agakiza agakiza

Ukwiye gusenga isengesho rihindura.

agakiza

Ukwiye gusenga isengesho rihindura.

byanditswe na: Ubwanditsi     kuwa: 22 July 2019,  10:33

agakiza

Yesaya 55:6
Nimushake Uwiteka bigishoboka ko abamwa, nimumwambaze akiri bugufi.
Matayo 7:7
Musabe muzahabwa, mushake muzabona, mukomange ku rugi, muzakingurirwa.

Ibibazo umuntu agira uko bingana kose, uko bigira ubukana, uko bigira isura yo kudashoboka, burya byose bishobora guhindurwa n’isengesho

Iyo ufashe gahunda yo gusenga nta mikino, ubona intsinzikuko nta kinanira Imana.

Umuhanuzi Yesaya ,yaravuze ati: " Nimushake uwiteka bigishoboka ko abomwa

Ijambo : nimushake, bivuga Gushaka, bivuga kandi gushyira imbaraga ku kintu ngo ukibone, bivuga kandi gukora uko ushoboye ngo ugere kucyo wifuza.

Aha rero Yesaya yavugaga Gushaka Uwiteka.

Ni ukuvuga ko igihe cyose washyira imbaraga mu gushaka Uwiteka ,wamubona.

Umuntu wese muri Bibiliya washatse Uwiteka cyane, Imisozi yose yari imuri imbere, yaraguye kuko Uwiteka ari hejuru y’ibintu byose, afite imbaraga n’ububasha bitagereranywa.

Isengesho rero rihindura byose ndetse n’ ibyananiranye.

Ibibazo byose bikomeye, ibyitwa ko byananiranye, ntabwo bizarangira umunsi umwe kuko hari ibikurwaho no gusenga cyane.

Akenshi twebwe abana b’abantu tujya tumenya kuvuga cyangwa se kugenzura ibibazo byacu, ariko ntituzi kubisengera cyane ngo Uwiteka abikureho

Uzasanga hari umuntu umara amasaha n’amasaha avuga ibibazo bye, ariko ayo masaha ntayamare abisengera.

Uzasanga hari n’ undi uzi kugenzura ibibazo: ati: "ubwo imvura iguye ndaza kugira crise y’uburwayi runaka". Ariko ntamenye kugenzura ko igihe cyo gushaka Uwiteka kigeze.

None se ko wamenye Imana, ukaba utayishaka , ni nde uzasengera umuryango wawe? Ni nde uzasengera bya bibazo uhura na byo mu kazi, cyangwa mu rugo rwawe? Umushumba wawe yagusengera, inshuti zawe zagusengera, umuryango wawe wagusengera, ariko ibuka ko ikibazo cyawe ari wowe kivuna kurenza abo bose bagusengera.
Hariho igihe Uwiteka ajya yihisha, Uwiteka uzageza he kwihisha iteka?(Zaburi 89: 47).

Hari igihe kandi Imana ishaka umuntu, maze akayitera umugongo, igihe kikagera wa muntu nawe agashaka Uwiteka, maze nawe akabanza kumwihorera cyangwa guceceka.

Birakwiye ko turushaho, gushaka Uwiteka, umwambaze akiri bugufi kuko hariho igihe wamwifuza ukamubura, kandi waragize igihe gihagije cyo gusenga.

Uko urushaho gushaka Uwiteka ni ko icyubahiro cy’Imana n’imbaraga zayo birushaho kukuzaho n’impano zayo zikakuzura.

"Gusenga" no "gushaka Imana" biratandukanye.

Burya umuntu wese yasenga, n’umujura ugiye kwiba agenda asenga ati: "Mana umbabarire ntibamfate".

Ariko Gushaka Uwiteka bigendana no:

•kwihangana.
•Kumenya gutegereza no kwizera
•Kumenya uburyo ukoresha usenga
•Kugira ubwenge
•Kugwiza ijambo ry’ Imana muri wowe ngo rikuyobore.

Hari ibibazo twarangije gushyiraho iherezo, hari n’ababona ibyo ducamo bakadushyiriraho iherezo,bati wapi byaranze

Nta byaranze imbere y’Imana, kuko ni yo yonyine itanga iherezo ry’ ikibazo, twebwe icyo dusabwa, ni ugushaka Uwiteka bigishoboka ko abomwa

Imana itwongere imbaraga zo kuyishakana umwete, kuko nta mpamvu n’ imwe dufite ibitubuza kuyishaka umwete, nta n’ icyo twireguza cyatubuza gushaka Uwiteka bigishoboka.

[email protected]

HABA HARI ICYEMEZO UFASHE NYUMA Y'UBU BUTUMWA ?

Ibitekerezo( )

Tanga igitekerezo