Gusubizwa intege mu bugingo, birasaba ko uba(...)

Kwamamaza

agakiza

Gusubizwa intege mu bugingo, birasaba ko uba umunyakuri


Yanditswe na: Ubwanditsi     2021-04-19 06:33:27


Gusubizwa intege mu bugingo, birasaba ko uba umunyakuri

Gucika intege ntabwo ari amahitamo y’umuntu, ariko gusubizwamo intege byo biri mu mahitamo y’umuntu. Ukwiye kwibaza ngo: Ubwo maze iminsi narcitse intege, ubwo maze iminsi ntafite ubusabane n’Imana, ni iki nakora kugira ngo nongere gusubizwamo intege.

Asubiza intege mu bugingo bwanjye, Anyobora inzira yo gukiranuka ku bw’izina rye. Zaburi 23:3

Umuntu agizwe n’ibice 3 ukurikije Abatesalonike 5:23-24, agizwe: Umwuka, ubugingo n’umubiri. Ubugingo ni igice kiri hagati y’umwuka n’umubiri, bugizwe: N’ubwenge, kamere, amahitamo, amarangamutima(imbamutima) cyangwa se ibyiyumvo, aha ni ho hafatirwa ibyemezo. Muri iki gice cy’ubugingo habera imiyaga n’imiraba utamenya ubwoko bwayo, ariko muri iki gice cy’umwuka iyo wubakiye ku rufatiro rw’agakiza warakiriye Kristo Yesu nk’Umwami n’Umukiza usubizwamo Intege.

Kuko muri bya bice 3, igice cyumva Imana ni igice kitwa umwuka, ni nacyo Yesu yaje kuzura aduha ubugingo buhoraho. N’igihe Imana yabwiraga Adamu ngo ukoze icyaha no gupfa uzapfa yamaze imyaka 930, ariko mu mwuka yari yarapfuye. Yesu rero yaje kuzura igice kitwa umwuka kugira ngo umuntu yongere gusabana n’Imana. Reka dufate mu gice cy’umwuka nka fondasiyo y’inzu, nubwo inzu yaba ikomeye cyane iyo yisutseho imiraba n’imiyaga bigaragazwa na fondasiyo yayo. Hari abantu rero bubaka inzu ikaba ndende ariko fondasiyo(urufatiro) idakomeye.

Nkuko twabivuze mu gice kitwa ubugingo kigizwe: N’ubwenge, kamere, amahitamo, amarangamutima(imbamutima) cyangwa se ibyiyumvo. Ni ahantu hahora akavuyo n’imiyaga biteye ubwoba kandi bikajya byikubita kuri ya nzu( urufatiro rwo mu mwuka). Aha rero bisaba kumenya uburyo uribubyifatemo mu gihe habayeho gucika intege cyangwa guhura n’ibibazo. Mbibutse ko muri iyi nzira ijya mu i Juru, Yesu ntiyigeze atwizeza ko tutazahura n’ibibazo! Yaravuze ngo ‘Mu isi muri n’amakuba, ahubwo muhumure nanesheje isi’

“Asubiza intege mu bugingo bwanjye”

Gucika intege bibaho bitewe n’impamvu nyinshi, ahubwo haba hasigaye kwibaza ngo iyo nacitse intege ni iki nkora kugira ngo intege zigaruke mu bugingo. Gucika intege ntabwo ari amahitamo y’umuntu, ariko gusubizwamo intege byo biri mu mahitamo y’umuntu. Ukwiye kwibaza ngo: Ubwo maze iminsi narcitse intege, ubwo maze iminsi ntafite ubusabane n’Imana, ni iki nakora kugira ngo nongere gusubizwamo intege.

Gucika intege bishobora kuba mu muntu ku giti ke, bishobora kuba mu murimo akora, bishobora kuba ku gihugu cyangwa ku mahanga. Ibiba ku muntu umwe bishobora kuba no ku muryango wose, hagera igihe cyo gucika intege hakaba hakenewe gusubizwamo intege.

Kugira ngo usubizwemo intege bisaba kuba umunyakuri

Bisaba kwemera ko wacitse intege, Yesu ari i Getsemani mu byukuri yari yacitse intege byaragaragaraga ariko yabaye umunyakuri abwira Imana ngo’ Niba bishoboka iki gikombe kindenge. Ntabwo numva nshoboye kwihangana no gukomera, kuko yabaye umunyakuri mu i Juru bamwoherereza imbara asubizwamo intege, abona kurangiza urugendo rw’umusaraba.

