Dore ibibazo 5 ugomba kubaza umukobwa(...)

Kwamamaza

agakiza

Dore ibibazo 5 ugomba kubaza umukobwa /umuhungu mugiye kubana-Pst Jean Baptiste Tuyizere


Yanditswe na: Ubwanditsi     2021-09-09 07:02:03


Dore ibibazo 5 ugomba kubaza umukobwa /umuhungu mugiye kubana-Pst Jean Baptiste Tuyizere

Hari ibibazo 5 ugomba kubaza umuntu ukujyanye mu rukundo, yakubonera igisubizo cyabyo mugakomeza. Mbere y’ibyo bibazo ariko ni na byiza ko ubanza ukamenya(ukanamubaza) ngo urukundo ni iki?

‘Urukundo ni iki?’ Hari abantu bajya mu rukundo batazi ngo urukundo ni iki? Urukundo ni “Imbaraga zituma ugukunda atakaza, areka ibyo yakundaga cyaneee! nk’ibyiza(Qualités) akakira ibyo wowe ufite nk’ibibi( Défauts) [Urukundo ni imbaraga zituma umuntu akwakira muri we, ariko mu kukwakira agatakaza 50% y’ibyo yakundaga ariko udafite, akakira 50% y’ibyo yangaga ariko bikuranga.]

Ibyo akabyemera kandi akabyakira. Ku musaraba burya Yesu yagaragaje urukundo, ni yo mpamvu Bibiliya itubwira ngo “Umusaraba ni imbaraga ihesha uwizera wese agakiza”. Urukundo ni imbaraga ikwakira, atari uko wagize amaguru meza yakundaga, atari uko wambaye mukondowazi yakundaga, akavuga ngo nubwo nakundaga ibi,… bitagaragara kuri we, reka mwakire ibi nemere mbisige!

Mbere yo kwinjira mu rukundo banza umubaze ibi bibazo 5

1.Uwo ugiye gukunda ni nde, urunzi?: Kumenya ngo uri nde, ni amateka yawe, ni aho uvuka, ni imyemerere yawe. Umuntu ugukunda agomba kwemera amateka yawe, akubaha ababyeyi bawe. Niba amateka yawe ukiri isugi, cyangwa ukaba warasambanye ariko ukaza kwihana ukakira Yesu nk’Umwami n’Umukiza w’ubugingo bwawe, ukavuga ngo sinzongera kuryamana n’undi muntu uwo ari we wese, ibyo agomba kubyubaha.

Wa mukobwa we, wa muhungu we, umuntu umaze kuryamana nawe uba usuzuguwe! Umuntu wese uzakubwira ngo muryamane kubera urukundo, ntabwo azaba yubashye Imana, umuryango, n’ababyeyi bawe, kandi nta n’ubwo aba akubashye.

Imyemerere yawe: Iyo amaze kwemera ko uri umukristo, agomba kumenya ko hariho itegeko rivuga ngo” Ntugasambane” Iyo atabyubashye, ntabwo aba agukunda.

2. Intego: Intego y’urukundo rwanyu izaba iyihe? Wa mukobwa we, wa muhungu we, umuntu wese ukujyanye mu rukundo akagera igihe akubwira ngo turyamane kugira ngo nemere yuko unkunda, menya yuko yateye ikirenge mu nzira y’irimbukiro. Kandi iyo ngeso aba akweretse nubwo mwazabana azayikuba inshuro 10, kuko muri fiyansaye nicyo gihe umuntu yitwararika. Niba uwo mukobwa, uwo muhungu yananiwe kwihangana ngo muzageze igihe cyo gushakana kandi musenga, muri abakristo, akakubwira ko agiye gupfa, umunsi azaba yagiye kwiga hanze bizagenda gute?

3. Urukundo rwacu rurerekeza he?: Hari insigamigani mu Kinyarwanda ivuga ngo “Yaje nk’iyagatera”. Mwa bakobwa mwe, hari abahungu baza nk’iya gatera! Mwa bahungu mwe, hari abakobwa baza nk’iya gatera! Akaza utazi iyo aturutse. Ugomba kumenya ngo uyu muntu ni uwahe, urukundo rwacu rutangiriye he ruzarangirira he?

4. Ni ryari?: Intego yacu y’urukundo izashyirwa mu bikorwa ryari? Dutangiye gukundana, uvuze ko intego ari ubukwe, buzaba ryari? Ukwiye kumenya ngo ni ibiki bikwiye kuvugwa muri fiyansaye. Ntabwo ari ukukubwira ngo ugira amaso meza nk’ayi nyana, si ukukubwira ngo aragukunda nkuko ifi ikunda amazi, ibyo ni ibinyoma! Agomba kukubwira ngo ni ryari, niduhura tuzaganira iki, mukagirana ikiganiro-mpaka mbere yuko mubana kandi mukirinda.

5. Ibyo umbwira bizashoboka bite?: "Nzakugurira Convetion" , nibyo, ariko nagusobanurire, bizashoboka gute? Agomba kugusobanurira, bizagerwaho bite kandi kubera iki ari njye wahisemo. Turirimba muri Korari imwe, dutuye hano turi abakobwa, abahungu bangana gutya, wankundiye iki? Kubera ko hari abagukundiye yuko wihannye icyaha cy’ubusambanyi, bati’Uriya wahaye abandi nanjye yampa da!’ Wenda bagukundiye yuko ukuvugishije wese useka, cyangwa ni ugushaka kunezeza irari ry’umubiri we.

Abantu benshi bikundira mu bandi bakagira ngo nibo bakunze!

Kwikundira mu muntu ni ukumwiremamo ngahaza irari ryanjye muri we, we agatekereza ko ari we nakunze. Akenshi dukunda kuvuga ngo”Nkunda ifi weee!” ariko urukundo uyikunda, ruyikura mu mazi igapfa! [… Noneho wajya kugura ibirungo ifi aho iri ikitera hejuru ngo uriya muntu arankunda, arimo kungurira ibirungo] Hoya, ni ibirungo bituma upfa akagukaranga, akakurya. Umuntu rero ufite intego yo kukurya, nta kirungo atakugurira kugira ngo umuryohere [Hari abakubwira ngo yanguriye Rava] si wowe yayiguriye, yagira ngo umuryohere kugira ngo abone uko akurya! (Babyita kurya abana).

Ibyo ni byo bibazo ukwiye kubaza uwo mugiye kujya mu rukundo: Urukundo ni iki?, kubera iki ari njye wahisemo?, ni ryari tuzabana, hehe, bizaba mu zihe nzira, yabisubiza mukajya mu rukundo, yadidimanga ukamubwira ngo caho!(genda), uri intumwa ya Satani.

Inyigisho yatanzwe na Pasiteri Jean Bpatiste Tuyizere kuri Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?