Kuki abantu benshi bavuga ko amasezerano y’Imana atinda ?/Pastor Desire

Abantu benshi bafite amasezerano menshi babwiwe n’Imana, bafite ibintu byinshi bategereje ku Mana kandi ni ukuri Imana irabyibuka. Ariko ushobora kuba ufite ikibazo kivugango ko nkora ibyiza kandi nkaba mfite n’amasezerano, ni iki gituma amasezerano adasohora? Abigishwa babajije Yesu bati “nkatwe twasize ibyacu tukagukurikira tuzahabwa iki?”

Nuko umwami abwira Hamani ati “Huta wende imyambaro n’ifarashi uko uvuze, ubigenze utyo Moredekayi Umuyuda wicara ku irembo ry’ibwami, ntihagire ikintu kibura mu byo uvuze byose . Nuko Hamani ajyana imyambaro n’ifarashi, yambika Moredekayi amugendesha mu nzira yo mu murwa ahetswe n’ifarashi,arangurura imbere ati “ Uku ni ko bazajya bagenza umuntu umwami akunze kubaha.”
Uyu Moredekayi yari umuzamu ku irembo ry’ibwami, yari umuntu woroheje w’inyuma ariko hari ikintu yariyarakoze cyiza. Yari yaravuze imigambi mibisha y’abantu bashakaga kwica umwami ntibahita bamugororera. Bibiliya iravugango’ birandikwa birabikwa’. Nyuma haza gutegurwa umugambi mubisha wo kwica Abayuda, Hamani ategura kwica Moredekayi kuko atamuramije, Moredekayi yari azi neza ko hakwiye gupfukamirwa Imana yonyine. Mu gihe baribateguye kwica Abayuda nibwo umwami yaraye adasinziriye ijoro ryose.
Mu gitabo bamusomeye nibwo yaje kuvumburamo inkuru ko Moredekayi yagiriye neza Umwami ariko akaba nta kintu yigeze agororerwa. Mu gitondo cya kare Hamani azinduka ibwami agiye gusaba Moredekayi ndetse yanamushingiye igiti cyo kumubambaho, agezeyo umwami aramubaza ngo umuntu umwami akunze kubaha bamukorera iki ? Umutima we uramushuka agirango niwe, asubiza ko uwo umwami akunze kubaha bamwambika ikanzu y’umwami,bakamugendesha ku ifarashi y’umwami, bagashaka umuntu ukomeye mu gihugu wo kugenda imbere ye avuga ngo ‘uwo umwami akunze kubaha ni uku azajya agirirwa.’
Umwami aramubwira ati ihute wende ifarashi n’imyambaro uko uvuze ubigenzereze Moredekayi umuyuda wicara ku irembo ry’ibwami.
Abigishwa bakurikira Yesu ntabwo yari umuhamagaro wo gukizwa, bamukurikiye bafite intego, bari barakandamijwe n’Abaroma, bari baziko aje gukuraho ingoma y’Abaroma, akima akaba umwami na bo bakaba abaminisitiri, harimo abantu bize basize imirimo yabo nk’abakoresha b’ikoro, harimo abasize amato kandi abarobyi babona amafaranga menshi. Yesu ababwirako ibyo basize bazabisubizwa inshuro ijana kandi bazahabwa n’ubugingo buhoraho. Abantu benshi bafite ibyo baretse kandi bafite n’amasezerano meza yo kuzashumbushwa.

Dore Impamvu 3 zituma amasezerano atinda

1.Satani: Ubundi iyo dusenze ijuru ryanzura kudusubiza, ariko satani azibira amasezerano yacu. Daniyeli yari afite icyifuzo gikomeye kandi yari umuntu w’Imana, afite umwuka wera. Ubwo yasengaga ngo ubwoko bwabo buve mu bunyage uhereye ku munsi wa mbere Imana iramwumva yohereza na marayika wo kumusubiza ariko bifata iminsi makumyabiri n’umwe marayika ataramugeraho.

Mwumveko ari ikintu gikomeye kubona abadayimoni bafata marayika w’Imana aje gusubiza Daniyeli. Ariko Daniyeli yakomeje kuba ku mavi, aba imbere y’Imana, aho yasengeye ntiyahava kugera igisubizo kimugezeho. Gusa ikibabaje nuko hari abantu basenga mbere yuko igisubizo kibageraho bakava aho bahoze basengera akagira amaganya, akava aho Imana ishaka ko aba, igisubizo kikaza wenda yarishyingiye, yarambuye , yarahemutse yarabeshye abantu. Byaba byiza wihanganye ukaguma aho Imana yaguhereye isezerano ibisubizo byazaza Marayika w’Imana akazagusanga mu mwanya mwiza wo kubana n’Imana nkuko byahoze. Buri munsi tugomba gusenga tukabohoza ibyo satani aboha, ubundi hari ibintu bitari mu mugambi w’Imana iyi mibabaro, gukena , kurwara byazanywe n icyaha.

