Sobanukirwa abantu Imana idashaka ko bakubera inshuti

Mu buzima bwa buri munsi dukwiye kugira ibintu twemera cyangwa twangira ko biza mu buzima bwacu kuko bishobora kutwangiriza imibereko yacu. Kimwe n’ibindi byose dukwiye kwirinda abantu bamwe na bamwe twita inshuti kuko bashobora kugira uruhare mu guhindura ubuzima bwacu ndetse n’umubano wacu n’Imana ukangirika, niyo mpamvu dukwiye guhitamo inshuti zidufasha gukomeza urugendo rugana Imana.

Bibiliya itubwira neza ko tugomba gukoresha ubwenge mu guhitamo abakwiriye kuba inshuti zacu. Abakristo bakwiriye gucunga neza bakagenzura inshuti babana,basangira ,bagendana kugira ngo hato batonona ingeso zabo, bigatuma Imana ibarakarira.
“Ntimuyobe,kwifatanya n’ababi konona ingeso nziza”. (1 Abakorinto15:33).

Imana itwereka uko dukwiye kwitwara n’inshuti dukwiye kugira,ishaka ko umuntu agendera mu nzira itunganye,akirinda kugendera mu nzira y’abanyabyaha. kandi ikaduhishurira ko uwishimira amategeko ye icyo yakora cyose kimubera cyiza. Zaburi 1.

Ibi biratwereka ko iyo tugize inshuti mbi cyangwa tukazisanga,ntakindi bibyara uretse gukora ibyaha ,bikabyara n’ukwicuza gukomeye, no kugomera amategeko y’Imana.

Kugirango tubashe guhitamo inshuti nziza zizadufasha gutinya Imana,hari abantu Imana itubuza ku bakwiriye kutubera inshuti :

1.Abagome
Abagome ni abantu baba mu byaha,badakunda bagenzi babo ndetse ntibubahe cyangwa ngo batinye Imana. Imana ikangurira abakristo kwirinda abagome kuko ari abantu bariganya kandi bakaba intumwa z’ibinyoma.

“Bene abo ni intumwa z’ibinyoma, ni abakozi bariganya bigira nk’intumwa za Kristo. Kandi ibyo si igitangaza kuko na satani ubwe yihindura nka marayika w’umucyo. Nuko rero ubwo bimeze bityo,ntibyaba igitangaza kugirango abakozi be na bo bigire nk’abakozi bagabura ibyo gukiranuka,iherezo ryabo rizahwana n’imirimo yabo”.2 Abakorinto 11:13-15

2.Abanyamagambo
Abanyamagambo ni abantu badashobora gutuma iminwa yabo irekera kuvuga ibintu byangiza abandi, barabeshya kandi baharanira kugera kubantu benshi.

“Imburakamaro igambirira ibibi,kandi ururimi rwayo rwotsa nk’umuriro.Umuntu ugoreka ukuri aba abiba intonganya, kandi uneguranira mu byongorerano atandukanya inshuti z’amagara.Umunyarugomo yoshya umuturanyi we kandi akamunyuza mu nzira idatunganye.Uwica ijisho aba atekereza iby’ubugoryi,agahekenya amenyo agirango asohoze ibibi.”Imigani 16:27-30

Imana isaba abantu bayo kwirinda abanyamagambo ,ikavugako ntakindi kiba kibagenza uretse gutandukanya inshuti z’amagara.

3. Abanyagahararo
Hari abantu bigira inshuti n’abandi ntakindi babakurikiyeho ahubwo babashakaho inyungu,kumenyekana n’ibindi.

Aba bantu bakunze kugaragara nk’abitonze cyangwa abanyabuntu ariko mu by’ukuri atari uko bari mu bisanzwe ahubwo bagenzwa no gushaka inyungu binyuze mubandi.
Aba bantu bahinduka vuba kuko ni abantu bashobora no gutandukana n’inshuti zabo iyo hari amahirwe abonetse.

Imana rero isaba abakristo kuba maso kureba neza inshuti bafite niba ntakindi cyizigenza kugirango mudatandukanywa n’ibidafite agaciro imbere y’Imana bagasa nka Yuda wagambaniye umwami we Yesu Kristo ku biceri 30 gusa.
“Ni ukuri mwafindira impfubyi,n’inshuti mwayigura.Yobu:6:27.

Bakristo kugira inshuti n’ibyiza kuko zigufasha gukomera muri uru rugendo ariko birakwiye ko dushaka inshuti nziza zidufasha gusohozanya uru rugendo rugana ijuru. Bibiliya itubwirako inshuti zikundana ibihe byose kandi umuvandimwe avukira gukura abandi mumakuba.(imigani17:17).Inshuti nziza murasangira ntigucure, mwagendana ntigusige , mwaganira ntikuvemo,wapfa ikakurerera.twese kwifuze kuba inshuti nziza.

[email protected]