Ese birakwiye ko hashyirwaho ikigo kigenzura(...)

Kwamamaza

agakiza

Ese birakwiye ko hashyirwaho ikigo kigenzura ubuziranenge bw’ibihangano bishyirwa ku mbuga nkoranyambaga?


Yanditswe na: Ubwanditsi     2020-12-18 03:36:50


Ese birakwiye ko hashyirwaho ikigo kigenzura ubuziranenge bw’ibihangano bishyirwa ku mbuga nkoranyambaga?

Leta ifite inshingano zo kurinda abenegihugu, kubashakira icyabagirira umumaro no kubungabunga ubuzima bwabo ni yo mpamvu muri iki gihe isi yose ihanganye n’icyorezo cya COVID-19, Leta yagiye ishyiraho ingamba zikomeye zo kurinda abenegihugu iki cyorezo.

Muri gahunda zashyizweho harimo gushyira igihugu cyose muri Guma mu Rugo, gusubika amashuri, gufunga insengero, kwambara udupfukamunwa, gufunga ibikorwa by’ubucuruzi hafi ya byose byinjizaga imisoro myinshi mu isanduku ya Leta. Ibi byose byakozwe ku neza yo kubungabunga ubuzima bw’abenegihugu kabone n’ubwo hari benshi baba batabyumvaga cyangwa ngo bibagwe neza.

Mu myaka ishize, u Rwanda rwashyizeho ingamba nyinshi zatumye abantu benshi cyane cyane urubyiruko bayoboka ikoranabuhanga ibintu byose bica ku ikoranabuhanga, imbuga nkoranyambaga ziriyongera, ibizivugirwaho biba byinshi n’ibindi.

Kuba urubyiruko arirwo rugize umubare munini w’abakurikirana ibi bikorwa by’imyidagaduro: indirimbo, Filimi, ibiganiro, n’ibindi bitambuka ku mbuga nkoranyambaga kandi abazikoresha (ba nyirimbuga nkoranyambaga) abenshi ari abashakira inyungu mu bwinshi (mubare) bw’abakurikiranye ibiganiro byashyizwe kuri izo mbuga nkoranyambaga batitaye ku ngaruka bizagira ku bazireba, bituma abenshi bashyiraho ibintu bikurura abazijyaho bishobora gushyira mu kaga ubuzima bw’ababikurikirana cyane cyane abana n’urubyiruko.

Iyo ukurikiranye neza indirimbo zitandukanye ziri gucurangwa kuri Radiyo no ku mbuga nkoranyambaga nka :Youtube, instgram n’izindi usanga ari indirimbo zuzuyemo amagambo yo kwamamaza ubusambanyi, zikangurira urubyiruko gukora ubusambanyi, kunywa ibisindisha n’ibiyobyabwenge muri rusange, kwerekana ko urukundo nyarwo rushingiye ku mibonano mpuzabitsina n’ibindi.

Ugenzuye neza ibivugirwa muri izo ndirimbo, umubare w’abazikurikira, uburyo radiyo zizicuranga batitaye ku butumwa bubi buzikubiyemo, uburyo abana n’urubyiruko bazifata mu mutwe bazisubiramo kandi bagerageza gukora ibikubiye mu mashusho baba babonye muri izo ndirimbo, ubona ko ari ikibazo gikomeye kibangamiye umuco nyarwanda n’ejo hazaza h’abana n’urubyiruko bari kuzumva uyu munsi.

Abahanga mu mitekerereze ya muntu, bahamya ko indirimbo ari cyo kintu cyonyine gishobora guhindura imitekerereze ya muntu n’imyitwarire mu buryo bworoshye kandi zishobora kwifashishwa mu kwimakaza umuco no kuwutoza abakiri bato cyangwa kuwangiza no kuwugoreka mu buryo bworoshye kuko indirimbo ni cyo cyonyine gikora ku marangamutima no kubitekerezo bya muntu icyarimwe. Biroroha gufata amagambo no kwigana ibikorwa: nk’amashusho, imyambarire, imigendere, imivugire, inyogosho n’ibindi biri mu ndirimbo kuruta ibyo umuntu yigiye ahandi.

Mu mateka y’isi na Muzika, byagaragaye ko indirimbo zakoreshejwe mu gusenya umuco, kubiba ingengabitekerezo y’amacakubiri, gukangurira abantu kwigomeka, gukwirakwiza ingeso z’ubusambanyi, kunywa ibiyobyabwenge n’ibindi. Iyo hatabayeho kugenzurira hafi ubutumwa butangwa mu ndirimbo biteza ikibazo gikomeye muri Sosiyete.

Indirimbo ni kimwe mu bintu byibanze umuntu akenera mu buzima bwa buri munsi, kandi n’iyo nzira ikomeye yizewe yihuta inyuzwamo ubutumwa, ubutanze akaba yizeye ko bugera ku bantu bose bo mu byiciro bitandukanye byo mu kigero gitandukanye.

Indirimbo niyo nzira ikomeye kandi yagiye ikoreshwa n’abantu batandukanye baba abanyepolitike, abihaye Imana, abaharanira impinduramatwara zitandukanye mu kugeza ubutumwa bwabo ku bantu mu rwego rwo guhindura imitekerereze yabo n’ibindi.

Indirimbo zikoreshwa mu icengezamatwara no mu guhindura imitekerereze y’abantu ikindi kandi indirimbo ni yo nzira yonyine yo kwigisha no kurinda umuco, indangagaciro z’igihugu: itsinda ry’abantu runaka ariko na none ku rundi ruhande indirimbo niyo ntwaro kirimbuzi yakunze gukoreshwa mu kubiba ingengabitekerezo mbi mu bice bitandukanye by’isi.

