Ni gute wagera ku ntebe y’ubuntu?

“Nuko ubwo dufite umutambyi mukuru ukomeye wagiye mu ijuru, ari we Yesu Umwana w’Imana, dukomeze ibyo twizera tukabyatura. Kuko tudafite umutambyi mukuru utabasha kubabarana natwe mu ntege nke zacu, ahubwo yageragejwe uburyo bwose nkatwe, keretse yuko atigeze akora icyaha. Nuko rero, twegere intebe y’ubuntu tudatinya, kugira ngo tubabarirwe tubone ubuntu bwo kudutabara mu gihe gikwiriye.”(Abaheburayo4:14-16)

Bibiliya idushishikariza kuza kwegera intebe y’ubuntu kugirango duhabwe imbabazi n’ubuntu tuzakenera mu bihe byigeragezwa. Igihe cyose twanze kwegera iyo ntebe y’ubuntu, tuba twiyimye ibyo dukeneye, tuba twiyimye imigisha yose twagenewe, tuba twanze ibyishimo byo kwa Data udukunda, utegereje ko tuza aho ari kandi witeguye kuduha imigisha yose byinyuze muri Kristo.(Abefeso1:3)

Ese urashaka kwegera intebe y’ubuntu? Aha hari inama n’amabwiriza ku babyifuza:

Menyako ntacyo wakora hatabaye ubuntu bwa Kristo: Mbere na mbere, ukeneye kumenyako ukeneye ubuntu bw’Imana. Ukeneye ubu buntu kuri buri kintu cyose cyo muri ubu buzima. Umwami Yesu ubwe yaravuze ati:

“Ni jye muzabibu, namwe muri amashami. Uguma muri jye nanjye nkaguma muri we, uwo ni we wera imbuto nyinshi, kuko ari nta cyo mubasha gukora mutamfite.”(Yohana15:5)

Ntacyo uba uri cyo igihe udafite Imana. Ntiwashobora kubaho ubuzima Imana ishaka ko ubamo mugihe ukiri muby’umubiri. Ukwiye kumva ko nta Kristo ntacyo washobora gukora. Ubufasha bw’Imana bwagakwiye kugutera kuyegera.

Shimishwa n’ibyo Kristo yarangirije ku musaraba :Ukwiye kumenya ukanashimira icyo Imana yadukoreye:

Ni ukuri intimba zacu ni zo yishyizeho, imibabaro yacu ni yo yikoreye, ariko twebweho twamutekereje nk’uwakubiswe n’Imana agacumitwa na yo, agahetamishwa n’imibabaro. Nyamara ibicumuro byacu ni byo yacumitiwe, yashenjaguriwe gukiranirwa kwacu, igihano kiduhesha amahoro cyari kuri we, kandi imibyimba ye ni yo adukirisha. Twese twayobye nk’intama zizimiye, twese twabaye intatane, Uwiteka amushyiraho gukiranirwa kwacu twese.”(Yesaya53:4-6)

Kristo yabambwe mu cyimbo cyacu ahinduka umutambyi mukuru uhora atwumva akanadusabira(Abaheburayo7:25). Yishyuye igihano cy’ibyaha byacu twari guhabwa maze yemerwa n’Imana.

Kubwa Kristo, twabonye umudendezo wo kugera ku Mana igihe cyose n’aho turi hose. Uburyo bumwe bwadufasha guha icyubahiro umurimo wa Kristo ni ukwishimira amahirwe twabonye yo kwegera Imana nta kiguzi cyangwa ikimwaro.

Saba wizereko binyuze muri Kristo uzabihabwa: Ugomba kwibuka ko niba ushaka kugira icyo usaba Imana, ukwiye kugira ukwizera. Yesu yagize ati:

“Kandi ibyo muzasaba mwizeye muzabihabwa byose.”(Matayo21:22)
Igihe dusenga, dukwiye gusengana ukwizera. Abaheburayo11:1 hatubwirako kwizera “ari ukumenya rwose ibyiringirwa udashidikanya ko bitazaba, kandi ni ko kuduhamiriza ibyo tutareba ko ari iby’ukuri”. N’ubwo tutabonesha amaso ibyo dusaba ariko mu kwizera tuba twizeyeko ibyo twasabye bizatugeraho.

Birakwiye kwegera intebe y’ubuntu, kuko ariho tuzababarirwa ibyaha byacu byose bityo tukemererwa kwegera Imana tudafite isoni n’ ikimwaro

[email protected]