Imbaraga, n’umumaro w’amasengesho / Ev. IKIREZI Esther

Petero agaruye umutima aribwira ati “Noneho menye by’ukuri yuko Umwami Imana yatumye marayika wayo, ikankura mu maboko ya Herode, ikankiza ibyo ubwoko bw’Abayuda bwatekerezaga byose.” Akibitekereza atyo, asohora kwa Mariya nyina wa Yohana wahimbwe Mariko, aho abantu benshi bari bateraniye basenga. Petero akomanga ku rugi rw’irembo, umuja witwaga Rode ajya kubyumva. Amenya ijwi rya Petero, ibinezaneza bimubuza gukingura, nuko yirukanka asubira mu nzu ababwira yuko Petero ahagaze ku irembo. Baramusubiza bati “Urasaze!” Ariko akomeza guhamya ko ari koko. Bati “Ahubwo ni marayika we.” (Ibyakozwe n’intumwa 12:11-15)

Bibiliya ivugako hari ku ngoma y’umwami witwa Herode kandi yari umwami w’Abayuda. Herode yakundaga gufatira ab’ itorero kubagirira nabi, yafashe umugabo witwa Yakobo amwicisha inkota, igikorwa akoze kinezeza imitima y’Abayuda noneho ashaka kwiyongeza Petero amugenze nkuko yagenje Yakobo ariko ashaka kumwiyongeza mu gihe kibi cyari mu gihe cy’iminsi mikuru idasembuwe kandi cyaraziraga kumena amaraso muri iyo minsi mikuru nicyo cyatumye amubika mu nzu y’imbohe ngo ategereze ko iminsi mikuru irangira. Akimushyira mu nzu y’imbohe ab’itorero bagira umwete wo gusenga, nubwo bibiliya itavuga iminsi basenze ariko bagize umwete wo gusenga.

Umuririmbyi wa mirongo itandatu na kabiri mu ndirimbo zo gushimisha yararimbye ngo mu gihe cyo gusenga amasengesho yacu agera kure atambuka nk’inyenyeri, agakomanga ku rugi ushaka kureba Imana igice cya nyuma kiravugango ndetse n’umwana muto uzi gusenga Imana ntabwo azagira ubwoba azafashwa no gusenga.
Kimwe n’abantu b’itorero rero ubwo bafungaga Petero yagize umwete barasenga hanyuma amasengesho yabo agera ku Mana kandi Petero yararindishijwe abasirikari cumi n’abatandatu, urebye yari bupfe ariko kubw’imbaraga z’amasengesho yab’itorero ijuru rihita ryohereza marayika Mikayeli amusanga muri gereza.

Ubundi iyo imbaraga z’amashuri, uz’umuryango, iz’amafaranga zose iyo zije zica mu miryango ifunguye ariko imbaraga z’amasengesho iyo zije zishakira inzira, niyo mpamvu ntawusenga akina. Marayika yamusanze muri gereza iminyururu iribwiriza ihita ifunguka , amukomanga mu mbavu aramubwirango kweta inkweto zawe aribwo butumwa bwiza, kenyera ariko kuri, hanyuma unkurikire, barenga abarinzi ba mbere, barenga aba kabiri bagera ku banyuma bageze ku rugi rw’irembo rukingishijwe iminyururu, urwo rugi ruribwiriza rurabikingurira nuko bahingukira mu nzira nyabagendwa.

Imana yigeze kubwira Kuro ngo ” Nzakujya imbere ahantu hataringaniye mparinganize,ibihindizo by’ibyimu nzabicamo kabiri, kandi nzakenyuruza abami ngukenyeze” Petero ahingukira kwa Mariya nyina wa Yohana wahimbwe Mariko , aho bari bateraniye basenga , akomanga ku rugi umuja wabo witwa Roda arabyumva amenyako ari Petero, ibinyamuneza bimubuza gukingura, agenda kubabwirako Petero ahagaze hanze , baramubaza ngo mbese urasaze , abasubizako ari muzima akomeza guhamya ko ariko kuri, bajya kureba basanga niwe.

Ndashaka kuvuga umukirisito ufite imbaraga z’amasengesho, cyane ko muri iyi minsi abantu barigusenga ariko ntambaraga z’amasengesho bafite. Dore ibiranga umuntu wagezweho n’imbaraga z’amasengesho.

1.Umuntu ufite imbaraga z’amasengesho yihana ibyaha n’ibicumuro: Dawidi yavuze ku kwihana ibyaha muri Zaburi 32, aravugango hahirwa umuntu wababariwe ibicumuro bye, ibyaha bye bigatwikirwa , hahirwa umuntu Uwiteka atabaraho gukiranirwa .

2.Umuntu ufite imbaraga z’amasengesho yihanganira ibimugerageza: Yakobo yabivuze neza ko hahirwa uwihanganira ibimugerageza kuko namara kwemerwa azahabwa ikamba ry’ubugingo, iryo Imana yasezeranyije abantu bayikunda , bivuze ngo hari n’abatayikunda.

