Dore intambara ikomeye ihoraho hagati y’Umwuka(...)

Kwamamaza

agakiza

Dore intambara ikomeye ihoraho hagati y’Umwuka na Kamere!


Yanditswe na: Ubwanditsi     2021-05-13 07:22:23


Dore intambara ikomeye ihoraho hagati y’Umwuka na Kamere!

Ndavuga nti “Muyoborwe n’Umwuka”, kuko ari bwo mutazakora ibyo kamere irarikira kuko kamere irarikira ibyo Umwuka yanga, kandi Umwuka yifuza ibyo kamere yanga kuko ibyo bihabanye, ni cyo gituma ibyo mushaka gukora atari byo mukora. Ariko niba muyoborwa n’Umwuka, ntimuba mugitwarwa n’amategeko. Abagaratiya 5:16-18

Umuntu arimo ibice 3: Igice cyambere cy’umuntu ni Umwuka, iyo tuvuga umwuka ntabwo tuba tuvuga umuyaga ahubwo Umwuka ni izina ry’umuntu wa gatatu imbere. Uwo muntu afite: Umutima, amaso ndetse n’amatwi[ Bibiliya irabivuga ngo ‘Imana ihumure amaso yanyu y’umutima’] iyo ivuga umutima iba ivuga Umwuka.

Uwo muntu (Umwuka) akurikirwa n’undi muntu wa kabiri: Ubugingo, nawe ni umuntu umeze nk’uko duteye( Afite umutwe, amaso, ibitekerezo, afite n’umutima). Uwo (Ubugingo), atwikiriwe n’uwa gatatu twita Umubiri ni iyi shusho y’inyuma mureba.

Ishusho y’umuntu iba itwikiriye Ubugingo, Ubugingo nabwo bugatwikira Umwuka. Rero haba urugamba, aho umubiri n’ubugingo bishudika bikaba umuntu umwe witwa Kamere( Ubusabane bw’ubugingo n’umubiri nibyo bibyara ijambo kamere). Hanyuma rero Umwuka ntushobora kugirana ubusabane nabo, ahubwo Umwuka ushaka kubitegeka nabyo bikavuga biti reka natwe tumutegeke! Noneho bakarwana.

Intebe y’Imana mu muntu iba mu mwuka, intebe y’umuntu kamerere iba mu bugingo, naho intebe y’ubwenge mu bitekerezo, iba mu mubiri(Serveau). Umubiri udufasha kugirana ubusabane n’ibintu byo hanze, naho Ubugingo budufasha kugirana ubusabane natwe( Njyewe ubwanjye) naho Umwuka, umfasha kugirana ubusabane n’Imana. Adamu yabumbwe mu gitaka, hanyuma Imana izana Umwuka ihumekere mu mazuru ye(Umwuka wari muri Adamu ukomoka ku Mana).

Guhura k’Umwuka w’Imana n’umubiri w’Adamu, byabyaye ubugingo. Ubugingo rero bukomoka habiri(Bufitanye isano n’Umubiri kandi bukagirana isano n’Umwuka). Rero birashoka ko ubugingo bushobora kwiyemeza kubana n’Umubiri burundu, cyangwa kubana n’Umwuka burundu. Ni nk’umwana uri hagati ababyeyi baratandukanye, umubyeyi atuye hamwe n’undi atuye ahandi, noneho bakabaza umwana guhitamo kubana na nyina cyangwa kubana na se.

Ubugingo rero bwo bwamaze guhitamo kubana n’Umubiri igihe Adamu yaguye, hanyuma Umwuka asigara ari wenyine( Ni nk’umubyeyi umwe wanzwe n’umwana, agumana agahinda igihe kirekire). Umwuka ahora ahendahenda Ubugingo ngo agaruke amujyane ku Mana, Ubugingo nabwo bukavuga buti njyewe nzomatana n’Umubiri( Arirwo rupfu) tuzasubirana mu butaka! Uzumva ijambo muri Bibiliya rivuga ngo ‘ Twari twarapfuye tuzize ibyaha’. Twarapfuye kuko Ubugingo bwafatanye n’Umubiri, hanyuma ingaruka ziba urupfu kuko uyu mubiri usubira mu butaka ugapfa.

