Ese tubanye dute na Yesu?

Muri iyi minsi abantu bitirirwa Kristo Yesu nyamara wareba uko babaho n’imirimo bakora, ugasanga bigaragaza ko hari undi yesu biyimikiye utari Kristo. Byaba bibabaje kubona abantu bihitiramo yesu bakamukurikira birengagije Yesu Kristo muri macye ni ugukizwa kandi bigirira ingaruka mbi ubikoze.

Biteye ikibazo kwiyumvisha ko umuntu ashaka gukurikira Yesu nyamara agakora ibyaha uko yishakira. Muri rusange buri wese aracumura akarenga ku mategeko y’Imana ariko umukristo nyakuri abikora bimugwiririye atabiteguye kandi akimara gucumura ahita yumva abuze amahoro akihana Imana ikamubabarira. Ikibabaje ni abantu bafata impande zombi agashaka gukurikira Yesu abivanze no gushayisha mu byaha.

Yesu yaravuze ati: “nanjye singuciraho iteka, genda ntukongere gukora icyaha” Yohana 8:11. Imana yaduhaye ubwisanzure bwo guhitamo icyo dukora. Ariko Imana izi buri kantu kose ku buzima bwacu yewe na mbere y’uko tuvuka. Yaduhaye ubushobozi bwo kwifatira ibyemezo ari nayo mpamvu twahawe Bibiliya kugirango ituyobore kugirango tubashe kubaho uko Imana ishaka.

Bibiliya ivuga yeruye uburyo umukristo cyangwa se uwakurikiye Kristo akwiye kubaho n’uko akwiriye gukora. Ibi byose tubifashwamo n’umwuka wera utwemeza.ikibazo kivuka mu gihe dutekereza ko tugomba gukora ibyo twishakiye twitwaje ko twacunguwe.
Mbese mu byo tuvuga, byose duhesha Yesu icyubahiro?
Imana itwereka uko dukwiye kugenzura ibyo tuvuga kugirango tubashe gutunga imitima itaducira urubanza. “Ariko none mwiyambure ibi byose: umujinya n’uburakari n’igomwa no gutukana, kandi ntihakagire amagambo ateye isoni aturuka mu kanwa kanyu” Abakolosayi 3:8

Ijambo ry’Imana rihora ridukangurira kugenzura ururimi rwacu kugirango turusheho kugaragara nk’inyangamugayo mu maso y’Imana. “Ijambo ryose riteye isoni ntirigaturuke mu kanwa kanyu ahubwo uko mubonye uburyo mujye muvuga iryiza ryose ryo gukomeza abandi, kugirango riheshe uryumvise wese umugisha. (Abefeso 4:29)

Yesu ahamagara abantu arababwira ati: “nimwumve musobanukirwe . ikijya mu kanwa si cyo gihumanya umuntu, ahubwo ikiva mu kanwa nicyo kimuhumanya” Matayo 15:10:11. Aha yesu yashakaga kwereka abantu ko umuntu akwiye gusohora ijambo yabanje kuritekerezaho neza akamenya niba nta ngaruka mbi rishobora kugira ku baryumvise.

Buri kintu cyose dukora cyangwa tuvuga tujye tugikorera kuramya Imana. Ariko iyo duhisemo kwihimbaza ubwacu aho guhimbaza Imana kiba ari ikibazo giteye inkeke.
Mu by’ukuri twese dukora ibyaha ariko dukwiye kwiha intego yo guharanira kugendera kure y’icyaha kandi tuzayigeraho.

Ntitukabe Abakristo bakunze isi n’ijuru icyarimwe kuko byangiza umubano wacu na Yesu Krito, kandi mureke imirimo ndetse n’amagambo yacu bibe ibyo guhesha Imana icyubahiro.

Source: www.christiantoday.com

Vestine agakiza.org