agakiza agakiza

Pentekote no kuramya Imana.

agakiza

Pentekote no kuramya Imana.

byanditswe na: Ubwanditsi     kuwa: 6 June 2019,  04:21

agakiza

1. Tewofilo we: Muri cya gitabo cya mbere nanditse ibyo Yesu yabanje gukora no kwigisha byose,
2. kugeza ku munsi yazamuriwe mu ijuru amaze gutegeka intumwa yatoranije, azitegekesha Umwuka Wera.

3. Amaze kubabazwa ababonekera ari muzima, atanga ibimenyetso byinshi, agumya kubabonekera mu minsi mirongo ine avuga iby’ubwami bw’Imana.
4. Nuko abateraniriza hamwe, abategeka kutava i Yerusalemu ati “Ahubwo murindire ibyo Data yasezeranije, ibyo nababwiye:
5. kuko Yohana yabatirishaga amazi, ariko mwebweho mu minsi mike muzabatirishwa Umwuka Wera.”
6. Nuko bamaze guterana baramubaza bati “Mbese Mwami, iki ni cyo gihe wenda kugaruriramo ubwami mu Bisirayeli?”
7. Arabasubiza ati “Si ibyanyu kumenya iby’iminsi cyangwa ibihe Data yagennye, ni ubutware bwe wenyine.
8. Icyakora muzahabwa imbaraga Umwuka Wera nabamanukira, kandi muzaba abagabo bo kumpamya i Yerusalemu n’i Yudaya yose n’i Samariya, no kugeza ku mpera y’isi.”
9. Amaze kuvuga atyo azamurwa bakimureba, igicu kiramubakingiriza.

Icyo twaremewe ni uguhimbaza Umuremyi wacu. Ba sogokuruza bamaze guhusha iyo ntego nibwo birukanwe mu ngobyi bari bararemewe. Ubusabane bwabo n’Imana bwari bupfuye. Ibyishimo by’umuntu byuzuye biboneka iyo asabana n’Imana. Ubuze ubwo busabane aba ari nk’upfuye ahagaze.

Imana ntiyarekeye aho, yagiye ishaka aho yakongera guhurira n’umuntu. Nibwo yategetse Mose kubaka ihema ari naryo bashyize i Shilo bamaze kugera i Kanani. Niho bayisengeraga, niryo ryari ikimenyetso cy’ukuba kwayo hagati muri bo kuko ryarimo isanduku y’Uwiteka. Iryo hema niryo ryasimbuwe n’ihema rya Dawidi, ryo rikaba ryari rifite umwihariko ko Isanduku y’Uwiteka itari igikingirijwe n’umwenda, rubanda baramyaga Imana bayitegeye. Hakurikiyeho insengero zinyuranye zaje nyuma y’urwa Salomo rwasubiye kwigiza Isanduku y’Isezerano kure, aho umutambyi mukuru yageraga rimwe mu mwaka. Ariko umugambi w’Imana ni ukubana n’abantu bayo bya bugufi. Umuhanuzi Amosi yawuhishuriweho avuga ko ku munsi w’Uwiteka azegura ihema rya Dawidi ryaguye kandi akica ibyuho byaryo. (Amosi 9:11).

Igihe cy’agakiza gisohoye, Imana yaje mu ishusho y’umuntu, ibana n’abo yaremye. Ubusabane bushyitse bwari butangiye, ariko busohora neza Yesu amaze gutsinda urupfu akanasubira mu ijuru kutwoherereza Umufasha. Mbere yo gusubira kwa Se, Yesu yadushyize mu biganza by’Imana kuko yari adusigiye umurimo wo kuyihimbariza mu isi kandi tutari abayo.(Yohana 17).

