibaza, niba uko yitwara mu ishuri rye ariko Kristo abishaka. Ikindi ni ukwibaza icyo ibyo wize bizamarira abandi.

Guhorana ibyiringiro by’uko ishuri rizarangira

N’ubwo ishuri ribabaza kandi duhuriramo n’ibibabazo bigoye, ariko ntabwo kwiga bihoraho bizagira iherezo. Ntabwo Imana yakugumisha mukwiga isomo rimwe, uyu munsi urimo kwiga iry’ubukene, ariko ejo ushobora kwiga iry’ubukire. Ntidukwiye gutakaza ibyiringiro mu ishuri turimo ahubwo tugire ikizere ko iyadushyize mu ishuri izanaridukuramo.

Kwiga birahenda

No mu buzima busanzwe mu bibazo duhura nabyo iby’amashuri ntibiburamo. Kwiga bisaba ikiguzi kiri hejuru, ariko ugereranyije n’ikiguzi cy’ibyo umuntu azangiza kubera ubuswa, wahitamo kujya mu ishuri ry’Imana. Mwibuke uburyo abigishwa barushye biga imyaka itatu, ariko kuko bize neza batanze umusaruro ufatika. Twafata urugero nka Petero wabwirije abantu ibihumbi 3000 umunsi umwe. Ikibazo dufite ni uko abantu bashaka kwigisha nyamara nabo ubwabo batarize. Dukwiye kwemere ko ishuri ry’Imana ari ngombwa.

Video y’inyigisho yose

[email protected]