Dore uko watsinda intambara y’intekerezo mbi zihora mu mutima wawe

Mu mibereho yacu ya buri munsi, intekerezo mbi zijya zigaragara mu mitima yacu. Iyo tutazirwanije byihuse byuzura imitima yacu, bigatuma dutakaza ukwizera, bityo Imana ikaba itatwishimira (Abaheburayo 11:6). Burya Imana niyo irondora imitima yacu, ikamenyera kure ibyo twibwira mu mitima yacu Zaburi 139:1-6 kandi mu mitima yacu ninaho haturuka ibitekerezo bibi bimunga ubugingo (Matayo 15:18-19). Birakwiye ko turwanya imitekerereze mibi aho iva ikagera kandi mu buryo bwose, n’ubwo turi abantu, Imana izabidufashamo maze tugire imitima ifite intekerezo nziza zikomeza ubugingo bwacu.

Burya intekerezo mbi ntabwo zifata abadakijijwe gusa, ahubwo n’abantu bakijijwe zijya zibageraho. Nk’uko tubikesha urubuga Bibiliya.com, Dukuzumuremyi Fabrice yatanze ubuhamya bw’uko amaze kwakira Yesu nk’umwami n’umukiza w’Ubugingo bwe yakomeje guterwa n’intekerezo mbi zijyanye n’ubuhehesi, ariko agashima Imana ko ibyo yabimukijije. Yagize ati"

Niga mu mwaka wa kabiri w’amashuri ya kaminuza nibwo nakiriye Yesu nk‘ Umwami n’Umukiza w’Ubugingo bwanjye. Icyo gihe narimbayeho mu buzima bwa gisitari, rimwe na rimwe ngakora ibyaha mbyita kwisanzura, gusirimuka, kugendana n’igihe nandi mazina menshi. Icyo gihe najyaga nsomana n’abakobwa, nkinywera inzoga n’ibindi bibi byinshi. Umunsi umwe korari yo kuri kaminuza nigamo yari yakoze amasengesho y’Iminsi ibiri, mfa kujya gusengana nayo. Aho niho Yesu yamfatiye mpita niyemeza kuva mubyo narimo byose bidatunganye.

Maze gufata umwanzuro, nahisemo kwegera Yesu Kristo cyane, kugira ngo ampe imbaraga zo kureka ubwo buzima narimbayemo. Imana yarabikoze impa imbaraga, ariko kuva icyo gihe ntangira guterwa n’ibitekerezo byinshi byuzuye ubuhehesi. Nkajya mpora nsenga bikagenda igihe gito nk’iminsi ibiri, maze bikongera bikagaruka ntazi aho bivuye n’impamvu yabyo. Ibyo byanshaga intege kuko numvaga ko Imana yandakariye cyane. Ndashima Imana ko ntagicika intege byihuse ahubwo mpita mbinesha umutima wanjye ukongera ukagubwa neza."

Dore bimwe mubyadufasha kunesha intekerezo mbi zijya ziza mu mitima yacu.

Fabrice akomeza agira ati"Nk’uko nanjye byambayeho, nagerageje gukora ubushakashatsi, nsanga mu mibereho ya gikirisitu ya buri munsi bibaho ndetse bikanatuma hari abasubira inyuma cyangwa bakagwa. Ariko nta mpamvu yo gucika intege cyangwa kuganzwa n’ibiterezo bibi, kuko nta kinanira Yesu".

Intekerezo mbi si ubuhehesi gusa ahubwo n’izindi zose zijyanye n’imirimo ya kamere (Abagalatiya 5-19).

Tera intambwe ya mbere ubanze umenye ko ufite iki kibazo (wirinde kwihagararaho wibwira mu mutima wawe uti ’n’ubundi ndi umuntu bigomba kubaho). Numara kumenya ko intekerezo mbi zageze mu mutima wawe hita utangira kwinginga Imana uyisaba imbaraga zo kubinesha kandi ubikore vuba.

Ibuka yuko Imana yita kandi ikareba imitekerereze yacu n’ibikorwa byacu, nkuko zaburi 139 ibivuga.(Zaburi 139:1-24).

Ongera uzirikane ko Imana idashaka ko imitima yacu yuzuramo ibitekerezo bibi, nk’uko mu gihe cya Nowa Imana yarimbuye isi kubera ingeso mbi z’abantu n’imitekerereze mibi yari yuzuye mu mitima yabo (Itangiriro 6:5-7). Ikindi wongere wibuke ko mu mitima yacu ariho haturuka ibintu bihumanya abantu, aribyo bitekerezo bibi nko kwica, gusambana no guheheta .

Gerageza wuzuze ukuri guturuka ku ijambo ry’Imana mu mutima wawe (2 Timoteyo 3:16). Muri make ibitekerezo bibi byose byaje mu mutima wawe uzabyirukanisha ijambo ry’Imana. Tugomba gusoma bibiliya bikaba kimwe mu gice kigize ubuzima bwacu bwa buri munsi. Dukwiye gutunga ibyanditswe byera muri twe nk’uko Dawidi yabivuza neza ati: "Nabitse ijambo ryawe mu mutima wanjye kugira ngo ntagucumuraho" (Zaburi 119:11).

Ese imitekerereze mibi uko yaza kose wakwemera ukajya uyirwanya? Tangira uhereze Uwiteka ubuzima bwawe bwose ushyizemo n’ imitekerereze y’umutima wawe. Niba utarava mu byaha, emera ibyaha byawe uyu munsi mu kwizera, usabe Imana ko yaza mu mutima wawe kugira ngo ukizwe.

[email protected]