2.Imyitwarire yacu: Imyitwarire yacu mu kigeragezo ni kimwe mu bitinza amasezerano y’Imana, hari ubwo umuntu asenga abihagazemo neza ariko ejo amasezerano yatinda akabivamo.
Gutegeka kwa kabiri 28:1-14 haravuga ngo nimugira umwete wo kumvira Uwiteka Imana yawe, n’uwo kwitondera amategeko yayo yose ngutegeka uyu munsi, Uwiteka Imana yawe izagusumbisha amahanga yose yo mu isi, kandi iyi migisha yose izakuzaho, ikugereho niwumvira Uwiteka Imana yawe.

Hari abavugako hari imivumo izagera ku bantu nibatayumvira. Imana iyo ijya gukora ikintu ishyiraho amabwiriza, ikavugango niwubahiriza ibi nanjye nzagukorera ibi. Abantu benshi bashakako Imana yubahiriza ibyo yavuze ku buzima bwabo ariko wareba ubuzima babayemo ugasanga buhabanye nuko Imana ibashaka. Abantu benshi bajya mu byaha bakagaruka bakavugango Mana hari icyo wavuganye natwe, uri Imana itivuguruza ariko Imana irivuguruza bitewe nuko witwaye. Yabwiye bene Eli ati “nari naravuzeko muzaba abatambyi iteka ryose ariko ubwo mutanyumviye mugakora ibyaha ubu ndabihinduye uzanyubaha niwe nzubaha.” Igihe cyose uzaba utari mu mwanya Imana yishimira ntuzategereze ngo ibyiza bizakugeraho. Amasezerano azatinda kugeza igihe uzagarukira mu murongo mwiza wo kubaha Imana.

Abanyabwenge bagiye bakurikiye inyenyeri ariko ubwo bajyaga kwa Herode bahise bayibura gusa inyenyeri irabategereza. Nukora ibyaha hari amasezerano utazabona ntabwo Imana yaba yarakubwiyeko uzayikorera hanyuma ubivange n’ingeso mbi za kamere ikwemerere gusa ngo uzatunga inzu, imodoka n’ibyo kurya kuko ibyo n’abapagani babibona ariko umurimo w’Imana ntuzawukora. Hari ibintu byiza byinshi Imana izaguha. Gushaka gushyuhaguzwa nabyo biri mubitinza amasezerano y’Imana, turashakako Imana ibikora uwo manya. Mu gatabo ku mugenzi hari abantu babiri bavugwa: Munyepfa yashakagako ibintu bye bahita babimuha, bamuha umutungo we uwo mwanya ariko Mwihanganyi we bamubwira kwihangana undi mwaka. Munyepfa yahise yaya umutungo we awujyana mubusambanyi urashira nyuma y’umwaka umwe ahita atindahara. Mwihanganyi we yahawe ibyo atazongera kwakwa kuko yihanganye agategereza igihe bateguye kumuha umurage we. Nitwe banyirabayazana mu gutinza amasezerano yacu.

3. Imana: Hari ubwo Imana itinza amasezerano yayo kugirango itwigishe kuyubaha. Abisirayeli bava muri Egiputa byari byoroshye ko bahita bagera mu gihugu cy’isezerano uwo mwanya. Imana yashimye kubanyuza mu butayu kugirango irebeko nibagera I kanani bazashobora kwitondera amategeko yayo bamaze kurya, bamaze guhaga.

Ijisho ry’Imana irebesha mu mutima w’umurokore ni ikigeragezo. Gutegeka kwa kabiri 8 hatwerekako Imana yabanyujije mu butayu ibagaburira manu kugirango ibamenyesheko umuntu adatungwa n’umutsima gusa ahubwo atungwa n’amagambo yose ava mu kanywa k’Uwiteka. Ishobora gutinza amasezerano kugirango irebeko nusubizwa uzashobora kuyubaha kuko niba utayubaha uri mu bukene ntabwo nukira aribwo uzayubaha , niba udatanga icya cumi uhembwa ibihumbi ijana ntabwo n’uhembwa miliyoni aribwo uzagitanga. Abantu benshi bagushijwe n’ibyo Imana yabahaye, Imana iraguha utuntu duke tugahita dusimbura Imana muri wowe .

Imana ntiyabuze ibyo iguha ahubwo irimo ishaka kukwigisha kubana na byo. Abantu benshi iyo bageze mu bisubizo batangira kuburira umwanya Imana kugeza aho bazumva batanayikeneye.

Bibiliya iravuga ngo “Kuko turi abo yaremye ituremeye imirimo myiza muri Kristo Yesu, iyo Imana yiteguriye kera kugira ngo tuyigenderemo”(Abefeso 2:10). Ibyo Imana iduha ntabwo ari iby’uyu munsi ni ibintu Imana yiteguriye kera, turi mu mugambi w’Imana, iyo umuntu atarakizwa aba ari kure y’umugambi w’Imana ariko iyo umuntu akijijwe aba agarutse mu mugambi w’Imana nyir’izina, aho Imana ishobora kumusohoreza amasezerano , aho umuntu aba yagera kuri byinshi byiza, ibyo umuntu yatakaje kuri Adamu umuntu abigarurirwa muri kristo Yesu.

Imana irusheho kugukomeza muri byose

[email protected]