Amateka yaranze intwari yo kwizera John(...)

Kwamamaza

agakiza

Amateka yaranze intwari yo kwizera John Newton


Yanditswe na: Ubwanditsi     2021-05-27 04:23:39


Amateka yaranze intwari yo kwizera John Newton

John Newton wamenyekanye cyane mu mateka ya Gikristo ndetse no mu ndirimbo “Amazing Grace” bisobanura “Ubuntu Butangaje ” yabanje kwigaragura mu byaha byinshi bitandukanye, ndetse yagize uruhare mu icuruzwa ry’abacakara, ariko nyuma yaje kwakira Yesu nk’Umwami n’Umukiza w’Ubugingo bwe ndetse akora ibikorwa by’indashyikirwa ku murimo w’Imana.

Newton yavukiye i Londres mu 1725 se yakoreraga mu nyanja naho nyina yubahaga Imana. Newton yakurikiye se mu nyanja afite imyaka cumi n’umwe ariko yanga urunuka kwizera kwa nyina bituma aba umusore wigometse, wiyandarika bimugiraho ingaruka zo gutakaza akazi keza. afite imyaka cumi n’icyenda, yagiye mu gatsiko k’abarwanyi barwanira mu mazi, ariko bigeraho abivamo ahita atangira kwinjira mu icuruzwa ry’abacakara abavana muri Afurika abajyana muri Amerika ya Ruguru. Ubwo bucuruzi bwaje guteza amakimbirane , Newton, amaze kugira abanzi benshi, yisanze asigaye muri Afurika na bagenzi be kandi akorerwa ubugome amezi cumi n’umunani.

Igihe Newton yarekurwaga mu 1748 nta kimenyetso yagaragaje cyo kwihana. Nubwo byari bimeze bityo ariko, ubwo yasubiraga mu Bwongereza ubwato bwe bwibasiwe n’umuhengeri ukaze. Ubwo ubwato bwatangiraga kurohama Newton yatangiye gusenga, yirundumurira mu mbabazi z’Imana. Byaje kugeraho ubwato bushobora gusubira inyuma amahoro mu birwa byabongereza ararokoka. Nubwo nyuma Newton yatekereje ku isengesho rye kugira ngo yerekane igihe cyo guhinduka kwe yagombaga kwandika ati: ’Sinshobora kwibwira ko nizera, mu buryo bwuzuye bw’ijambo, kugeza igihe kitari gito nyuma yaho.’ Icyakora, impinduka zari zatangiye kandi Newton yatangiye gusenga no gusoma Bibiliya.

Mu 1750, Newton yashakanye na Polly Catlett, bamaranye imyaka mirongo ine bishimye, n’ubwo batigeze babona urubyaro mu rushako rwabo. Yagarutse gukorera mu mato y’abacakara, akora ingendo eshatu ayoboye ubwato kandi yasaga nk’aho yirengagije itandukaniro iryo ari ryo ryose riri hagati y’ubucuruzi bwe n’ukwemera kwe.

Afite imyaka makumyabiri n’icyenda, nyuma yo kugira uburwayi, Newton yaretse ubwato bwo mu nyanja ahubwo afata akazi ku cyambu cya Liverpool. Ahongaho ubuzima bwe bwa gikristo bwatangiye kumera neza kuko yaje kuyoborwa n’ababwirizabutumwa bakomeye b’ububyutse bwa Metodiste, John na Charles Wesley na George Whitefield. Ubuzima bwa Newton bwarahindutse maze agira uruhare mu busabane bw’ivugabutumwa ndetse ategura kwiga Bibiliya. Bashatse kumwimika mu Itorero ry’Ubwongereza imyaka itari mike, ariko biranga kubera ko atari afite impamyabumenyi ibimwemerera.

