Dore ibyo kuzuka kwa Yesu byakoze ku buzima bwacu

Kuzuka kwa Yesu byagize umumaro mwinshi kuko kwaduhaye kugira ibyiringiro no kugira imbaraga nshya mu mibereho yacu ya buri munsi, muri uru rugendo turimo hano ku isi.

Abizeraga Imana ba mbere bahawe ubushobozi bwo kubaho ubuzima budasanzwe. Babagaho ubuzima bw’intangarugero kuko biringiraga kuzuka k’Umwami Yesu Kristo:

• Pawulo yabayeho ubuzima bwo kujya ahantu hose yigisha ubutumwa bwiza , icyo gihe cyose ntiyaburaga ibimutunga n’abantu babaga bari kumwe na we.

• Purisikila na Akwila ni abantu bamaranye igihe na Pawulo, bakorera Imana badatandukana. Bashakiraga hamwe ikibatunga, bagakorera ubwami bw’ijuru hamwe bakabera urugero abandi bakristo.

• Petero n’ubwo yihakanye Yesu gatatu ariko yabayeho yubaha Imana ,apfa azize kwizera uwo Mwami we.

Niba aba bantu baragize umuhate wo gukora ibyo bakoze kuko bari barabonye Umwami Yesu wazutse, bizeye ko yazutse mubapfuye nk’uko yari yarabivuze, ni yo mpamvu dukwiye kubaho ubuzima budasanzwe bwo kubana na Yesu kuko yazutse akaba ari muzima.

Ushaka kubaho ubuzima bwo guhesha Imana icyubahiro? Kuzuka kwa Yesu niko kubidushoboza. Iyi ni imwe mu mirongo ya bibiliya itubwira icyo kuzuka kwa Yesu kwakoze kuri twe:

2Abakorinto5:14-19

“Urukundo rwa Kristo ruraduhata, kuko twemejwe yuko nk’uko Umwe yapfiriye bose ari ko bose bapfuye, kandi yapfiriye bose kugira ngo abariho be gukomeza kubaho ku bwabo, ahubwo babeho ku bw’uwo wabapfiriye akanabazukira. Ni cyo gituma uhereye none tutazagira uwo dutekereza dukurikije amasekuruza, nubwo ari ko twatekerezaga Kristo, ariko noneho ntitukimutekereza dutyo. Umuntu wese iyo ari muri Kristo aba ari icyaremwe gishya, ibya kera biba bishize. Dore byose biba bihindutse bishya.

Ariko ibyo byose bituruka ku Mana yiyunze natwe ku bwa Kristo, ikaduha umurimo wo kuyunga n’abandi, kuko muri Kristo ari mo Imana yiyungiye n’abari mu isi ntiyaba ikibabaraho ibicumuro byabo, kandi noneho yatubikije ijambo ry’umwuzuro.”(2Abakorinto5:14-19)

Abaroma 8:11-17

“Ariko niba Umwuka w’Iyazuye Yesu aba muri mwe, Iyazuye Kristo Yesu izazura n’imibiri yanyu ipfa ku bw’Umwuka wayo uba muri mwe. Nuko rero bene Data, turi mu mwenda ariko si uwa kamere y’imibiri yacu ngo dukurikize ibyayo, kuko niba mukurikiza ibya kamere y’umubiri muzapfa, ariko nimwicisha Umwuka ingeso za kamere muzarama.

Abayoborwa n’Umwuka w’Imana bose ni bo bana b’Imana, kuko mutahawe umwuka w’ububata ubasubiza mu bwoba, ahubwo mwahawe umwuka ubahindura abana b’Imana, udutakisha uti “Aba, Data!” Umwuka w’Imana ubwe ahamanya n’umwuka wacu yuko turi abana b’Imana, kandi ubwo turi abana bayo turi n’abaragwa, ndetse turi abaragwa b’Imana turi abaraganwana Kristo niba tubabarana na we ngo duhanwe ubwiza na we.”

2Abakorinto5:21

“Kuko Utigeze kumenya icyaha Imana yamuhinduye kuba icyaha ku bwacu, kugira ngo muri we duhinduke gukiranuka kw’Imana.”

Kuzuka kwa Yesu kwaduhaye amahirwe yo kugera ku bwiza bw’Imana kuko muri we ariho Imana yiyungiye n’abari mu isi. Ntidukwiye gukerensa amaraso ye ahubwo dukwiye guhora dushima amahirwe twagize yo guhabwana ubwiza nawe.

Sophie @Agakiza.org