Uru rugamba ruri hagati y’Umwuka na Kamere rero, ni urugamba rukomeye twe tugomba kugiramo uruhare bitewe no guhitamo kwacu. Mwibuke ibyo Paul yavuze ngo ‘Ibyiza nshaka gukora sibyo nkora, ahubwo nkora ibyo Kamere yifuza(Igihe cyose nifuza gukiranukira Imana ariko gukiranirwa kukaza mbere): Nifuza kuvuga neza ariko nkisanga navuze nabi, nifuza kugirira abantu neza ariko ngasanga nabagiriye nabi, nifuza kudakora icyaha ariko nkasanga nagikoze, nifuza kuvuga ukuri ariko nkasanga ikinyoma cyantanze imbere.

Ibi bizanwa n’uko Kamere ihora ihabanye n’Umwuka, aho Umwuka usaba ko uvuga ukuri kamere yo ikakubwira ngo beshya. Intambara ya Kamere n’Umwuka irahari, Bibiliya ibyita umuntu mushya n’umuntu wa kera, aho biba biturutse kuri Adamu wa kera na Adamu wa nyuma(Yesu Kristo). Adamu wa kera yaraguye ariko Adamu wa nyuma we yaratsinze, abakiri muri Kamere bakurikiza iby’Adamu wa mbere ariko abari mu Mwuka barakurikiza iby’ Adamu wa nyuma, Yesu Kristo.

Bibiliya ivuga ko “ Nkuko haje Adamu wa mbere wogoje abantu bose bagapfa, haje Adamu wa nyuma ariwo Mwuka utubeshaho mu bugingo buhoraho. Umuntu arakizwa ariko akisanga uburakari bukiri bwose, kubeshya bikirimo, utunyanga, gukora utuntu tudakwiriye tukiri muri we, ni kamere arimo arwana nayo. Iyo arangije gukora ibyo, umuntu w’imbere aramugaya hanyuma Umwuka akicuza(ngo ariko kuki nabikoze we?!), uwo ni umugayo w’umuntu w’imbere ariwe muntu mushya dufite muri Yesu. Urwo ni urugamba rukomeye!

Imana irifuza kwerekana abana bayo banesheje iyi kamere, bagendera mu mbaraga z’Umwuka. Bibiliya ivuga ko Kamere irarikira ibyo Umwuka yanga, Yesu yabwiye abigishwa be i Getsemani ngo ‘Umwuka arabishaka, ariko umubiri yananiwe’. Igihe cyose muri twebwe, Kamere idusaba gukora ibihabanye n’Umwuka, Umwuka ati’ Wiyirize iki cyumweru’, Kamere ati ’Urye iki cyumweru’. Umwuka ati ’Byuka usenge mu gicuku’ Kamere iti’ Ryama uzaba usenga’, Umwuka ati ’Fasha uriya muntu’, Kamere nayo iti ’Ibyo mfite nanjye ntibimpagije’.

Izo ni intambara duhoramo, ibyemezo byose dufata bya buri munsi bibanza guca mu rugamba rwa Kamere n’Umwuka. Kamere ikubwira ko ‘Ukoze ibi uratakaza, Umwuka akakubwira ngo bikore urunguka’. Igihe cyose Kamere yifuza ibibabaza Umwuka, Kamere ni umwanzi w’Umwuka. Pawulo yarwanye na Kamere ageza igihe anezeza Imana aravuga ngo ‘Meze nk’ibisukwa ku gicaniro’, yari ageze aho ashobora kunezeza Imana.

None se ko njye nawe turimo izi ngingo 3, Umwuka, Ubugingo na Kamere kandi Kamere yacu ikaba ikozwe n’Umubiri n’Ubugingo, twabitsinda dute kugira ngo duhore tunezeza Imana? Mwese icyo kibazo murakibaza! Agakiza.org, tubararikiye kutazacikwa n’igice cya kabiri kuri iyi nyigisho, aho tuzagaruka kubyo twakora kugira ngo dutsinde Kamere, tugere aho Imana ishaka.

Wareba kandi iyi nyigisho hano: INTAMBARA HAGATI Y’UMWUKA NA KAMERE MUNTU By Apostle Dr Paul M Gitwaza

Source: Dr. Paul Gitwaza Official

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?