Hamwe n’ibitugerageza Imana izaducira akanzu

Kwamamaza

agakiza

Hamwe n’ibitugerageza Imana izaducira akanzu


Yanditswe na: Ubwanditsi     2021-01-13 19:33:13


Hamwe n’ibitugerageza Imana izaducira akanzu

Nta kigeragezo kibasha kubageraho kitari rusange mu bantu, kandi Imana ni iyo kwizerwa kuko itazabakundira kugeragezwa ibiruta ibyo mushobora, ahubwo hamwe n’ikibagerageza izabacira Akanzu, kugira ngo mubone uko mubasha kucyihanganira. 1 Abakorinto 10:13.

Uko isi iteye, abayiriho n’ibiyiriho, ibiremwa bigaragara n’ibitaboneshwa amaso, ni uruhuri rw’ibibazo ndetse n’ibisubizo by’ikiremwa muntu. Ntibishoboka ko waba mu isi wishimye gusa kandi ntibinashoboka ko wabaho ubabazwa iteka, n’ubwo umubiri ndetse n’amarangamutima yacu bihashengukira tukamera nk’aho isi iturangiriyeho, mukomere.

Muri iyi nyigisho ndagirango nkukomeze ndetse nkubwire ko hamwe n’ibitugerageza Imana ibasha kuducira akanzu.

Hari ibibazo bibonerwa ibisubizo binyuze mu bumenyi, hari ibikemuka iyo habonetse ubushobozi cyangwa se amikoro, hari ibikemurwa n’abantu hari n’ibikemurwa n’Imana ubwayo. Ibi byose uko bingana ni rusange mu bantu, igitandukana ni ubukana bishobora kuzana cyangwa se uburyo buri wese abihagararamo.

Ni yo mpamvu nkubwira ngo komera, ejo ni heza, niba ubona ko bikurushije imbaraga ndetse n’abakagufashije bakananirwa igisubizo nta handi cyaturuka uretse ku Mana, niyo yihariye ubushobozi budashira.

Iyo inzira zose zagombaga kunyurwamo n’ibisubizo zafunzwe, Imana yo ibasha guca icyanzu (Inzira ahandi) kuko yo ubushobozi bwayo butajya buhagarikwa. Ubuzima burahinduka ariko Imana yo ntijya ihinduka, niyo mpamvu dukwiye kwitoza kuyizera, kugendana nayo ndetse no kubana nayo mu mibereho yacu yose. Impamvu ni uko iyo utari kumwe nayo hari izindi mbaraga za Satani zigutwaza igitugu, zikagusenya uhagaze, zikakwereka ko ari wowe isi yigirije ho nkana.

Urukundo Imana igukunda nirwo rutuma igutabarira mu nzira utatekerezaga. Hari ingero nyinshi zanditse muri Bibiliya z’abantu Imana yagiye itabara, ariko turetse n’izo, nawe ubwawe amateka yawe ndetse n’ay’inshuti zawe ni ubuhamya.

Ibuka impanuka zabayeho, ibyorezo, inzara, ubushomeri, intambara… aha hose Imana yagiye ica inzira abantu batatekerezaga haboneka ubutabazi. Iyo Mana n’ubu iracyahari, si uko tuba twasenze cyane ahubwo ni urukundo rwayo, kuko ibasha gukora cyane ibiruta ibyo dusengera.

Ibigeragezo duhura nabyo burya sitwe gusa hari b’abandi bahura nabyo, kandi Imana ntabwo yakwemera ko bitugeraho birenze ibyo twakwihanganira kuko izi intege nke zacu. Niyo mpamvu dusabwa kwiyungamo imbaraga n’ubwo amarangamutima yacu ahakomerekera cyane, ariko Imana iratwomora.

N’ubwo imibiri ihababarira Imana niyo idukiza, rwanya Satani ye kugutera ubwoba kuko ubwoba bwica kurusha ikigeragezo, kandi muri ibyo byose n’ubwo inzira zo gutabarwa tugera aho tukazibura Imana ni iyo kwizerwa izaca icyanzu.

Yesu abahe umugisha!

Umwanditsi: RUTAGUNGIRA Ernest

Umva n’iyi nyigisho: Inkomoko y’ibigeragezo / Impamvu Imana iduhumuriza mu makuba || Pastor Desire

Source: InyaRwanda.com

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?