Dore bimwe mubiranga inkone mu by’umwuka

Abenshi muri twe ntibaziko bakwiriye kubaho ubuzima bw’umudendezo Kristo yishyuriye ugasanga barabaye icyo twakwita inkone mu by’’umwuka, badafite ubushobozi bwo kubaho ubuzima bwera imbuto.

Ese inkone mu by’ Umwuka ni bantu ki kandi ni gute wabamenya?

Tugendeye ku nkoranyamagambo(dictionnaire), inkone akenshi ni igitsina gabo. Baba ari abagabo badashobora kugira abana kuko baba batagifite ubushobozi bubatera kubyara. Tugendeye kuri ubu busobanuro, inkone muby’umwuka ni abizera badafite ubushobozi bwo kubaho ubuzima bwera imbuto z’umwuka kandi badafite imbaraga ziri muri Kristo.

Inkone zagiye zigaraga muri bibiliya, bari abagaragu b’umwami n’abagabekazi . Hari inkone yari ishinzwe kurinda abagore ku ngoma y’umwami Ahasuwerusi(Esiteri2 :3) indi nkone yari Umunyetiyopiya , umutware w’umunyabyuma w’ibintu by’umugabekazi wa Etiyopiya Kandake(Ibyakoz8 :27)

Bamwe mu nkone zamenyekanye zakoreraga Yezebeli, umugore wa Ahabu umwami wa Isirayeli (2Abami9 :32). Yezebeli yari umwamikazi w’umugome wakoreraga bayali agatera Isirayeli gucumura. Inkone ze zamukoreraga kubw’itegeko, ntizari zifite uburenganzira bwo kubaho mu mudendezo.

Bityo rero, inkone mu by’umwuka baba bitanga mu mirimo y’ubutumwa bwose ariko ntibashobora kubaho kubw’umugambi w’Imana kuko usanga bakora kubwo gushimisha abayobozi babo . kubaho kwabo basa nk’aho babyiteze ku bayobozi babo, kandi ntibashobora gukora icyo Imana ibashakaho.

Ubu ni bumwe mu buryo bwakumenyesha inkone zo mu mwuka :

Ese wifuza kubaho ubuzima bw’umudendezo buri muri Kristo? Niba ubyifuza , reka kuba inkone y’umwuka. Aha hari uburyo wamenya niba nawe uri umwe muri zo:

1.Wishimira guha icyubahiro bamwe mu bayobozi bagirana ubusabane n’umwuka

Inkone, zikunda gukora ahantu habugufi h’ahanyacyubahiro, bakagira ubutware ku bintu bya ba shebuja ariko ntibaba babifiteho ububasha. Kuba aho bituma abantu babamenya kandi bakabaha icyubahiro.
Kimwe na bamwe mu bagize itorero ry’uyu munsi barabikunda cyane, iyo baba hafi y’abashumba kuko baba batekerezako bari kumwe n’abantu b’abanyabwenge kandi batoranijwe . Uko baba hafi y’abayobozi babo niko bumva bafite agaciro , bakumva ari abasizwe ariko mu by’ukuri sibyo.

Abakristo benshi baharanira kwiyegereza abavugabutumwa cyangwa abahamagawe n’Imana bafite amatorero yagutse n’abayoboke benshi kuko baba batekerezako bazabazamukiraho. Babashakaho umubano kuko aba ariho bazabonera agaciro n’uburinzi.

2.Bakora ngo bashimishe abayobozi babo

Inkone zikora ibyo zitegetswe n’abashebuja. Inkone zo mu mwuka nazo zikora ngo zishimishe abantu babakuriye ndetse bashobora no gutanga imitungo yabo ngo babashimishe. Bakora uko bashoboye ngo bashimishe abo bantu, cyane cyane abayobozi b’itorero. Bamwe mu nkone z’umwuka bakora n’amasaha menshi kugirango bashimishe abayobozi babo. Bamwe muri bo bareka igihe bigeneraga, amafaranga n’imitungo yabo mu gushimisha abayobozi babo. Bibiliya itubwirako dukwiye kuba abantu bashimisha Imana , tudakwiye kubaho ubuzima bushimisha abantu.

3.Ntibasobanukirwa ibanga ryo kubaho ubuzima bwizewe bwo muri Kristo

Inkone z’umwuka zifuza kubaho ubuzima bw’umudendezo muri Kristo ariko ntibabishobora kuko baba barabaye abagaragu b’abayobozi babo bagize nk’ imana.
Bamwe mu bakozi b’itorero barambiwe kandi bananijwe na bimwe mubikorwa by’itorero. Bifuza kuruhuka ariko ntibabishobora kuko batekerezako abayobozi babo batazabyishimira nibagenza batyo. Bityo bagakomeza guhatiriza gukora uwo murimo n’ubwo baba batibonera umwanya wo gusoma bibiliya cyangwa gusenga byihariye. Bamwe mu bakristo ntibakunze kugira ubundi buzima bwo hanze y’urusengero barimo kuko baba batinyako igihe bazareka kugira icyo bahakora batazongera kwemerwa.

Abo barahari ariko ni icyerekana ko uri inkone. Numara kumenya uwo uri we ntucike intege. Ushobora kubaho ubuzima Imana igushakamo binyuze mu kwizera Kristo.
Inkone za Yezebeli zamukoreraga ngo zimushimishe ariko igihe Yehu, umuntu Imana yari yohereje yahageraga, izo nkone zabonye amahirwe yo kuba ab’umudendezo.

“Yehu arararama areba mu idirishya aravuga ati “Uwo dufatanije ni nde?” Nuko abagabo babiri b’inkone cyangwa batatu baramurunguruka. Arababwira ati “Nimumujugunye hasi.” Nuko bamujugunya hasi. Amaraso ye yimisha ku mazu no ku mafarashi, Yehu araza aramuribata.”(2Abami:9:32-33)
Umwami Yesu arakomeye cyane kuruta uyu Yehu. Ni we wadukijije ubutware bw’umwijima, abudukuramo atujyana mu bwami bwe.(Abakolosayi1:13)

Kubw’ibyo yakoze, dukwiye kudatinya ibyo abantu batekereza. Dukwiye kwibohora abantu bashaka kutugiraho ububasha. Dukwiye gukora ibiri mu bushake bw’Imana tutitaye ku byo abantu bashobora kuvuga kuko muri yo ariho dukura imigisha yose n’uburinzi bwose.

[email protected]