agakiza agakiza

Kubera iki abakristo bibasirwa n’imibabaro?

agakiza

Kubera iki abakristo bibasirwa n’imibabaro?

byanditswe na: Ubwanditsi     kuwa: 2 September 2019,  14:48

agakiza

Isi yuzuyemo ingorane z’urudaca: inzara, indwara, ubukene, ubushomeri, gupfusha n’ibindi. Ibi byose ni rusange ku bantu bose ariko abantu bakunze kwibaza impamvu abakristo bahura n’imibabaro mu gihe abatamwemera ubona babayeho mu buzima bwiza bwuzuyemo imigisha.

Iki kibazo ntigitangaje kuko hari abo usanga bavuga ko Yesu yaje kudukiza imibabaro. Nyamara siko bimeze umuntu usoma Bibiliya aba azi amakuru yose. Twibuke ko intumwa zose zababajwe, dukurikiranye amateka y’itorero rya kera dusanga ryarababajwe, n’itorero ry’iki gihe ku isi hose niko rihura n’imibabaro kandi biracyakomeje kugeza Yesu agarutse agahanagura amarira ku maso yacu (Ibyahishuwe 21:4)

Yesu Kristo ku musaraba yatsinze icyaha n’urupfu. Binyuze mu ntsinzi ye twababariwe ibyaha byacu kandi twizeye kuzahabwa ubugingo buhoraho. Ariko ntaho ibyanditse byera bitugaragariza ko Yesu yaje mu isi kudukiza imibabaro. Ku rundi ruhande kubabara ni kimwe mu bice bigize ubuzima bw’abakristo. Intumwa Pawulo yabigarutseho mu rwandiko yandikiye Abafilipi 1:29 agira ati: “kuko mutahawe kwizera Kristo gusa, ahubwo mwahawe no kubabazwa ku bwe”.

Petero yanditse urwandiko ruvuga ku bijyanye n’imibabaro. Yesu yadutoje kumenya ko abarira aribo banyamahirwe (Luka 6:20:21) kimwe mu bizaba mugihe cy’urubanza ku bizera, ni ukubazwa icyo twamariye abandi bakristo mu gihe bari mu mibabaro (Matayo: 25:34). Bibiliya itwereka ko Pawulo nawe yanyuraga mu mibabaro itandukanye: umunaniro, inzara, inyota, ubukonje bukabije, kubura imyenda yo kwambara (2 Abakorinto 11:27) ni ukuvuga ngo intumwa zose zarababajwe bikomeye.

Ni amahirwe akomeye cyane ko Yesu yatsinze, abamwizera bose bafite amahirwe akomeye yo kuzana ibibagoye bakabimutura akabibafashamo. Niba twizera ko imibabaro izarangira, Imana ibona imibabaro yacu nk’aho ari inzira yo kwigaragarizamo ubumana bwayo.

Bamwe bazi ko ubuzima bwa gikristo bwuzuye imibabaro,bakongera bakibaza impamvu abantu bahitamo gukizwa kandi bazi ko ari inzira yuzuye akaga n’amakuba.

Igisubizo kirahari kandi cyiza. Abaje kuri Yesu babona amahoro y’Imana kuko bafitanye umubano ukomeye n’Imana iba muri bo kandi bafite umudendezo.

Twakwanzura tuvuga ngo abari guca mu mibabaro mukomere umubabaro wanyu,Yesu azawuhindura ibyishimo kandi azahanagura amarira ku maso yanyu. Ku bari mu mahoro namwe, birakwiye gufasha abari mu mibabaro. Uyu niwo muhamagaro nyakuri w’abakristo.
Source: truthsaves.org

HABA HARI ICYEMEZO UFASHE NYUMA Y'UBU BUTUMWA ?

Ibitekerezo( )

Tanga igitekerezo