Ese birakwiriye ko umukristo yihorera?

Mu buzima birashoboka ko umuntu yagira ububasha ku wamuhemukiye akaba yashobora kumwitura ibihwanye n’ibyo yamukoreye. ariko twe nk’abakristo dukwiye gukurikiza itegeko ry’Imana rigira riti: “mukunde abanzi banyu, musabire ababarenganya”

Kwihorera imbere y’Imana ni icyaha kuko twebwe abantu ntidufite uburenganzira bwo kwitura inabi abayitugiriye ahubwo icyo dusabwa ni ukubasabira ku Mana yo muremyi wa byose niyo ifite ububasha bwo guhorera umukiranutsi wayo.

Bibiliya ibivugaho iki?
Umurongo w’ingenzi uvuga ukuri ku ngingo yo guhora uboneka mu isezerano rya kera mu gitabo cya Mose cyitwa Gutegeka kwa kabiri 32: 35 “guhora no kwitura ni ibyanjye, ubwo ibirenge byabo bizadandabirana. "Kuko umunsi w’ibyago byabo uri bugufi kandi ibigiye kubazaho bizatebuka” Aha Imana yabwiraga ubwoko bwa Israel bwari bwarayivuyeho ibateguza ko izabahana.

Mu isezerano rishya naho Imana yavuze ku ngingo yo kwihorera aho yabuzaga abantu kwitura inabi bagenzi babo babagiriye. Abaroma 12: 19 “ bakundwa ntimwihoranire ahubwo mureke Imana ihoreshe uburakari bwayo kuko byanditswe ngo guhora ni ukwanjye, nijye uzitura niko uwiteka avuga.”

Mu by’ukuri, guhora kw’Imana gutandukanye n’ukw’abantu. Guhora kwayo kuzuye gukiranuka kandi ihana abantu banze kuyumvira bakayimura mu mitima yabo maze bakimika ibigirwamana. Dukwiye gusenga Imana yo ubwayo ikaduhorera ku batugiriye nabi.

Umwanditsi wa Zaburi yasenze Imana ayisaba guhoresha gukiranuka kwayo kuruta uko we yakwihorera mu buryo budatunganye. N’ubwo abakiranutsi bababazwa ariko guhora si ukwabo ahubwo ni ukw’Imana yonyine. Imana ihora inzigo abanzi b’umuntu ikabahana.

Icyakora hari incuro ebyiri muri Bibiliya igihe Imana yahaye abantu uburenganzira bwo guhorera izina ryayo. Incuro ya mbere ni aho Abamidiyani bahohoteraga Abisilaheri. Icyo gihe igikombe cy’umujinya w’Imana yawusutse ku bamidiyani nibwo Imana yabwiye Mose kuyobora ubwoko bwayo mu rugamba rw’umwuka. Aha Mose yabikoze mu butware bw’Imana kandi barabanesheje. (Kubara 31: 1-2)

Incuro ya kabiri, abakristo dukwiye kwitondera amategeko Imana yadushyiriyeho kuko niyo ntwaro ikoresha iduhorera (1 Petero 2: 13-14) nk’uko byagendekeye Mose kuko ayo mategeko adakora ku giti cyayo ahubwo akora ku bw’umugambi w’Imana niyo ubwayo ihana abigometse ku mategeko yayo.

Ku bw’ibyo, nk’abakristo dukwiye gukurikiza itegeko ry’Imana ritubwira gukunda abanzi bacu kandi tugasabira abaturenganya. Nitubigenza dutyo tuzaba tunogeje umubano wacu n’Imana bityo izabasha kuduhorera aho kwihorera ubwacu.

Source: www.gotquestions.org