Fungura imiryango y’umutima wawe Yesu yinjire

Kwamamaza

agakiza

Fungura imiryango y’umutima wawe Yesu yinjire


Yanditswe na: Ubwanditsi     2021-06-03 09:37:12


Fungura imiryango y’umutima wawe Yesu yinjire

Kristo yatuguze amaraso ye y’igiciro cyinshi. Ntabwo turi abacu ngo twigenge, imibiri yacu ni insengero z’Imana, aho ishaka gutura no kuba umuyobozi ubikwiye.

Turi abajura n’abagizi ba nabi, niba dukingirana Imana ntidutume iza muri twe. Abantu benshi batekereza ko byaba bikabije cyane gufungirana Yesu burundu, bityo bagahitamo kumukorera akumba gato mu mitima yabo.

Abo bafite ibyumba byinshi by’ibanga, aho bayobora ubuzima bwabo ku buryo bwihariye kandi mu mwijima mwinshi. Nyamara ntacyo bimaze niba dufunguye icyumba kimwe, bibiri, cyangwa byinshi ariko twizigamiye icyumba cyo kwihimbaza ubwacu, ari naho tuburiza Kristo Yesu kwinjira. Haba mu gihe gito cyangwa kirekire, tuzafatwa nk’abagizi ba nabi, kandi Imana izabiduhora.

Reka muri ino minsi dukingure imiryango yose y’imitima yacu, kugira ngo Umwami w’icyubahiro Yesu Kristo ashobore kwinjira, afite ubwiza bw’icyubahiro n’agakiza. Mureke ubunebwe bwose no kwinangira, urwango n’uburakari, intekerezo mbi, ishyari, kwifuza icyubahiro cy’ubusa, n’ubwikunde bwose, yewe n’ibibi byose.

Reka urukundo rwa Kristo n’umwuka w’ububyutse bitahe mu mutima wawe! Yoo, mbega ibihe byiza bizabaho mu gihe tuzafungurira Kristo imitima yacu! Aya magambo yavuzwe ni ukuri:

[Nuko rero nk’uko Umwuka Wera avuga ati “Uyu munsi nimwumva ijwi ryayo, Ntimwinangire imitima, Nk’uko mwayinangiye mu gihe cyo kurakaza, Ku munsi wo kugerageza mu butayu’,] Abaheburayo 3: 7-8.

Umwami w’icyubahiro, Yesu Kristo azanye umucyo no guca imanza zitabera.

Umucyo no guca imanza, bizanwa n’icyubahiro cy’Imana, nubwo abantu benshi batinya gukingurira imiryango y’imitima yabo Kristo. Reka urumuri rwinjire mu byumba byose by’umutima wawe, kuko umucyo n’urubanza bizana gukiranuka, amahoro, umunezero, umudendezo, no gutsinda. Ku munsi w’urubanza umuntu wese wahishe ikintu kibi cy’umwijima mu mutima we, kizajya ahagaragara.

"Mbona intebe y’ubwami nini yera mbona n’Iyicayeho, isi n’ijuru bihunga mu maso hayo, ahabyo ntihaba hakiboneka. Mbona abapfuye, abakomeye n’aboroheje bahagaze imbere y’iyo ntebe, nuko ibitabo birabumburwa. Kandi n’ikindi gitabo kirabumburwa, ari cyo gitabo cy’ubugingo. Abapfuye bacirwa imanza z’ibyanditswe muri ibyo bitabo zikwiriye ibyo bakoze.

Inyanja igarura abapfuye bo muri yo, Urupfu n’Ikuzimu bigarura abapfuye bo muri byo, bacirwa imanza zikwiriye ibyo umuntu wese yakoze. Urupfu n’Ikuzimu bijugunywa muri ya nyanja yaka umuriro. Iyo nyanja yaka umuriro ni yo rupfu rwa kabiri. Kandi umuntu wese utabonetse ko yanditswe muri cya gitabo cy’ubugingo, ajugunywa muri iyo nyanja yaka umuriro." Ibyahishuwe 20: 11-15

Imbaraga za Kristo

Pawulo we yafunguriye Kristo Yesu imiryango y’umutima we abishyizeho umwete, mu Bakolosayi 1:29 agira ati: "Icyo ni cyo gituma nkora cyane, ndwanana umwete nk’uko imbaraga ze ziri zinkoreramo cyane."

Tekereza rero niba imbaraga z’Imana zibereyeho kugira ngo zikorere cyane muri twe! biratwereka ko twabona inyungu nyinshi mu buzima bwacu. Reka izo mbaraga z’Umwuka Wera zinjire mu mutima wawe, kandi ube ikitegererezo cya Kristo Yesu mu bataramumenya. Nibyo, dukwiye gukora imirimo ya Yesu, tuyikoreye mu bubyutse .

Source: Activechristianity.com

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?