Amasomo y’ingenzi twakura ku kwizera kwa Barinaba

Bibiliya itubwira ingero z’abantu batandukanye bagiye bagira uruhare mu gukomeza itorero rya mbere bakaba nk’ikiganza gifasha abantu. Umwe muri bo ni uwitwa Barinaba n’ubwo atabaye ikimenyabose nka Pawulo cyangwa Petero ariko yagize uruhare mu kwigisha ubutumwa bwiza aharanira kuzana abantu kuri Kristo.

Niki dukwiye kwigira kuri Barinaba?

Hari inkuru nyinshi zagiye zandikwa kuri Barinaba uburyo yakoraga umurimo n’imyitwarire yamuranze mu itorero rya mbere.

1. Ntukeneye kwamamara ngo ube uboneye mu bwami bw’ijuru

Barinaba ntiyamenyekanye cyane nka Pawulo cyangwa Petero, kandi ntiyamenyekanye nka Yohana, Timoteyo, ariko yari afite uruhare rukomeye mu itorero rya mbere. Ibi tubibonera ku muhate yagize kugirango itorero ryemere kwakira Pawulo, mbere y’uko Pawulo aba intumwa.

Mu Ibyakozwe n’Intumwa9:26-28 tuhasanga uburyo Pawulo witwaga Sawuli mbere yakiriwe mu itorero rya mbere:
“Asohoye i Yerusalemu agerageza kwifatanya n’abigishwa, ariko bose baramutinya ntibemera ko ari umwigishwa. Maze Barinaba aramujyana amushyīra intumwa, azisobanurira uko yabonye Umwami Yesu mu nzira, kandi uko yavuganye na we, n’uko yavuze ashize amanga mu izina rya Yesu i Damasiko. Abana nabo i Yerusalemu akajya abasura, abwiriza mu izina ry’Umwami ashize amanga.(Ibyakz9:26-28)

Barinaba ni umuntu wabaye ikiraro hagati y’itorero n’umuntu wari ugiye guhita atangira kujya mu ngendo abwiriza ubutumwa buhindura isi.

2. Ntukwiye kubanza gutorerwa kuba ‘Umuyobozi cyangwa umuvugabutumwa’ kugirango ubwirize ubutumwa bwiza.

Abantu benshi batekerezako hari gusa ‘Ababitorewe/ abimitswe’ ko aribo bakwiye kujyana ubutumwa, ariko umurimo wo gukwirakwiza ubutumwa bwiza bwahawe abantu bose(Mariko16:15, Matayo 28:18-20), bityo Barinaba nawe waherekeje Pawulo nawe yafashije mu kwamamaza Ubutumwa bwiza.

Mu Ibyakozwe n’Intumwa14 tuhasoma ko Pawulo na Barinaba bari mu Bugiriki, ariho bamamariza ubutumwa bwiza. Uyu ni umurongo ugaragaza ko Pawulo ari we wabwirije cyane kurusha bose: “Maze Barinaba bamwita Zewu, na Pawulo bamwita Herume, kuko ari we warushaga kuvuga.”(Ibyakz14:12)

Nta kintu na kimwe giteye isoni nko kugira uruhare mu gukorera Imana, kuko tuba twamamaza Kristo aho kwiyamamaza.

3.Kuba umufasha no kwicisha bugufi ni ingenzi mu murimo wo kuvuga ubutumwa

Ibyakozwe n’intumwa 4:36-37 hatubwira Barinaba uwo ari we.
“Na Yosefu Umulewi wavukiye i Kupuro, uwo intumwa zahimbye Barinaba, risobanurwa ngo “Umwana wo guhugura”, yari afite isambu arayigura, azana ibiguzi byayo abishyīra intumwa.(Ibyakz4:36-37)

Tubwiwe ko Barinaba ari izina yahimbwe n’intumwa, uyu Yosefu yagiraga umurava agakunda gufasha abantu cyane nk’uko izina yahawe ribisobanura ko’ari umwana wo guhugura’, yagurishije umurima amafaranga yawo ayashyira intumwa, kugirango babigabanye buri wese bakurikije icyo akennye.(Ibyakz4:35)

Imyitwarire nk’iyi ni ingenzi ku murimo w’Ubwami bw’Imana. Dukeneye kuba abantu bakomeza abandi(Efeso 4:29, 1Abatesalonike5:11). Dukeneye kandi kuba abantu bafite ubushake bwo kujya ahantu kure tugafasha abantu kubw’ icyubahiro cya Kristo.(Luka10:25-37)

[email protected]