Gukoreshwa n’Imana bitandukanye no gukorana(...)

Kwamamaza

agakiza

Gukoreshwa n’Imana bitandukanye no gukorana n’Imana-Pst Desire Habayarimana


Yanditswe na: Ubwanditsi     2021-09-29 08:13:25


Gukoreshwa n’Imana bitandukanye no gukorana n’Imana-Pst Desire Habayarimana

"Kandi ubwo dukorana na yo, turabinginga kugira ngo mudaherwa ubuntu bw’Imana gupfa ubusa" 2Abakorinto 6:1

Kugira ngo umuntu akorere Imana yakagombye kuba yarahindutse ageze ku rwego akora ubushake bw’Imana, ageze ku rwego agira umutima nk’uwari muri Kristo Yesu. Ni yo mpamvu Yesu yategereje imyaka 30, Bibiliya iravuga ngo “Amaze gusenga cyane no kwinginga cyane, yigishijwe kumvira n’ibyo yababajwe” Nta cyaha cyabaga muri Yesu, ariko byafashe imyaka 30 kugira ngo yige umuco wa kiyuda, amenye aho azakorera, yuzure imbaraga nyinshi kugira ngo nahagarara avuga abe avuga ibyo azi.

Umuntu akizwa uyu umunsi ejo akaba yandikiye korari, ejo akaba abaye umudiyakoni, ejo akaba abaye umwarimu, akaba abaye umupasiteri, hari n’abatanyura muri izo nzira zose. Agasimbuka akaba ageze ku rwego utamenya, ariko wareba icyo atanga[ mu byukuri umuntu atanga icyo afite] niba ntacyo ufite, ntacyo uzaha abandi. Imbaraga zo gukorera Imana tuzikura mu mubano dufitanye nay o, ziva mu busabane tugirana n’Imana. Iyo dufashe inzira yo kwezwa no guhinduka, bidufasha guhinduka no kugera ku rwego Imana ishobora kudukoresha nk’ibikoresho bizima bishobora kuyigirira umumaro.

Tandukanya gukoreshwa n’Imana no gukorana n’Imana

Yesu yagiye agaruka ku magambo asa nk’akomeye, Pawulo nawe yagiye avuga ngo" Kandi ubwo dukorana na yo, turabinginga kugira ngo mudaherwa ubuntu bw’Imana gupfa ubusa"

Nagira ngo mbatandukanyirize amagambo 2: Gukoreshwa n’Imana no gukorana n’Imana ni ibintu bitandukanye. Umuntu ashobora gukoreshwa n’Imana ariko atari igikoresho cyejejwe, ariko gukorana n’Imana harimo ubumwe, harimo ubufatanyabikorwa. Ni ukuvuga ko hari urwego uba ugezeho rw’ubusabane no gukorana n’Imana nk’inchuti yayo magara.

Ariko hari abantu bakoreshwa n’Imana ariko badakoranana yo. Urugero: Eliya yari ku kagezi kereti, igihe yari amaze guhagarika mvura, Bibiliya ivuga ko ibikona byamuzaniye umutsima n’inyama. Imana yakoresheje ibikona ibiha umutsima n’inyama biramuzanira ariko kandi mu busanzwe Bibiliya ivuga ko igikona ari ikizira, ariko biraganduka, birumvira bizana umutsima n’inyama. Muzi ukuntu ibikona bikunda inyama, ariko ntibyihayeho, byagaburiye Eliya. Hari abantu bakoreshwa muri urwo rwego.

Igihuru cy’amahwa Imana yakivugiyemo, Imana ivugana na Mose ariko igihuru na n’ubu kiracyari igihuru, amahwa ntazajya mu i Juru. Umuyaga watwaraga Eliya mu buryo butangaje ariko umuyaga nta kindi uvuze, gusa wabaye igikoresho.

Hari abantu bazavuga ngo”Twariraga, twanyweraga imbere yawe, twakoraga ibitangaza mu zina ryawe, Yesu avuge ngo ’Nibwo bwa mbere mbabonye sinigze mbamenya’. Ukibaza, ko bakoreshejwe ibitangaza mu izina rya Yesu, ko bahagurukije ibirema, ko bahumuye impumyi, ko bari bafite amatorero manini cyane ku isi, ko bari bafite ama minisiteri avugwa cyane afite abayoboke benshi, ariko Yesu akazababwira ngo” Ntabwo nigeze mbamenya”?

Aha rero ukwiye kwitonda, buri ntambwe yose utera ukareba ko ukorana n’Imana udakoreshwa gusa. Hari abantu nyine bakoreshwa nka Robo, ariko nagira ngo mbibutse ko gukoreshwa n’Imana ni byiza ariko wakagombye kuba ureba impinduka y’imbere.

Aba bantu bazazira iki?

Aba, bazazira ko batemeye guhinduka imbere muri bo, ahubwo bashyize umwanya munini mu gukorera Imana gusa ariko ntibashyira umwanya mu kwezwa no guhinduka, no kubana n’Imana. Aha ni ho hari ikibazo gikomeye!

"Kandi ubwo dukorana na yo, turabinginga kugira ngo mudaherwa ubuntu bw’Imana gupfa ubusa"

Pawulo kugira ngo agera ku rugero rwo gukorana n’Imana ntabwo byafashe ijoro rimwe, byafashe umwanya munini cyane. Muribuka ko yatangiye avuga ngo “Nshaka gukora ikiza ikibi kikantanga imbere, ikibi nanga akaba ari cyo nkora” Agera igihe avuza induru aravuga ngo ’Uyu mubiri ntera gukora icyaha nzawukizwa n’iki!’ Arakomeza atera intambweee, kugeza ubwo yavuze ngo “Si njye ukiriho, ni Kristo Yesu uriho muri Njye, napfanye na Kristo Yesu nzukana na we”. Kuzageza bwo avuga ngo ‘Ubu ndirata’.

Urebye ibyo yirase nabyo biratangaje: Gukubitwa inkoni z’abaroma bamukubitaga akazana inyama, gusonza, ubwato bwamenekeye mu nyanja, avuga inshuro bamuteye amabuye bagasiga yapfuye, avuga akaga k’abayuda bene wabo, aravuga ngo “Ibyari indamu nabitekereje nk’igihombo ku bwo kumenya ikirengeye byose", aravuga ngo "by’isi abitekereza nk’amase”

Tekereza umuntu wari ku rwego nka Pawulo, yari ku rugero ashobora gukoreshwa n’Imana, none ubu iyo umuntu adafite iby’isi, ntabwo bashobora kwemera ko ukoreshwa n’Imana. Ariko ntabwo ubugingo bw’umuntu buva mu bwinshi bw’ibyo atunze, kubigira ni byiza ariko si byo bizana ubugingo. Wagakwiye kuba ufite ubugingo buzima bwishimirwa n’Imana, nabyo(iby’isi) bikaba bihari.

Reba hano iyi nyigisho yose yateguwe, ikanatambutswa na Pasiteri Desire Habyarimana kuri Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?