Dore igitangaza ukwiriye kwakira mbere y’uko(...)

Kwamamaza

agakiza

Dore igitangaza ukwiriye kwakira mbere y’uko umwaka urangira.


Yanditswe na: Ubwanditsi     2020-12-24 17:34:52


Dore igitangaza ukwiriye kwakira mbere y’uko umwaka urangira.

Abantu barashaka ibitangaza batarakira Yesu ukora ibitangaza, abantu barashaka imigati batarashaka Yesu utanga imigati, abantu barashaka amahoro batarashaka Yesu utanga amahoro, abantu kandi barashaka ibyishimo batarakira Umwami w’ibyishimo.Ni ikihe gitangaza cyambere ukeneye kwakira?, ubundi igitangaza ni iki?.

Nuko umwana yatuvukiye duhawe umwana w’umuhungu, ubutware buzaba ku bitugu bye. Azitwa igitangaza, umujyanama, Imana ikomeye, Data wa twese uhoraho, Umwami w’amahoro. Yesaya 5: 9.

Muri iki gihe twitegura gusoza umwaka, twizihiza Noheli twifuje kugira icyo tuvuga ku ivuka rya Yesu ariko cyane tugaruka ku mazina 7 ya Yesu nk’uko twabibonye haruguru mu buhanuzi bwa Yesaya. Ni mu kiganiro‘ Ubutumwa bukiza’ kinyura kuri Agakiza Tv hamwe na Pasiteri Desire. Muri iyi nyigisho yacu turaganira kuri iri zina rya kabiri rya Yesu nkuko Yesaya yabihanuye, ‘ Igitangaza’.

Igitangaza ni iki?

Igitangza ni ikintu siyansi itemera, igitangaza ni ikintu mu buryo bw’abantu kidashoboka. Igitangaza ni ikintu Imana ikoze kubw’imbaraga zayo ariko kubw’abantu kitashobokaga. Twatanga urugero nko mu gihe cya Nowa, Imana yamukirishije inkuge mu minsi mirongo ine n’amajoro miro ngo ine harokoka abantu umunani. Cyari igitangaza, nibwo bwa mbere imvura yari iguye ku isi, nta kindi gihe bari barabonye imvura.

Abisiraheli bava muri Egiputa kugira ngo Farawo yemere kubarekura, hakozwe ibitangaza icumi bidashidikanywaho. Abisiraheli kwambuka inyanja itukura ifite metero ibihumbi bibiri z’ubujyakuzimu, nacyo ni igitangaza. Ibitangaza byagiye bikorwa nkuko Bibiliya ibigaragaza ni byinshi ariko byose Yesu niwe wari ubiri inyuma.

‘Azitwa igitangaza’

Ibitangaza Yesu yakoze ni byinshi nubwo handitswe 40 gusa. Abanditsi bahamya ko iyo byose byandikwa batari kubona igitabo byakwirwamo kuko Yesu nawe ubwe yari igitangaza.

Abantu bazi ibyo kubyara murabizi ko intanga ngabo iyo idahuye n’intanga ngore, bidashoboka ko umwana aboneka, ibi kandi niko no mu byaremwe bindi bimeze. Nyamara Yesu we yavutse nta mugabo. Murabizi ko iyo ujugunye ikintu mu kirere kiragarauka kubera imbaraga za rukuruzi, ariko Yesu we yarazamutse aragenda aguma yo. Yesu yagendeye hejuru y’inyanja, ibintu kugeza uyu munsi ntawe urabyigana, siyansi ntiyabishobora.

Murabizi ko Yesu yahagije abantu ibihumbi bitanu imigati itanu n’ifi ebyiri, ni igitangaza abantu batakwigana. Murabizi ko iyo umuntu yapfuye adashobora kuzuka ariko Yesu we yazuye Lazaro. Ibi byose n’ibindi tutavuze ni ibigaragaza ko Yesu ari igitangaza.

Abantu benshi barashaka kubakira ubuzima bwabo ku bitangaza. Ariko ikibabaje ni ikihe?, Abantu barashaka ibitangaza batarakira Yesu ukora ibitangaza, abantu barashaka imigati batarashaka Yesu utanga imigati, abantu barashaka amahoro batarashaka Yesu utanga amahoro, abantu kandi barashaka ibyishimo batarakira Umwami w’ibyishimo.

Hari abantu benshi babana na Yesu kuko abakorera ibitangaza: Kuko yamuhaye akazi, kuko yamuhaye umugabo, kuko yamuhaye kubyara, kuko yamuhaye gutera imbere, kuko yamuhaye kwiga agatsinda, kuko yazamuwe mu ntera mu kazi ariko muby’ukuri akaba atarigeze agirana isano n’Imana. Mu isengesho rya Data wa twese, hatangira havuga ngo ‘ Data wa twese’, Imana igomba kubanza kukubyara ikakubera so, hanyuma ibyo agukorera bikaba biri mu nshingano ze nk’umubyeyi kuko yabanje kukubyara.

Ese wigeze uhura na Yesu?, wigeze ugira agahinda gatera kwihana kuticuzwa, wigeze usobanukirwa ko ibihembo by’ibyaha ari urupfu, impano y’Imana ari ubugingo buhoraho?. Wigeze usobanukirwa ko ukwiye guhinduka ukakira Kristo mu buzima bwawe?, wigeze ubabazwa n’ingeso mbi ugenderamo?.

Iyo ugeze muri Kristo Yesu, ubuzima bwawe burahinduka. Uba wakiriye igitangaza kiruta ibindi byose, iyo ugeze muri Kristo Yesu uba uvutse ubwa kabiri, uba ubonye uburenganzira kubyo Imana ikora n’ibyo itanga kuko Imana ari umubyeyi.

Wifuza kwakira iki gitangaza?

Igitangaza cya mbere cyakorwa, ni ukwemera ko uri umunyabyaha. Igitangaza cya mbere wakwakira, ni uko wabona imbaraga zikubuza gusambana. Igitangaza cya mbere cyakorwa, ni uko wabona imbaraga zikubuza kubeshya, igitangaza cya mbere wakwakira ni uko wabona imbaraga zikubatura ku ngeso zakunaniye. Igitangaza cya mbere wakwakira ni uko uhinduka kuba umwana w’Imana, ugatandukana n’ibisekuru bibandwa, biterekera, bangana.

Igitangaza cya mbere wakwakira ni uko uvuka ubwakabiri, ukamenya icyo waremewe ugasohoza umuhamagaro wawe. Igitangaza ukwiriye kwakira ni uko ubuntu bw’Imana bukwiriye kuza mu buzima bwawe, ukabaho ubuzima bwejejwe butanduye.

Reba hano inyigisho: Igitangza ni iki?. Dore igitangaza ukwiriye kwakira mbere y’uko umwaka urangira.

Source: Agakiza Tv

[email protected],org

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?