Ni gute twakwiyambura imitwaro ituremereye ?

Abakristo benshi ntibashobora kubaho ubuzima Imana ibashakamo kubera imitwaro baba bikoreye, ibakandamiza idatuma babaho ubuzima bw’umudendezo, ntibamenyako Umwami Yesu Kristo ashobora kuyibaruhura .

Abakristo benshi bashinja satani ko ari we utuma baremererwa, bakananirwa kumvako ari bo ubwabo bitera kuremererwa .

Bimwe mubiremerera abakristo benshi harimo: Irari ry’ubusambanyi, kwikubira, ubusambo, gukunda amafaranga n’imitungo, gufata abantu nk’imana,n’ibindi byinshi. Dukwiye kwibuka ko ibi byose bidashobora kuduhindura ngo tubikore uretse gusa tubyemereye.
Izi ni zimwe mu nzira zituma ari twe twitera imitwaro tugira: Kugira irari ryo gukora icyaha, kwanga kwihana ibyaha byacu no gukomeza gukora ibyaha .

Dore uko twaba ab’umudendezo ku bituremerera:

1. Kwihana ibyaha

“Nuko mwihane muhindukire, ibyaha byanyu bihanagurwe ngo iminsi yo guhemburwa ibone uko iza ituruka ku Mwami Imana. (Ibyakz3:19)

Niba dushaka gutura imitwaro ituboshye, dukwiye kwihana ibyaha bidutera kuremererwa. Ntidushobora kubohoka na rimwe niba tutabashije kureka ibyaha dukora.

2. Gukomeza kugendana na Yesu woza ibyaha

“Ariko rero iyo tugendeye mu mucyo nk’uko na yo iri mu mucyo, tuba dufatanije ubwacu kandi amaraso ya Yesu Umwana wayo atwezaho ibyaha byose.( 1Yohana1:7)

Nyuma yo kwihana ibyaha, dukwiriye gukomeza kugendana n’Umwami Yesu Kristo. Dukwiye kwiyanga tukamukurikira. “Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire” (Matayo16:24)

3. Kubaho mu mudendezo tudafite ibituremerera

“Nuko natwe ubwo tugoswe n’igicucu cy’abahamya bangana batyo, twiyambure ibituremerera byose n’icyaha kibasha kutwizingiraho vuba, dusiganirwe aho dutegekwa twihanganye dutumbira Yesu wenyine, ari we Banze ryo kwizera kandi ari we ugusohoza rwose, yihanganiye umusaraba ku bw’ibyishimo byamushyizwe imbere ntiyita ku isoni zawo, yicara iburyo bw’intebe y’Imana.”(Abaheburayo 12:1-2)

Niba twarababariwe ibyaha byacu, tugahamagarirwa gukurikira Kristo, reka twiyambure buri kintu kitubuza kumukurikira. Reka tuvuge oya ku byaha bitugira imbohe, ahubwo tubeho mu mudendezo muri Kristo.

Sophie @Agakiza.org