Nk’uko bigenwa n’amategeko cyane cyane Itegeko Nshinga rya Repubulika y’u Rwanda ryo muri 2003 nk’uko ryavuguruwe muri 2015 kugeza ubu, cyane cyane mu mutwe waryo wa kabiri, mu ngingo ya 8, umutwe wa gatatu mu ngingo ya 11, umutwe wa kane mu ngingo ya 18,19,38 n’iya 41 n’umutwe wa gatanu mu ngingo ya 47, rigaragaza ko Leta ifite inshingano zo kurinda umuco no kuwuteza imbere, kurinda umwana n’urubyiruko ikintu icyo aricyo cyose cyamuhungabanya mu mitekerereze, kubahiriza uburenganzira bwa muntu hirindwa icyahungabanya ituze rusange rya muntu, kubungabunga umuryango no kuwurinda icyawuhungabanya hibandwa cyane kuburenganzira bw’umwana n’umugore.

Mu ngingo zavuzwe z’Itegeko Nshinga, zigaragaza aho uburenganzira bwa buri wese butangirira n’aho bugarukira yaba mu gutanga ibitekerezo, imyemerere n’ibindi. Uburenganzira bwa buri wese, yaba umuhanzi, umunyamakuru, umuvugabutumwa, n’abandi bugarukira mu kubungabunga ituze rya rubanda.

Ingingo ya 38 y’Itegeko No 60/2018 ryo ku wa 22/8/2018 ryerekeye gukumira no guhana ibyaha bikoreshejwe ikoranabuhanga, ivuga ko umuntu wese, utangaza, wohereza cyangwa utuma hatangazwa ubutumwa ubwo ari bwo bwose bw’urukozasoni akoresheje mudasobwa cyangwa urusobe rwa mudasobwa, aba akoze icyaha. Iyo abihamijwe n’urukiko, ahanishwa igifungo kitari munsi y’amezi atandatu, ariko kitarenze imyaka ibiri, n’ihazabu y’amafaranga y’u Rwanda atari munsi ya miliyoni imwe, ariko atarenze miliyoni ebyiri.

Indirimbo y’ubahiriza igihugu cya Repubulika y’u Rwanda igice cya kabiri igira iti:” Horana Imana murage mwiza ibyo tugukesha ntibishyikirwa, umuco dusangiye uraturanga, ururimi rwacu rukaduhuza, ubwenge umutima, amaboko yacu nibigukungahaze bikwiye nuko utere imbere ubutitsa.”

Iki gice k’iyi ndirimbo kigaragaza neza icyo buri wese agomba gushyira imbere mu bikorwa bye bya buri munsi no mu burenganzira bwe mu nyungu z’igihugu: icya mbere ni ukumenya ko igihugu ari wo murage w’abenegihugu akaba ari nayo ngobyi ibahetse kandi inkingi zigize igihugu ni umuco (indangagaciro na kirazira) n’ururimi (ikinyarwanda), n’imyemerere mizima. Iyo umuntu afite indangagaciro na kirazira z’umuco bimufasha kugira ubwenge, umutima ukunda igihugu n’amaboko yo kugikorera maze kikabona gutera imbere. Ntibishoboka ko igihugu cyatera imbere mu gihe umuco n’ururimi byacyo byatakaye. Umunyarwanda yaciye umugani agira ati:"agahugu katagira umuco karacika."

Leta y’u Rwanda yashyizeho ibigo byinshi byo gukurikiranira hafi ibikorwa byihariye bishobora kugira ingaruka mbi ku buzima n’imibereho myiza y’abenegihugu. Muri ibyo twavuga: ikigo cy’igihugu kigenzura imirimo ifitiye igihugu akamaro(RURA), ikigo cy’igihugu cy’ubuziranenge (RSB), ikigo cy’igihugu gishizwe imiti n’ibiribwa (Rwanda FDA) n’ibindi.

Leta y’u Rwanda kandi yashyizeho amategeko atandukanye cyane cyane ayo kurengera abanyantegenke no guteza imbere uburenganzira bwa muntu aha twavuga: itegeko ryo kurwanya ihohoterwa rishingiye ku gitsina, itegeko ryo gukumira icuruzwa ry’abantu, itegeko ryo kurengera uburenganzira bw’umwana n’ubw’umugore, itegeko rihana gucuruza ibiyobyabwenge, itegeko rikumira kandi rigahana ibyaha bikorewe kuri murandasi n’ayandi.

Mu rwego rwo gukumira ingaruka zitezwa n’ibikorwa by’urukozasoni n’ibindi byatambutswa mu bihangano: indirimbo, Filimi, ibiganiro n’ibindi binyuzwa ku mbuga nkoranyambaga ni ngombwa kandi ni ingenzi cyane ko Leta yashyiraho ikigo gishinzwe kugenzura ubuziranenge bw’indirimbo n’ibindi bihangano bigiye guhabwa rubanda rurimo n’urubyiruko n’abana bato nkuko yashyizeho biriya bigo bindi twavuze haruguru. Ababyeyi n’umuryango muri rusange nabo bafite inshingano zo kwigisha abana n’urubyiruko ibyo bakwiye guhitamo kureba ndetse no kumva kandi bibafitiye umumaro.

Mu gihe nta gikozwe urubyiruko rugakomeza kwigishwa ku mugaragaro ubusambanyi nuko bukorwa binyuze mu bihangango binyuzwa ku mbuga nkoranyambaga, umusaruro wabyo uzakomeza kuba mubi ku muryango nyarwanda.

Source:igihe.com

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?