agakiza agakiza

UMUSOMYI WA BIBILIYA, ni igitabo gitegurwa...

agakiza

UMUSOMYI WA BIBILIYA, ni igitabo gitegurwa...

byanditswe na: Ubwanditsi     kuwa: 16 May 2019,  06:01

agakiza

UMUSOMYI WA BIBILIYA, ni igitabo gitegurwa n’UMURYANGO W’ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n’Imana buri munsi mu ijambo ryayo. Kuri uyu wa kane, taliki ya 16, Ukwezi kwa gatanu, turasoma mu Abaroma 3.21-31

21.Ariko noneho hariho gukiranuka kw’Imana kwahishuwe kudaheshwa n’amategeko, nubwo amategeko n’ibyahanuwe ari byo biguhamya,
22 .ni ko gukiranuka kw’Imana abizeye bose baheshwa no kwizera Yesu Kristo ari nta tandukaniro,
23.kuko bose bakoze ibyaha, ntibashyikīra ubwiza bw’Imana,
24.ahubwo batsindishirizwa n’ubuntu bwayo ibibahereye ubusa, ku bwo gucungurwa kubonerwa muri Yesu Kristo.
25.Ni we Imana yashyizeho kuba impongano y’uwizera amaraso ye, kugira ngo yerekane gukiranuka kwayo kwayiteye kwirengagiza ibyaha byakozwe mbere y’icyo gihe, ubwo Imana yabyihanganiraga,
26.kandi yabikoreye kugira ngo no muri iki gihe yerekane gukiranuka kwayo, ngo ibe Ikiranuka kandi Itsindishiriza uwizeye Yesu.
27.None se twakwīrāta iki? Nta cyo. Ni ayahe mategeko yabitubujije? Ni ay’imirimo? Reka da! Ahubwo twabibujijwe n’amategeko yo kwizera,
28.kuko duhamije yuko umuntu atsindishirizwa no kwizera, atari imirimo itegetswe n’amategeko.
29.Mbese Imana ni iy’Abayuda bonyine? Si iy’abanyamahanga na bo? Yee, ni iy’abanyamahanga na bo,
30. kandi ubwo Imana ari imwe izatsindishiriza abakebwe ku bwo kwizera, n’abatakebwe na bo izabatsindishiriza ku bwo kwizera.
31.Mbese none duhinduze ubusa amategeko kwizera? Ntibikabeho! Ahubwo turayakomeza.

Ibibazo bidufasha gusobanukirwa umusomyi:

Ibyo nsomye biranyigisha iki
Ku Mana data wa twese?
Kuri Yesu kristo?
Ku mwuka wera?

Ubusobanuro bw’umusomyi

Bose bakoze ibyaha ntibashyikira ubwiza bw’Imana (23): Mu bice bya mbere Pawulo yagaragaje uko ari abakebwe ari n’abatakebwe; bose nta n’umwe washoboye gukiranuka uko Imana ibishaka. Nyamara Imana ntiyabaretse ngo bose barimbuke, ahubwo yahishuye ugukiranuka kudaheshwa no gukurikiza amategeko. Imana yatanze umwana wayo ngo abe impongano y’ibyaha by’abari mu isi bose (Yoh.3.16). Batsindishirizwa n’ubuntu bwayo ibibahereye ubusa (24): Agakiza ni impano y’Imana, ntikagurwa amafaranga cyangwa ngo gakodeshwe. Bityo nta bwinshi cyangwa ubwiza bw’imirimo twakora ngo twemerwe nayo. Agakiza rero ni umurimo w’Imana yonyine uturuka mu mbabazi no mu rukundo byayo (Ef.2.4-5,8-10). Itsindishiriza uwizeye Yesu (26): Gutsindishirizwa ni ukugaragara nk’umukiranutsi imbere y’Imana kandi utari ubikwiye. Abantu benshi bibwira ko nta muntu ushobora kuba umukiranutsi acyambaye uyu mubiri, keretse nyuma y’urupfu. Gusa ijambo ry’Imana ritwereka ko duheshwa gukiranuka no kwizera Yesu Kristo wahindutse icyaha ku musaraba (2Kor.5.21). Mbese ujya uzirikana ko Yesu yapfuye mu kimbo cy’abanyabyaha, kugira ngo umwizera wese adacirwaho iteka (30)?

[email protected]

HABA HARI ICYEMEZO UFASHE NYUMA Y'UBU BUTUMWA ?

Ibitekerezo( )

Tanga igitekerezo