Niki Yesu yujuje ubwo yemeraga urupfu rwo ku musaraba?

Kristo yahawe igihano kirusha ibindi kuba kibi kubw’ ibyaha byacu kugira ngo aduhe ubugingo tutari dukwiriye kubona. Bibiliya itubwirako Yesu Kristo yapfuye abambwe ku musaraba ku musozi Kaluvari. Urupfu n’izuka bye byahinduye isi yose, kandi kubw’ ibyo yakoze , abantu bose bo ku isi babonye amahirwe yo gukizwa bagirana umubano n’Imana ibakunda ,umubyeyi usumba ingoma zose.

Twese tuziko Kristo yapfuye ariko se kuki yagombaga gupfa muri buriya buryo, abambwe ku musaraba? Ashobora kuba yari gupfa urupfu rusanzwe rworoshye, nk’igihe yari kuba ageze muzabukuru cyangwa urundi rupfu nk’urw’abandi bapfa ariko siko yapfuye ahubwo yapfiriye ku musaraba I kaluvari nyuma yo gushinjwa ibyaha atigeze akora.

Amateka atubwira umusaraba nka kimwe mu gihano Umwami Yesu yahawe, wari kimwe mu bwoko bw’ibihano byahabwaga cyane abantu b’insuzugurwa babaga bahamijwe ibyaha. Umugabo witwa Don Stewart yavuze ko kubambwa bwari uburyo bwakoreshwaga n’Abaroma bahaga abanyabyaha boroheje, nk’abacakara, abakoze ibyaha bya politiki, ndetse n’igihano cyahawe abajura babiri bari impande za Kristo. Cyari igihano cy’ubugome. Muby’ukuri, cyari giteye isoni.

Umusaraba wasohoje ibyari byaranditswe n’umuhanuzi Yesaya53:9 hagiraga hati: “Bategetse ko ahambanwa n’abanyabyaha, yari kumwe n’umutunzi mu rupfu rwe nubwo atagiraga urugomo, kandi ntagire uburyarya mu kanwa ke.”. Kristo yahawe igihano cyari kigenewe gusa abagome.

Nanone reka tuzirikane amagambo aboneka mu Gutegeka kwa Kabiri21:21-23 , asozwa n’amagambo agira ati: “…… kuko umanitswe ku giti aba ari ikivume ku Mana.”

Abatambyi bakuru n’Abafarisayo bashutse abantu ngo basabe Kristo abambwe. Bizeragako iyo umuntu abambwe ku giti aba yaravumwe n’Imana. Ntibari baziko buzuza ibyavuzwe n’Umuhanuzi Yesaya.
“Ni ukuri intimba zacu ni zo yishyizeho, imibabaro yacu ni yo yikoreye, ariko twebweho twamutekereje nk’uwakubiswe n’Imana agacumitwa na yo, agahetamishwa n’imibabaro.” (Yesaya53:4)

Ese niki yakoze cyari gutuma abambwa ku musaraba?

Birashoboka ko wibaza icyaha Kristo yakoze cyatumye apfa ruriya rupfu. Bibiliya itubwirako Kristo mu buzima bwe hano ku isi, yabayeho ubuzima butagira icyaha . Kuko atagiraga icyaha , ni we wenyine wagerageje gukora ibyo gukiranuka kw’Imana no gukora ibyo ishaka. Abantu bose bagaragaraga nk’abanyabyaha imbere y’Imana( Abaroma3:23), nta n’umwe washoboye gukora ibyo Imana ishaka. Twese twari mu muvumo w’amategeko kuko nta muntu n’umwe washoboraga gukizwa.

Imana ubwayo yashakaga ko abantu bose bakira, ni yo mpamvu yemeye gutanga umwana wayo utaragiraga icyaha kugirango abambwe ku musaraba kugirango ajye mukimbo cyacu .

Mu gihe abatambyi bakuru batekerezagako bashobora kuburizamo ibyo Kristo akora , satani na we yatekerezagako azaburizamo ubutumwa bwa Kristo ariko ntibari baziko ibyo ari byo byamuzanye:
“kuko Utigeze kumenya icyaha Imana yamuhinduye kuba icyaha ku bwacu, kugira ngo muri we duhinduke gukiranuka kw’Imana.”(2Abakorinto5:21)

“Ni ukuri intimba zacu ni zo yishyizeho, imibabaro yacu ni yo yikoreye, ariko twebweho twamutekereje nk’uwakubiswe n’Imana agacumitwa na yo, agahetamishwa n’imibabaro.” (Yesaya53:4)

Yikoreye ibyaha byacu abyishyiraho, yemera guhabwa igihano cy’urupfu kubw’ibyaha byacu twese: “kuko ibihembo by’ibyaha ari urupfu, ….”(Abaroma6:23)

Niki Yesu yujuje ubwo yemeraga urupfu rwo ku musaraba?

Byaduhaye ubugingo

“….ariko impano y’Imana ni ubugingo buhoraho muri Yesu Kristo Umwami wacu.”(Abaroma6:23)

Byatubohoye gutwarwa n’amategeko

“Kristo yaducunguriye kugira ngo dukizwe umuvumo w’amategeko, ahindutse ikivume ku bwacu (kuko byanditswe ngo “Havumwe umuntu wese umanitswe ku giti”),.”(Abagatiya3:13)

Kumaraho imirimo ya satani

“Ukora ibyaha ni uwa Satani, kuko uhereye mbere na mbere Satani akora ibyaha. Ibyo Umwana w’Imana yerekaniwe ni ibi: ni ukugira ngo amareho imirimo ya Satani.”(1Yohana3:8)

Kristo yemeye urupfu rwo ku musaraba kugirango adukureho umuvumo w’icyaha kandi tuzaraganwe nawe ubugingo buhoraho, ni yo mpamvu dukwiye kureka ibyaha no guharanira gukora ibyo Imana ishaka .

Sophie @agakiza.org