Ese ufite gahunda yo gukorera Imana? Imabaraga

Kwamamaza

agakiza

Ese ufite gahunda yo gukorera Imana? Imabaraga z’Ubutumwa bwiza zihesha abantu gukorera Imana-Pst Desire Habyarimana


Yanditswe na: Ubwanditsi     2021-10-04 07:32:12


Ese ufite gahunda yo gukorera Imana? Imabaraga z’Ubutumwa bwiza zihesha abantu gukorera Imana-Pst Desire Habyarimana

"Erega ubutumwa bwiza ntibunkoza isoni: kuko ari imbaraga y’Imana ihesha uwizera wese gukizwa, uhereye ku Muyuda ukageza ku Mugiriki" Abaroma 1:16

Nyuma yuko imbaraga z’Ubutumwa bwiza zigeze mu muntu zikamuha gukizwa, zikanamuha kwezwa, hakurikiraho kwakira imbaraga zo gukorera Imana. Ni byo tugiye kugarukaho muri iyi nyigisho.

Yesu yabanye n’abigishwa imyaka itatu, yarabahamagaye baramwitaba, baramukurikira. Basiga byose bagendana na we, ariko aho bamariye kumukurikira batangiye inzira yo kwezwa: Baraburaye, barabwiriwe, ntibagiraga imyambaro, bagendaga ingendo nini n’amaguru. Babaga ahantu mu buvumo, bararaga mu butayu basenga.

Ariko rimwe Yesu abaha itangazo rikomeye, aravuga ngo ’Mumaze kwezwa n’ijambo nababwiye’ bari bageze ku rwego rushimishije rwo kwezwa no guhinduka, no kuba abo Imana yifuza ko baba bo. Kandi bajyaga kwigisha no kubwiriza bigacamo, urugero: Bigeze kugenda ari 70 bahagurutsa ibirema, bakora ibintu ubona birimo imbaraga z’Imana.

Yesu agiye Kujya mu ijuru, wenda yari kubasigira ubunararibonye. Akababwira ati wenda mujye mubigenza kwa kundi, ariko yari azi ko umurimo bafite imbere usaba imbaraga nyinshi. Arangije arababwira ngo" Icyakora muzahabwa imbaraga Umwuka Wera nabamanukira. Muzaba abagabo bo kumpamya i Yelusalemu, i Yudaya n’i Samaliya kugera ku mpera y’isi".

Izi, ni imbaraga za gikozi umuntu yakira iyo azakorera Imana. Iyo umuntu afite umushinga w’ibyo azakorera Imana, ashobora kuzura Umwuka Wera bikemera kuko ni Umwuka wa gikozi.

Ese niba udafite umushinga wo kwezwa no guhinduka, ni iki uzakorera Imana? Ese Imana yaguha Umwuka Wera wo kumaza iki? Ntabwo Umwuka Wera akenewe kugira ngo ucuruze mu isoko, akenewe kugira ngo ukore imirimo myiza yose muri Kristo Yesu.

Niba warahishuriwe uwo ugomba kuba we, niba warahishuriwe icyo Imana yakuremeye, niba hari umushinga upanga mu buryo bwo gukorera Imana, izaguha imbaraga zo kubikora. Iyo umuntu ahagurutse akajya mu ivugabutumwa, Imana imuha imbaraga ariko iyo wicaye gusa uri aho: Mu itorero ryawe, muri korari, Imana yatanga imbaraga zo kumaza iki?

Ariko iyo hari akazi imbaraga z’Imana zirakora! Iyo umuntu yakiriye imbaraga z’Ubutumwa bwiza, ni uko ziba zigomba hukora. Ikibazo muri iki gihe ni abantu bake bafite ibyo gukorera Imana. Iyo dusenga: Tuba tugira ngo tubone ibiryo, imyambaro, dutere imbere, tuba tugira ngo tugere ku rwego rwiza nk’urwo abandi bagezeho.

Ese hari gahunda ufite yo gukorera Imana?

Pasiteri Habyarimana Desire mu kiganiro ’Ubutumwa bukiza’ kuri Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?