Ahantu honyine nakurangira ukagira uburuhukiro

Kwamamaza

agakiza

Ahantu honyine nakurangira ukagira uburuhukiro bw’ukuri, ni muri Kristo Yesu


Yanditswe na: Ubwanditsi     2021-04-02 02:22:15


Ahantu honyine nakurangira ukagira uburuhukiro bw’ukuri, ni muri Kristo Yesu

“Mwese abarushye n’abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu, kuko kunkorera kutaruhije, n’umutwaro wanjye utaremereye.”Matayo 11:28-30

Abantu benshi bararushye kandi ahantu hose, hari ubwo umuntu avuga ati’ Ndamutse ndongowe/ ndongoye nkagera mu rugo rwanjye nagira amahoro’. Ariko se abantu bose bageze mu ngo zabo bose bararuhutse? Si bose. Hari igihe umuntu avuga ati’Ndamutse mbonye imodoka nkareka kugendesha amaguru, wenda naruhuka’. Ariko se nta bantu baruhiye mu modoka nziza bagenda bata amarira?

Hari umuntu ukubwira ati’Ndamutse mvuye mu bukode nkagira iwanjye naruhuka’. Ariko se nta bantu bafite inzu nziza z’ibitabashwa barara badasinziriye?. Hari igihe umuntu akubwira ati’ Ndamutse mvuye mu bushomeri nkabona akazi keza kampemba neza, wenda naruhuka’ ariko se nta bantu bafite akazi bagira stress kugera ubwo bananirwa no gukora? Hari igihe umuntu akubwira ati’ Ndamutse nimutse muri Afurika wenda nkajya kuba mu wundi mu gabane naruhuka’.

Ese koko abatuye mu yindi migabane: Muri Amerika, Aziya n’ahandi bose bararuhutse, cyangwa hari abantu bicuza n’impamvu bagiyeyo? Yego si bose ariko abenshi ntibabuze ibibaruhije. Hari igihe umuntu akubwira ati ndamutse nubashywe nkagira icyubahiro, murabizi ko abantu bakirwanira. Ariko hari igihe umuntu yubahwa inyuma ariko mu mutima we abizi ko arushye.

Icyubahiro ntikiruhura, amafaranga ntaruhura, izina rikomeye mu isi naryo ntiriruhura kuko tujya tubona abantu biyahura. Nta kindi kiruhura, usibye izina rya Yesu. Ahantu honyine nakurangira ukagira uburuhukiro bw’ukuri, ahantu waruhukira ukagira amahoro ukagubwa neza nakurangira ni muri Yesu Kristo honyine.

Nta rindi zina twahawe ryo gukirizwamo usibye izina rya Yesu, nta rindi zina ribohora ku isi hose usibye izina rya Yesu. Ni Yesu wenyine utanga amahoro, ni Yesu wenyine utanga kugubwa neza. Uzi ko aha imfubyi kuruhuka zikumva zinezerewe nta n’icyo zabonye! Umuntu akaririmba ngo’Ubwo Umwami Yesu ankunda ndi amahoro, no mu byago nzaririmba’. Umuntu akavuga ngo ‘Umubabaro ntacyo untwaye kuko nzawibagirirwa kwa Yesu’ akumva araruhutse kandi ibimurushya bihari.

Ni ryo tandukaniro ryo kuba mu isi no kuba muri Kristo Yesu. Isi itanga byose, ifite byose ariko icyo idafite ni amahoro! Niba hari ikintu abantu benshi mu isi bashoramo amafaranga menshi, ni ibyishimo ariko ntibibaruhura. Umuntu anywa inzoga azi ngo ariburuhuke zamuvaho akongera akaruha, umuntu yishora mu busambanyi azi ngo azaruhukirayo, ahubwo akarushaho kuruhirayo.

Umuntu agerageza kwambura no gukora ibishoboka byose ngo agire umutungo mwinshi azi ngo azaruhuka, ariko akaruhirayo.

Birababaje kuba abantu baruhiye mu isi ariko abandi bakaruhira muri Kristo Yesu

Uganiriye n’abantu bakorera Imana: Abashumba bashumbye amatorero kandi manini, wagira ngo baguwe neza, ariko abenshi bararushye! Ni abakozi b’Imana bake bakorera Imana bishimye, ni bake cyane! Abantu benshi baruhiye mu murimo: Urajya muri korari ugasanga bimyoza, wajya mu badiyakoni ugasanga barimyoza, wajya mu bapasitori ugasanga barimyoza. Ese ko aritwe turushye kandi dufite ibiruhura, twakagombye kubwira abandi kuruhuka?

Niba uririmba urukundo ufite uwo wanga, niba ubwira abandi kuruhuka kandi urushye, niba ubwira abandi amahoro kandi ufite amahoro make, ibitaragukijije nta wundi muntu byakiza. Ibitarakuruhuye ntabwo bishobora kuruhura abandi. Muri Kristo Yesu niho honyine abantu baruhukira.

Yesu ati” Mwese abarushye n’abaremerewe muze munsange ndabaruhura”

Nta muperezida wo ku isi watanga iryo tangazo, nta mukire wo ku isi watanga iryo tangazo kuko ntiyakiza isi. Isi yose irarushye kuva kuri Adamu, Yesu niwe wenyine wemeye kuruhura abarushye n’abaremerewe kandi aravuga ngo “Mwese”, abantu bose bo ku isi bamujeho babona uburuhukiro.

Hano twumve ko Yesu yahamagaye abarushye, iyo duhuye n’ibituruhisha icyambere dukora si ukumuzaho tubanza kwirwanirira. Aho umuntu yumva yihagije cyangwa akumva yakemura ibibazo mu bwenge bwe atabanje gushaka Yesu. Banza ugerageze, kora ibishoboka byose Yesu aragutegereje, igihe uzumva warushye ukumva niwe ufite ijambo ryanyuma ukamumanikira amaboko ukavuga ngo Mwami ni wowe usigaye, nagira ngo nkwizeze ko azakuruhura.

Umunsi uzumva ko Yesu ariwe buruhukiro bwawe ukamuzanira ibikugoye, ukabimwikoreza azakubera uburuhukiro.

Iyi nyigisho yateguwe ikanatambutswa na Pasiteri Habyarimana Desire kuri Agakiza Tv, wayireba hano.

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?