Ntabwo ari Yesu wenyine, muribuka Samusoni igihe yarwanaga n’abanzi be hanyuma bikagera igihe agacika intege ari i Rehi, agasenga. Uko gusenga kugatuma asubizwamo intege, iriba rikaza akanywa amazi agasubizwamo intege akica abantu benshi! Birasba ko tuba abanyakuri.

Ntabwo mwibuka umudamu wamaze imyaka myinshi ari mu mugongo ava, ibintu bimeze nabi ibye byose yarabimariye ku baganga no kubo agerageza ko bamufasha bikanga. Umunsi yumvise inkuru ya Yesu yanyuze mu bantu amukoraho, arakira. Utekereza ko atahuye n’abamushinyagurira, n’abamubwira ko anuka, n’abamubwira ko atari akwiye kuza mu bantu ameze atyo ariko we yari azi icyo ashaka, yashakaga gusubizwamo intege. Gucika intege bibaho ahubwo ukwiye kuba umunyakuri.

Ibiduca intege biruzuye ni byinshi

Hari igihe ducika intege kubw’amasezerano yatinze, ducika intege kubw’ibigeragezo, imiyaga n’imiraba byatwisutseho, ducika inetege kuko sosiyete yabaye mbi, ducika intege kuko aho twagiye gusengera badukomerekeje. Hari igihe ducika intege kuko twumva ko Imana ari yo nyirabayazana w’ibyatubayeho( muzarebe iyo umuntu ahuye n’ikibazo gikomeye uwambere ashinja ni Imana, kuki yemeye ko bigenda gutya…).

Hari igihe ducika intege kubera ibintu byinshi. Ntabwo nzi ibyakubayeho ariko wowe uri umuhamya w’ibyakubayeho, kandi usibye ko ugerageza kugaragaza ko nta kibazo gihari ariko mu mutima wawe urabizi ko wacitse intege.

Ingaruka mbi zo gucika intege

Gucika intege hari igihe bituzanira gukora ibyaha: Hari igihe usanga umuntu ari umunyamujinya, akajya asubiza nabi ukabona kubana nawe ntibyoroshye. Hari n’igihe umuntu avuga ati’ Naririnze ntacyo ntakoze, ariko kuri ubu ncitse intege.

Hari ukubwira ati’ Natinzekubona umugabo, ngiye kubyara umwana basi sinzapfe ntashatse! Hari ukubwira ko yakoze ibishoka byose ariko yacitse intege, agahitamo kujya kunywa inzoga cyangwa akaba yarihanganiye umugore we/ umugabo we utari mwiza bikazarangira amuciye inyuma. Gucika intege bikoresha ibyaha bitandukanye kandi byinshi.

Gucika intege kandi Bizana kwiyahura: Ukajya wumva ubuzima butakunejeje, ukumva nta mpamvu yo gukora( ndaruha mbese nduhira iki, ndabikora se ngo bitange iki?…). Gucika intege bishobora kuzana kwiyambura ubuzima kandi ni icyaha gikomeye.

Gucika intege kandi bikurura indwara: Hari igihe umuntu atangira gucika intege imbere muri we, ukabona n’ibitugu byarahetamye akagenda yunamye, adashobora kwema. Abagabo bo ntashobora kwiyogoshesha, akibagirwa kongera kwambara neza ( cyane cyane uwagize ibyago akabura umugoe we), ukajya ubona ibibazo bimugaragaraho inyuma. Ukabona ntiyishimye uko yitwara kugaragaza ko afite ibibazo nubwo abantu batabizi.

Gucika intege Bizana guhungabana kw’amarangamutima gukomeye bibyara indwara: Indwara nyinshi abantu barwaye rimwe na rimwe ziba zijyanye no gucika intege kw’imbere muri bo, cyangwa se guhungabana kw’amarangamutima.

Bishobora kuzana guhungabana, umutwe udakira, kuzana imvi, kuzana uruhara, bishobora kuzana umutima, bishobora kuzana diyabete, kwibagirwa, bishobora kuzana gucika intege ku buryo buteye ubwoba.

Iyi nyigisho yateguwe, ikanatambutwsa na Pasiteri Desire Habyarimana kuri Agakiza Tv yose wayireba hano

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?