Ese uha Yesu umwanya mu bikorwa byawe(...)

Kwamamaza

agakiza

Ese uha Yesu umwanya mu bikorwa byawe byose?


Yanditswe na: Ubwanditsi     2021-06-22 09:43:26


Ese uha Yesu umwanya mu bikorwa byawe byose?

Ibitabo bine by’ubutumwa bwiza bigize Isezerano Rishya, bikubiyemo imirimo n’ibitangaza Yesu Kristo yakoze akiri mu isi, bigatera bamwe mu bayuda n’abanyamahanga kumwizera, guhinduka abigishwa be, no kujya bamwiyambaza mu bikorwa byabo byose. Ibi byagize uruhare mu kongera uko bwije n’uko bukeye umubare w’abakizwa.

Igitangaza cya mbere cya Yesu cyabereye mu bukwe yari yatashye.Vino yari ishize kandi ubukwe bugikomeje, hari havutse ikibazo gikomeye bene ubukwe batari bafitiye igisubizo. Nyina wa Yesu wari umwizeyemo ubushobozi, yahise amumenyesha ikibazo kandi asaba abahereza gukora icyo ababwira cyose. Yesu yahise abasaba kuzuza ibibindi 6 byari aho amazi, barabikora. Umusangwa mukuru anyweye kuri ayo mazi, yumvise yahindutse Vino iryoshye cyane. Byaramutangaje, kuko yari amenyereye ko mu birori, Vino iryoshye inyobwa mbere, hagaheruka itaryoshye.Ariko noneho vino yari iherutse izindi yari iryoshye kurushaho.

Iki gitangaza Yesu yakoze cyerekanye ko atandukanye n’abakwe basanzwe. Aho atumiwe, haba ibirori bikomeye,umunezero uba wose, ibitangaza birakoreka.Cyerekanye icyubahiro cye, kizahamirishwa kuzuka igihe kigeze, ku munsi wa gatatu. Ibi byabaye i Kana y’i Galilaya binashushanya ubukwe Yesu Kristo ategurira abagize Itorero rye. Ni ibirori n’umunezero ujyana na byo bihishiwe abakira Yesu mu bugingo bwabo kandi bakabana na we mu byo bakora byose. Mariya nawe ashishikariza abakorera Yesu kubana nawe igihe cyose, no gukora icyo ababwira cyose, binyuze mu Ijambo yandikishije.

Ubukwe ni umuhango wa gikristo Itorero rikorera abashyingiranwa, kugira ngo batangire guhamya bakiri mu isi, umubano wa Yesu Kristo n’abamwizera mu bwami bwo mu Ijuru. Uyu muhango ni ivugabutumwa abadafite umuhamagaro wo gukorera Imana ari ingaragu bagomba kubahiriza, kugira ngo basohoze gukiranuka. Gutegura neza ubukwe bwa gikristo ni ukubwereka Yesu, ni ukubumutumiramo binyuze mu gusenga no kumwizera mbere na mbere. Ni ugushaka ibikenewe ku bufatanye n’abagize umuryango, inshuti n’Itorero. Biba byiza kwirinda gusesagura no kurarikira ibirenze ubushobozi.

Ubukwe bwa gikristo butegerejweho kwinjiza abashakanye mu buzima burimo Yesu, bukorwamo ibyo ategetse byose n’ibitangaza, ubuzima bw’ibiryoshye kurushaho. Imana ishoboze abagize itorero bageze igihe cyo gutegura ubukwe, gukora ubukwe burimo Yesu, kandi abubatse ingo nabo bemerere Yesu abe mu miryango yabo kugirango imibanire yabo ibe umunsi mukuru, utegura uwo mu bwami bwo mu ijuru.

Source: https://www.epr.rw/

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?