agakiza agakiza

Ni gute nahagarika gutinya urupfu?

agakiza

Ni gute nahagarika gutinya urupfu?

byanditswe na: Ubwanditsi     kuwa: 16 August 2019,  05:44

agakiza

Umuntu wese iyo ava akagera atinya urupfu, yaba afite abamurinda yaba umukristo haba igihe yumva afite ubwoba bwo gupfa. Ntacyakorwa kugira ngo urupfu ruveho. Ariko kandi urupfu siwo mugabane Imana yatugeneye iturema. Twaremewe gukiranuka no kubana n’Imana muri paradizo. Urupfu ni ingaruka y’icyaha mu isi. Gupfa ni amahirwe, tudapfuye, twabaho mu buzima bw’icyaha iteka ryose.

Muri iyi si yuzuyemo ibibazo, iyo umuntu atekereje ko urupfu rumutegereje, atangira kwibaza uburyo azapfamo inshuro nyinshi ashobora guta umutwe. Icyakora dufite ibyiringiro ko uri muri twe afite imbaraga kuruta uri mu isi (1yohana 4:14) kandi ko yaduteguriye aho tuzabana (Yohana 14:2)

Urupfu ni ikintu gihangayikishije abatuye isi, abantu benshi bahorana ubwoba bibaza ngo ese tuzapfa mu buhe buryo? Ese nituva mu mubiri ni iki kizakurikiraho? Kubw’amahirwe ibi byose bihangayikishije abantu Imana ibifitiye igisubizo.
Mu by’ukuri, nta muntu n’umwe wabona ubusobanuro ku bijyanye n’urupfu, nyamara Bibiliya ivuga yeruye uko bigenda.

Iyo tuvuye mu mubiri, tujya kubana n’umucunguzi Yesu Kristo mu rwandiko rwa kabiri Pawulo yandikiye Abakorinto 5:6-8 aragira ati: “nicyo gituma dukomera umutima iteka, kandi tukamenya yuko iyo turi iwacu mu mubiri, tuba dutuye kure y’umwami wacu (kuko tuba tugenda tuyoborwa no kwizera, tutayoborwa n’ibyo tureba) nyamara dukomera umutima kandi icyoturushaho gukunda ni ukwitandukanya n’uyu mubiri, kugirango twibanire n’umwami wacu, nicyo gituma tugira umwete wo kumunezeza twaba turi mu mubiri cyangwa tudahari”

Urupfu rufatwa nk’ikintu cyavuye ku Mana gishinzwe gutandukanya abantu. Nyamara koko iyo umuntu apfuye aba atandukanye n’incuti ze hano ku isi, ku bakristo, tuzi ko uko gutandukana n’incuti cyangwa imiryango ni iby’akanya gato ugereranyije n’igihe tuzamarana nabo mu ijuru. Ku badakijijwe bo siko babibona kuko baba bafite ubwoba ko ubuzima bwabo burangiriye aho, birakwiye rero ko tubegera tukabamenyesha inzira y’agakiza bakarekeraho gutinya urupfu.

Kuba tuzapfa si ikintu cyakagombye kudutera ubwoba ahubwo icy’ingenzi ni ukwibaza ngo tuzapfa dukijijwe? Kuko mu isi siho tuzahora, iwacu ni mu ijuru niho dutegereje umukiza ko azava ariwe mwami Yesu Kristo uzahindura uyu mubiri wo gucishwa bugufi kwacu akawushushanya n’umubiri w’ubwiza bwe kuko afite imbaraga zo kumubashisha kwigandurira byose (Abafilipi 3:20-21)

Mugihe tumaze gusobanukirwa iby’ubwo bwami, tugomba kubuharanira kandi tukubahiriza ibyo budusaba. Nimurebe urukundo ruhebuje data yadukunze, rwatumye twitwa abana b’Imana kandi niko turi. Nicyo gituma ab’isi batatumenye kuko batayimenye (1Yohana:3-1)

Bakundwa turi abana b’Imana, uko tuzasa ntikurerekanwa.tuzi ko niyerekanwa tuzasa nawe kuko tuzamubona uko ari. ibi biduhamiriza ko tutari ab’isi, ko ijuru ridutegereje ariho tuzabona umugabane wacu nk’abana b’Imana, bityo dukumbure umunsi tuzasa na Kristo ubwo tuzamubona uko ari, urupfu ntiruzongera kubaho ukundi.

HABA HARI ICYEMEZO UFASHE NYUMA Y'UBU BUTUMWA ?

Ibitekerezo( )

Tanga igitekerezo