3.Umuntu ufite imbaraga z’amasengesho aharanira kugira imirimo myiza kandi ntacogore: Umwanditsi w’igitabo cy’Abaheburayo yaravuzengo abashaka ubwiza n’icyubahiro no kudapfa babishakishe gukora ibyiza badacogora.

4.Umuntu ufite imbaraga z’amasengesho abana n’abantu bose amahoro:
Abaheburayo 12:14 haravugango mugire umwete wo kubana n’abantu bose amahoro nuwo kwezwa kuko utejejwe atazabona umwani Mana.

5.Umuntu ufite imbaraga z’amasengesho agira urukundo kandi yumvira mwuka wera:
Umuririmbyi wa 388 mu gitero cya nyuma yaravuzengo jya wumvira umwuka gwiza urukundo nta soni uzagira nubona Yesu. Impamvu mubona abantu batagikunda nuko nta mwuka wera ukibarimo.

6.Umuntu ufite imbaragaza z’amasengesho uhorana ibyiringiro:
Ibyiringiro bikenewe n’iby’igihe turimo ni iby’igihe kizaza. Dawidi yabivuze neza muri Zaburi 125 aravugango abantu biringiye Uwiteka bameze nk’umusozi wa siyoni utabashika kunyeganyezwa ahubwo uhora uhamye iteka, aravugango nkuko imisozi igose I Yerusalemu niko Uwiteka agose abantu be uhereye none ukageza iteka ryose.

7.Umuntu ufite imbaraga z’amasengesho agira imbabazi: Ababarira abantu atari uko baje kumusaba imbabazi, Yesu yavuze kuri uyu mutima aravugango utababarira mwenese nawe ntazababarirwa . Kandi udakunda mwenese abona ntabwo ashobora gukunda Imana atabona.

Hari imimaro yo gusenga :

1.Gusenga bisubiza intege mu bugingo: Iyo urimo gusenga, ni wowe bigirira umumaro cyane mu bugingo, umukirisito iyo adasenga aba apfuye.

2.Gusenga bigirira umuntu umumaro mu gihe turimo n’igihe kizaza: Ushobora gusenga uyu munsi ukabona Imana ntigusubije ,ikivumbura ukabivamo ariko iyo udacitse intege ubona inyungu z’igihe kirambye.

3.Gusenga bituma umuntu aba icyo abantu batatekerezagako azaba cyo:
Hari abantu bavuzeko tuzapfa tutabyaye ariko Imana itubonye iravugango tuzabyara ubu twarabyaye duhetse abana , hari abavuzeko tuzaba imbwa ariko Imana itubonye iduhindura abantu b’abagabo kandi bo kwifuzwa, abantu baratubonye babona ntacyo tuzimarira ariko Imana itubonye idusubiza agaciro. Esitaye yabaye umwamikazi ntawabikekaga na Moredakayi yabaye igisonga cy’umwami bugufi cyane Hamani yenda kumwica ariko amasengesho y’iminsi itatu bafashe yahinduye byinshi.Gusenga gufata mpiri ibitekerezwa mu mitima, Gusenga bikingura ijuru tukavugana n’Imana.


4.Gusenga bigirira itorero umumaro:
Iyo turi mu bihe byo gusenga abacu baguye barabyuka, abatarakizwa bakabona agakiza itorero rirunguka, n’abakijijwe bagasubizwamo imbaraga.

Umuririmbyi waririrmbye indirimbo ya 49 mu gushimisha Imana, yararirimbye ngo ibihe nsenga Uwiteka bintarura mu mpagarara, kugirango nigire aho Data ari muganyire ibyo nkena byose. Muri iyi minsi abantu bari guteshuka kuko batakiba mu bihe byo gusenga . Umuririmbyi yakomeje avugako ibi bihe byo gusenga bimuhumuriza umutima kandi atsinda ubukana bw’umwanzi mu bihe byo gusenga. Ibyaha birikugwira kuko abantu batakiba mu bihe byo gusenga babashe gutsinda ubukana bwa satani.

Ndumva nasenga nsabira abantu imbaraga. Data mu izina rya Yesu,turagusenze tugusaba ngo utugarurire imbaraga z’amasengesho , uduhe ibihe byacu byo gusenga satani yanyaze. Ibihe byacu byo gusenga satani yanyaze abagabo n’abagore n’itorero turabigaruje. Twoherereze imbaraga z’amasengesho kuko zirema ibintu bitariho bikabaho. Izo mbaraga nizo zakuye Petero mu nzu y’imbohe kuko ab’itorero bagize umwete wo kumwingingira Imana.

Mana rengerea abantu bose baguye bakava mu byizerwa babuze imbaraga z’amasengesho, ubagarurire ibihe byiza byo gusenga,ubongerere ububyutse. Rengera abananiwe kugutegereza kandi bafite amasezerano bongerere izo mbaraga, babashe kukuririndira. Udushoboze gusenga dukora n’imirimo, dutinya icyaha n’igisa nacyo duhindishwa umushyitsi n’ijambo ryawe.

[email protected]