Hanyuma , abifashijwemo n’umuterankunga ukomeye, Newton yahawe inshingano zo kuyobora muri Buckinghamshire. Yabaye Umupasitori warangwaga n’ishyaka, wiyemeje kandi wita ku kwigisha Bibiliya kandi akamamaza ubutumwa bw’ukuri kandi bufite akamaro ndetse yaguye itorero rye. Yanditse kandi ibitabo byamugejeje ku bantu benshi.

Nyuma y’imyaka cumi n’itandatu akora umurimo utanga umusaruro muri Olney, Newton yimukiye mu rusengero rwumujyi wa Londres mu 1780. Ahongaho yabashije kuba umunyembaraga ukaze, afasha, agira inama kandi ateza imbere ivugabutumwa mu buryo bwose. Igihe umunyapolitiki ukiri muto William Wilberforce yahindurwaga akaba umukristo maze akagerageza kuva muri politiki akajya mu rusengero, Newton yamuteye inkunga yo kuguma muri politke no ’gukorera Imana aho yari ari’.

Byageze aho impumeko y’igihugu irahinduka bahagurukira kurwanya ubucakara. Icyo gihe Newton yari agifite agahinda kubera uruhare rwe bwite mu icuruzwa ry’abacakara mu myaka ibarirwa muri za mirongo, yanditse igitabo gikubiyemo- ’Ibitekerezo ku bucuruzi bw’abacakara bo muri Afurika’ -ashingiye ku byamubayeho. Iyo nyandiko yarakwirakwiriye cyane kandi ikoreshwa cyane mu gufasha Wilberforce mu gikorwa cye cyiza cyo kurwanya ubucuruzi bw’abacakara.

Mu myaka ye ya nyuma Newton yabaye umuvugizi mukuru w’itorero ry’ivugabutumwa mu Bwongereza, akora ibishoboka byose kugira ngo yamamaze ubutumwa bwiza; ashyigikira abakozi mu madini yose no gufasha gushinga Umuryango w’Abamisiyoneri b’Itorero ndetse n’Umuryango wa Bibiliya. Newton yapfuye mu 1807 afite imyaka mirongo inani n’ibiri, Yari amaze imyaka mirongo itanu akorera Kristo.

Dore ibintu bine by’ingenzi dukwiriye kwigira kuri John Newton:

Icya mbere: Guhinduka kwe. Guhinduka kwa Newton ava mu buzima bubi cyane akaba umukozi wImana wuje ubuntu, byigisha ubushobozi bwo guhindura ubuzima nyuma yo guhura na Kristo. Kandi uko waba witwara kose Kristo araguhindura.

Icya kabiri: Tubona ihame ryo guhinduka: Amateka ya Newton aratwibutsa ko mugihe tudashobora kwikiza, Imana irashobishoboye kandi irabikora. Mu magambo ari mu ndirimbo ye ’Amazing Grace’, Newton yaje ku Mana nk’ umugome, udakwiriye, uwazimiye n’ impumyi’ nyamara Kristo aramukiza.

Icya gatatu: Tubona urugendo rwo guhinduka. Twese dukunda kumva inkuru z’ukuntu umuntuyahindutse akava mu byaha agasanga Kristo nk’uko byagendekeye Newton. Tugomba kwibutswa ko rimwe na rimwe bishobora gufata igihe kirekire nyuma yo kubiba imbuto kugira ngo zitange umusaruro.

Icya kane:Tubona umusaruro wo guhinduka: Newton yakiriye ubuntu busaga. Ariko icy’ingenzi tugomba kumenya ni uko nyuma yo kwakira ubuntu yabusangije abandi. Ubuntu Newton yahawe n’Imana yabukoresheje mu guhindura ubuzima bwa benshi ku isi.

Muri macye, amwe mu magambo Newton yavuze bwa nyuma ni aya: Kwibuka kwanjye kurashize, ariko ndibuka ibintu 2: Ndi umunyabyaha ukomeye naho Yesu ni Umukiza ukomeye. Amen!

www.canonjjohn.com

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?