agakiza agakiza

Igihe urimo kizasimburwa n’ikindi gihe.

agakiza

Igihe urimo kizasimburwa n’ikindi gihe.

byanditswe na: Ubwanditsi     kuwa: 31 May 2019,  06:09

agakiza

UMUBWIRIZA 3.1-8

1.Ikintu cyose kigenerwa igihe cyacyo, n’icyagambiriwe munsi y’ijuru cyose gifite umwanya wacyo, 2.Hariho igihe cyo kuvuka n’igihe cyo gupfa, igihe cyo gutera n’igihe cyo kurandura ibikūri, 3.Igihe cyo kwica n’igihe cyo gukiza, igihe cyo gusenya n’igihe cyo kubaka, 4.Igihe cyo kurira n’igihe cyo guseka, igihe cyo kuboroga n’igihe cyo kubyina.

5. Igihe cyo kujugunya amabuye n’igihe cyo kuyarunda, igihe cyo guhoberana n’igihe cyo kwirinda guhoberana.
6.Igihe cyo gushaka n’igihe cyo kuzimiza, igihe cyo kwimana n’igihe cyo gutanga.
7.Igihe cyo gutabura n’igihe cyo kudoda, igihe cyo guceceka n’igihe cyo kuvuga igihe cyo gukunda n’igihe cyo kwanga,
8.Igihe cy’intambara n’igihe cy’amahoro

Nanone kandi mu gitabo cy’Umubwiriza (9.12) yaravuze ati:

Erega nta muntu uzi igihe cye, uko amafi afatwa mu rushundura n’inyoni na zo zikagwa mu mutego, uko ni ko abantu na bo bategwa mu gihe cy’amakuba, iyo baguwe gitumo.

Aya magambo yavuzwe n’Umwami Salomo, umuhungu wa Dawidi, waje no kugira amahirwe yo guhabwa n’Imana uburenganzira bwo gusaba icyo ashaka cyose akagihabwa, maze ayisabira Ubwenge (1Abami 3.11);

Aha ariko umenye ko ubumenyi n’ubwenge ari ibintu bibiri bitandukanye kandi byuzuzanya: ubwenge bubanziriza ubumenyi, kuko udafite ubwenge ntiwabasha no kugira ubumenyi;

Nyamara, biragatsindwa ko ubumenyi bwawe bwasumba ubwenge bwawe: _"Ngo ubumenyi bw’umuntu bwasumbye ubwenge bwe, none ngo ubu afite ubwoba bw’ibyo azi!"

Igihe rero kigira ku muntu ububasha bukomeye, kuko muri rusange giteye mu buryo bukurikira:

Ni umwarimu uruta abandi;
Kinjira kidakomanze;
Gitaha kidasezeye;
Ntigitsindwa;
Gitegeka umuntu akacyumvira;
Gituma wubahwa kinatuma usuzugurwa
Kiguhindura inzobe wari igikara, kikaguhindura igikara wari inzobe.

Ni byiza ko umuntu agira umwete wo gukora ibyiza mu gihe arimo, kuko kiba kizasimburwa n’ikindi.

Reka nanone, dufatire ikitegererezo ku nkuru ya Yosefu, mu bihe bye bitandukanye, nkuko tuyisanga mu gitabo cy’Itangiriro 41.25-36(Yosefu abwira Farawo ati “Inzozi za Farawo ni zimwe: ibyo Imana igiye gukora yabibwiye Farawo).

Hazaza imyaka irindwi y’uburumbuke bwinshi mu gihugu cya Egiputa cyose, hanyuma hazakurikiraho imyaka irindwi y’inzara, ubwo burumbuke bwose bwibagirane ...

Uyu Yosefu ni mwene Yakobo umuhungu wa Isaka mwene Aburahamu incuti y’Imana(Yakobo 2.23);

Yosefu rero yagiriwe ishyari na bene se kuko se yamukundwakazaga kurusha abandi, hanyuma akaza no kubarotorera inzozi zikomeye bituma barushaho kumwanga (Itangiriro 37.16),nyuma baza kumugurisha n’abamujyanye mu Egiputa (Itangiriro37.27);

Ageze yo, ku bwo kubaha, kwizera no kumvira Imana, Yosefu yahabereye umugisha, ndetse yanga no gusambana na mukashebuja, bituma ashyirwa mu nzu y’imbohe,

Aho yavanywe n’iyo mpano ye yo kurota no kurotora inzozi, nyuma yo gusobanurira Farawo inzozi zikomeye yari yarose, mu gihe abandi bose mu Egiputa bari bananiwe kuzimusobanurira (Itangiriro 41.39);

Muri make, izo nzozi zaburiraga Farawo ko igihugu cye cyenda kunyura mu gihe kiza cyane cy’uburumbuke, hanyuma icyo gihe kikazasimburwa n’ikindi gihe kibi cyane cy’inzara (Itangiriro 41.30).

Uko rero izo nzozi zasobanuriwe Farawo ziteye, ni ko n’uyu munsi bimeze mu mibereho yawe nanjye, kuko igihe cyose kiza gisimburwa n’ikindi gihe kibi nta nteguza (Umubwiriza 9.12):

Igihe urimo cy’imbaraga kizasimburwa n’igihe k’intege nke; iki gihe uvuga rikumvikana kizasimburwa n’igihe cyo guhinyurwa; iki gihe cy’umudendezo cyizasimburwa n’igihe cy’agahato, igihe cy’amanywa kizasimburwa n’igihe cy’ijoro;

Ni yo mpamvu Yesu yavuze, ati ‘’Nkwiriye gukora imirimo y’uwantumye hakiri ku manywa, bugiye kwira ni igihe umuntu atakibasha gukora." (Yohana 9.4)

Nuko rero, uyu munsi ntushukwe n’isura yawe, ubutunzi bwawe, ubumenyi bwawe, cyangwa ikindi kintu icyo ari cyo cyose wumva wakwishingikirizaho ngo bitume udamarara, ahubwo ugire umwete wo gukora ibyiza ugifite uburyo, kuko iki gihe urimo kizasimburwa n’ikindi gihe!

[email protected]

HABA HARI ICYEMEZO UFASHE NYUMA Y'UBU BUTUMWA ?

Ibitekerezo( )

Tanga igitekerezo