Gushaka gusambanya abo bagabo byatumye hahinduka umuyonga.

Bahamagara Loti baramubaza bati “Abagabo binjiye iwawe muri iri joro bari he? Basohore turyamane nabo”……..Maze uwiteka agusha kuri Sodomu n’I Gomora amazuku n’umuriro bivuye ku Uwiteka mu ijuru, atsemba iyo midugudu yose na cya kibaya cyose n’abayituyemo bose n’ibyameze ku butaka (Itangiriro19; 24). 

Izi ni inkuru z’amateka yabereye ahitwa Sodomu n’I Gomora mugihe cya Aburahamu ubwo Gutaka kw’abahatuye kwageraga k’Uwiteka Imana yo mu ijuru batakishwa n’ibyaha by’urukozasoni byahakorerwaga, muri byo harimo gusambana ku bantu bahuje ibitsina, bikaba ari nabyo byagaragariye mu maso ya Loti ubwo abagabo bahatuye bashatse gusambanya abamarayika ari nabwo hakurikiyeho kurimburwa kw’abantu n’ibyaho byose.

Nk’uko byari byitezwe nta muntu watekerezaga ko kuri ubu ibyaha nk’ibi by’urukozasoni byazongera gukorwa nyamara mu minsi ya none bisigaye byarabaye nk’ibisanzwe kuko gusambana by’umwihariko ku bahuje ibitsina, hari n’aho usanga inteko nshinga mategeko z’ibihugu bimwe zibitora nk’itegeko, ukibaza niba noneho no mu ijuru haratowe irindi tegeko ryemerera abantu kugomera Uwiteka Imana Data Yo mu ijuru.

Igikwiriye kwibazwa na none ni ingaruka ibi byaha bishobora kugira ku bantu, kuko umuntu yakwibaza niba nta muvumo cyangwa ibyago bizazanira isi n’abayituye dore ko n’ubwo benshi mu bantu babikora ariko usanga na none hari n’abandi nabo bafata igihe cyabo bagataka cyane batakishwa n’ibyo byaha by’ubusambanyi busanzwe cyangwa bw’abahuje ibitsina bikorerwa ku isi harimo n’u Rwanda.

Bantu mwemera kandi mukizera ko Dufite Imana yanga ibyaha birakwiye ko ibyabereye I Sodomu n’I Gomora bitubera akabarore, bityo tukarwanya icyatuma tugwa mu mutego wo kugomera Imana ku kintu icyo aricyo cyose ariko by’umwihariko ku cyaha cy’ubusambanyi dore ko ari na kimwe mu byangiza ubugingo ndetse n’umubiri ntikiwusige amahoro, byagera ku bahuje ibitsina byo bikaba akumiro.

Ernest Rutagungira