Ese umukristo yakwitwara ate mu gihe cy’indwara z’ibyorezo?

Muri iki gihe ku isi haravugwa indwara z’ibyorezo zikomeje koreka imbaga y’abantu, iki ni igihe abakristo bakwiye gufata ingamba zitajegajega z’icyakorwa harimo kureka ubwoba, kugira ubwenge no gufata ingamba zo kwirinda ikwirakwizwa ry’iyi virusi nyuma y’ibyo tugakiranuka

Izi ndwara z’ibyorezo ziganjemo ebola na coronavirus zirimo gutera abantu guhagarika imitima bamwe bibaza ngo ese kuki Imana yemera ko biba? Abandi bati ibi ni ibihano by’Imana abandi bati ni ibimenyetso by’iminsi iheruka isi.

Mu by’ukuri izi ndwara z’ibyorezo zishobora kuba cyangwa se ntizibe igihano cy’icyaha ibyo biri mu biganza by’Imana, nk’uko tutazi igihe Yesu azagarukira dukwiye kwitondera kuvuga ko izi ndwara z’ibyorezo ari ikimenyetso kigaragaza imperuka, ku bataramenya Yesu ngo bamwakire nk’umwami n’umukiza, indwara ishobora kubibutsa ko bagomba gukizwa kuko umukristo aba afite ubwishingizi bw’amaraso ya Yesu yavuye ku musaraba ( Yesaya 53:5)

Bibiliya mu isezerano rya kera ivuga ibihe bitandukanye Imana yazanaga ibyago n’indwara ku bantu ndetse n’abanzi bayo kugirango abantu barusheho gusobanukirwa imbaraga z’Imana (Kuva 9:14, 16) yakoresheje ibyago muri Egiputa kugirango Farawo arekure abisilaeli bave mu buretwa muri ibyo byago habonekagamo n’indwara zitandukanye.

Ibihano Imana itanga cyangwa se iyo yafataga umwanzuro wo gusuka umujinya wayo ku bwoko bwayo , yabaga igamije kugarura abantu bayivuyeho ibyo yabikoraga itagambiriye kurimbura ahubwo igamije gukebura abantu ngo bave mu bwigomeke.

mu gihe nk’iki kidasanzwe kigaragaramo indwara z’ibyorezo abantu bakwiye gushyira mu bikorwa icyo Imana yabwiye Salomo gusenga no kwihana “ nindamuka nkinze ijuru imvura ntigwe, cyangwa nintegeka inzige ngo zone igihugu cyangwa ninohereza mugiga mu bantu banjye, maze abantu banjye bitiriwe izina ryanjye , nibicisha bugufi bagasenga, bagashaka mu maso hanjye, nanjye nzumva ndi mu ijuru mbababarire igicumuro cyabo mbakirize igihugu” (2ingoma 7:13-14 )

Mu isezerano rishya ,Yesu yakijje indwara z’ubwoko bwose. Aho Imana yatezaga ibyago ku bantu kugirango ibagaragarize imbaraga zayo , Yesu yarahageze arabakiza kugirango bimenyekane ko ari umwana w’Imana.

Imana ituma indwara n’imibabaro bibaho kubera umugambi wayo, ariko rimwe na rimwe indwara z’ibyorezo zibaho kubera isi yanduye. muri macye nta buryo bwo gusobanura impamvu yabyo biba bizwi n’Imana kuko ari yo ibitegeka icyakora byose bifatanyiriza hamwe kutuzanira ibyiza.(Abaroma 8: 28)

Muri macye icyo abakristo bakwiye gukora mu rwego rwo guhangana n’indwara z’ibyorezo icya mbere ni ukureka ubwoba kuko Imana irabitegeka, Bibiliya yavuze iri jambo “witinya ” incuro 300. Icya kabiri kugira ubwenge, kwirinda no kurinda umuryango wawe, icya gatatu kubwira abantu ijambo ry’Imana no kubazana kuri Yesu bityo abantu bagasengera mu kuri no mu mwuka.

Source: www.gotquestions.org