Hari ibyo kumenywa n’umuntu ushaka gusohoza iyi mpamvu nyamukuru y’ukubaho kwe:

Kwizera

Impamvu Yesu amaze kuzuka yongeye gufata iminsi mirongo ine yo kugenda yihishurira abigishwa be, kwari ukugira ngo abagarure kuko bari barahabijwe n’ubwoba. Mu bwoba ni kure y’ubusabane n’Imana. Ubwoba bwabibagije ko yari yarasezeranye ko azazuka. Utakaje kwizera aba abuze urufatiro rw’ibindi byose bigize agakiza. Kwizera niko kutumenyesha ko ibigaragara byaremwe mu bitagaragara, bityo tukarenza amaso ibigaragara. Udafite kwizera ashishikazwa no kuvoma amazi ntiyite ku isoko akomokamo. Kuramya Imana nyabyo si ugutinda ku gitangaza ubwacyo, ahubwo ni ukwerekeza amaso aho gikomoka. Ku Nyanja Itukura, Imana yatangajwe no kubona ko Mose wari warayihishuriwe nawe atatse kimwe n’abo ayoboye. Imana yo kwizerwa kandi itagira ikiyinanira yo ntikangwa n’inyanja. Twebwe ntitureba ku biboneka kuko ari iby’igihe gito. (2 Abakorinto 4:18).

Kurindira

Ni umurimo usaba gutegereza no kwihangana. Iyo unaniwe gutegereza utakaza byose, n’icyo wifuzaga ntukigereho. Niko byari byagendekeye Petero n’abamukurikiye bibagiwe ko Yesu yari yarabagize abarobyi b’abantu, bigendeye barara baroba bacyesha ijoro ntacyo bafashe. Nyamara Yesu yari afite ibyo bakeneye kuko ahabasanze niwe wabagaburiye. Iyo twakiriye Yesu, byose ntibihita bikemuka, haba hari urugendo rwo kugenda duhinduka kandi bidusaba kumenya kubaha uwaduhamagaye turindira. Marayika ageze kuri Daniyeli wasengeraga ubwoko bwe n’igihugu cye yamubwiye ko ugusenga kwe kumvikanye kuva ku munsi wa mbere kandi igisubizo kikaza ubwo. Ariko iyo minsi igera kuri makumyabiri n’umwe akaba yari yatindijwe n’umutware w’ubwami bw’u Buperesi. Si uko Imana ari inyantege nke, ahubwo ni uko iba igitegura aho tuzaba turi n’uko tuzaba tumeze mu gihe twamaze kubishyikira.

Guhabwa imbaraga z’Umwuka Wera.

Ubusabane n’Imana ntibushoboka rwose mu mubiri. Hakenewe kwinjira mu isezerano ry’Imbaraga z’Umwuka Wera. Iyo bitaba ibyo, kubana na Yesu imyaka igera kuri itatu yose kwari kuba guhagije ngo Petero ahinduke umugabo nyamugabo wo guhamya ibye. Nyamara uwari wamwihakanye imbere y’umuja ni nawe wamuhamije imbere y’abamwishe n’abatware nyuma yo kuzihabwa.

Kumenya umumaro w’Umwuka Wera.

Umwuka Wera si uw’amateka, ni ubuzima buhoraho. Uko ab’itorero rya mbere bahuraga banasangira ibyabo, bamanyaguraga umutsima kandi bakongera kuzuzwa. Ibyo abasha gukora ni ibyo twumvise n’ibindi byinsi tutarabona. Niwe uhindura umuntu kuba umuhamya nyawe. Umuhamya w’ukuri ni usubira mu byo yavuze ejo kuko Umwuka ubimuvugisha adahinduka, ndetse akaba yanabipfira. Kubw’imbaraga ze abari ab’intege nkeya nka Petero bemeye kwicwa urw’agashinyaguro. Sitefano aterwa amabuye ari nako asabira abayamutera kandi ntiyacogora guhamya kugeza aho yahishuriwe Yesu ahagurutse kumwakira.

Ntituzabasha kuramya Imana niba dukomeje kwikiriza intero y’ubwihebe bw’isi. Iradushaka mu busabane nayo. Kubw’Umwuka Wera w’Imana, ubuzima bwacu bube umuhamya w’agakiza. Amen!

[email protected]

HABA HARI ICYEMEZO UFASHE NYUMA Y'UBU BUTUMWA ?

Ibitekerezo( )

Tanga igitekerezo