Agaciro k’ubuntu Imana yatugiriye

Kwamamaza

agakiza

Agaciro k’ubuntu Imana yatugiriye


Yanditswe na: Ubwanditsi     2021-06-21 08:05:49


Agaciro k’ubuntu Imana yatugiriye

Abakristo bamwe batekereza ko ibikorwa cyangwa imirimo bakora, ubumenyi mu bya Bibiliya cyangwa impano bafite bishobora kubahesha agakiza. Mbese ni iki umuntu yakora kugira ngo abone agakiza?

Efeso wari umujyi ukorerwamo ubucuruzi bukomeye. Abari bawutuye birataga urusengero rukomeye rwari rwarubakiwe ikigirwamana cy’Abaroma cyitwa Diyana.

Ni umujyi warimo abahakanyi benshi. Abakristo bari bawutuyemo na bo bibeshyaga ko ubukristo bwabo n’ibyo bagezeho babikesha ubwenge hamwe n’ibikorwa bakora. Ibi nibyo byabateraga ubwibone no kwishyira hejuru. Pawulo abandikira yari afite intego yo kubahugura no kubafasha gusobanukirwa ubuzima bahozemo mbere yo kumenya Yesu, n’uwo bakesha kuba barashoboye kubusohokamo. Mbere bari imbata z’ ibyaha by’uburyo bwinshi, bakoraga imihango ya gipagani, basengaga ibigirwamana, bayoborwaga na kamere muntu, bari abo gupfa. Kuba barahindutse abakristo, bakaba bari mu Itorero ni umugambi w’Imana batagizemo uruhare na ruto.

Ni umugambi Imana ubwayo yagize, ibitewe n’urukundo ikunda abantu yaremye, yiyemeza gutanga ku buntu Umwana wayo Yesu Kristo, kugira ngo uzamwizera wese azamushoboze kuva mu byaha, ahinduke umwana w’Imana.Agakiza ntikagurwa kandi ntikagurishwa. Gatangwa n’Imana ku buntu, binyuze mu kwizera urupfu no kuzuka bya Yesu. Kwizera imbaraga z’Imana zazuye Yesu Kristo mu bapfuye ni byo bikura umuntu mu mitekerereze, imyifatire n’ibikorwa bibi, bipfuye, nibyo bimugobotora mu migozi y’icyaha, akaba icyaremwe gishya kandi agatangira urugendo rw’imibereho n’ibikorwa bihamya uwo yizeye. Imirimo myiza, ubuhamya bwa gikristo ni imbuto z’agakiza umuntu aheshwa no kwitandukanya n’icyaha ndetse no kwizera Yesu Kristo.

Iyo mirimo n’iyo mibereho mishya bishoboka kandi byoroha kubera Yesu uba wakuyeho imbogamizi zabyo. Ni we wo kuratwa no gusingizwa. Bityo umukristo wakiriye agakiza aharanira kugaragaza imibereho n’ibikorwa bihamya imbaraga, urukundo n’ubuntu by’Imana. Ntacyo yirata ahubwo arata Imana imubeshejeho ku buntu, kandi imushoboza kugira uruhare rugaragara mu murimo wayo abereyeho gukora. Abefeso 2:1-10

Kuzirikana aho Imana yadukuye twebwe abakristo n’aho itugejeje, nta kiguzi dutanze kuko nta n’icyo twabona, ahubwo ibitewe n’urukundo rwayo, bikwiye kudutera guca bugufi, kongera imbaraga mu murimo wayo dukora, gutanga ibishoboka byose tunezerewe kandi tudategereje ko hari ubitubwiriza, kugira ngo duhamye ko koko imbaraga z’uwatuzuye ushobora byose ziri muri twe koko kandi zidukoreramo. Imirimo myiza umukristo umaze kwakira agakiza akora ni yo Imana yamuremeye, kugira ngo ihamye ko ari ikiremwa cyayo.

Bikwiye kandi kuduhindura abagira uruhare rufatika, mu gukura mu byaha no mu mibereho igayitse abakibirimo, uko ni ko guha agaciro ubuntu Imana yatugiriye. Imana ibitubashishe.

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?